捌壹公館 (已結業)

呢間餐廳係行簡約新潮風，菜式係西式fusion菜為主，無論上午，下午定晚上來都有o岩嘅野食到。呢度最突出嘅裝飾就係牆上嘅呢隻潮牌Kaws公仔。我地五點半來到，未到食飯時間所以仲未有咩人，到7點左右已經滿座，所以來晚飯時間最好book定位。孜然風味單骨雞翼本身同朋友都驚單骨雞翼會唔會太少冇乜肉食，但上菜發現佢竟然係原隻雞翼，好足料，起咗骨亦可見佢係好花功夫同心機，雞翼食落去勁香口，同出面孜然雞翼唔同，而且醃到好入味，保留左肉汁，唔會太乾，外皮咬落去脆口。一份有六隻，性價比極高！慢煮牛肋條配香煎上海年糕中西fusion嘅結合，平時d牛肋條係好多肥膏同食落好韌，而呢個不單肥瘦適中，經長時間慢煮下，牛肉軟滑，易切易咬，個黑椒醬汁香濃而帶陣陣微辣味。上海年糕微微香煎過，外脆內軟，口感頗有韌勁，充分吸收左黑椒醬汁嘅味道，幾有新意嘅組合！