京都抹茶庵 (已結業)

同朋友喺K11行完街，经过呢间抹茶专门店，入面好似有好多甜品同饮品都好吸引，于是决定入去叹吓冷气，饮杯茶、食个甜品叹吓先。最近做紧推广焙茶甜品menu，抹茶同焙茶都系我嘅favourite，今次就试咗焙茶先啦。焙茶流心蛋糕卷$78- 一开始都担心蛋糕卷会整到好似嘉顿蛋糕嘅味道，就咁食个蛋糕真系普通咗少少。加埋普通忌廉同焙茶忌廉、焙茶粉会好食好多。忌廉打得几轻盈，唔会好肥腻，但系其实冇流心嘅效果，有啲失望。隔离嘅红豆蓉有啲过甜，花花黑糖大菜膏都麻麻哋，果然有焙茶成份嘅甜品先好味啲，不过蛋糕卷性价比偏低。焙茶牛奶(热)$52- 牛奶暖暖哋，奶味重过焙茶味，喺我嘅角度佢可以再落少啲糖，会更合我口味。五十几蚊都几贵。焙茶芭菲 $92- 超级大杯，食完好满足，焙茶雪糕好浓味，底层仲有好多焙茶啫喱布甸同脆米通。个人认为呢个抵食过蛋糕卷或者焙茶牛奶，推介！煎茶$38- 煎茶热辣辣，食完雪糕再饮一啖热茶最好不过。