譽小館 (已易手) 新餐厅

参加完活动后翻到上水都已经夜晚9点几，成日无食过嘢真系好鬼饿，去誉小馆叹吓茶，食d点心，旨在消除一下一日嘅疲累。职员态度友善，逐一介绍点心纸上面嘅受欢迎食物。我哋就叫咗烧卖皇、云南野箘饺、白灼通菜、金钱肚，再加个炸酱鱼蛋捞面。烧卖皇一上枱时真系有吓亲，估唔到咁鬼大粒，成粒迷你煎堆咁。有时好怕食烧卖，因为肥猪肉太多，一来唔健康，二来好漏，但呢个烧卖皇入面嘅猪肉肥瘦恰到好处，都唔错。云南野箘饺，系招牌点心之一，味道又真系几好wo。虽然外皮蒸到有少少过火，所以好易散，但系入面嘅馅料系好香好浓嘅什箘，数得出有至少4种菇类。炸酱鱼蛋捞面味道未算突出，值得欣赏嘅系肉丝真系一条条粗条，可以品尝到肉味同质感。白灼通菜我又真系无预期佢系咁靓，嫩口翠绿，唔会太油。配埋特浓嘅腐乳醤，呢碟菜堪称完美！最后必须要讲嘅就系碟金钱肚，少少辣，几惹味，炆得够淋滑，而且估佢唔到咁大碟！本身真系以为系点心份量，每人两三件，点知佢有成二十件，搞到我哋失预算，食到overload ，饱到捧住个肚走！