御石燒 (已結業)

喺旺角行街，睇完鞋之后见到呢间，我见到系石板烧，就决定食呢间做晚餐。两个人一人嗌咗一款， share食都好够食。职员好细心问我哋需唔需要围裙，咁就唔怕整污糟啲衫。又会好温柔咁提醒，小心弹油辣亲自己。每个烧肉餐，都会配上一旧脂肪，系令到个铁板上有油，令到肉唔会黐底，如果用完嘅话，可以问佢哋再拎多一旧。唔够火，都会好快帮手换。$ 88 御烧豚肉 配椰菜丝沙律豚肉油脂分怖啱啱好，烧完之后，食入口后都唔会觉得油腻。椰菜丝沙律，有少少酸酸地嘅汁，配埋豚肉解腻啱啱好。$ 158 御烧特级牛小排+$35紫菜味素饭＋流心蛋＋面豉汤呢一款系非吉列款，呢个价钱嚟讲，份量都好多，大概有十几差唔多二十块。油脂分布好平均，唔会太多肥膏。肉质软淋嫩滑，每边煎一阵，已经好快食得晒。食入口好Juicy，爆出好香嘅牛肉汁，配埋素饭，一流。流心蛋多几好食，应该腌制过，有少少酱油味。面豉汤唔会太咸，自己一路食，一路烧，好过瘾。性价比高，可以再嚟过。