吉利尼 (已結業)

之前约咗朋友去科学馆睇木乃伊展览，因为平时唔系成日会出尖沙咀，所以都想揾啲有兴趣嘅餐厅顺便试埋~我好钟意食喇沙既，吐司工房嘅喇沙都唔错，但系有啲贵，加上系连锁店黎，周围都有得食；好时沙嗲就食过一次，所以想试吓唔同嘅餐厅，无意中发现吉利尼，原来喇沙都好出名，所以决定趁今次嘅机会试埋啦。其实位置唔难揾，餐厅都几靓几舒服，采取自然光都够光猛。其实餐牌可以选择嘅食物唔多，都系喇沙、海南鸡饭、咖央多士之类。最后我决定要一碗肥牛喇沙，我朋友就叫咗海南鸡饭。佢啲海南鸡饭到先，不过见肉唔系好多，鸡皮多过鸡肉，好似麻麻哋..不过佢话都几好味既，我食左一旧鸡都几嫩既。等左一阵我碗喇沙终于到啦！其实份量都偏小，不过牛肉都几多，而牛肉就系平时打边炉𠮶啲肥牛，冇乜特别，配料有蛋同豆卜，其实大家都知食喇沙个灵魂就系汤底，汤底有啲辣味，椰香味重，汤唔会好「确」喉，而且味道浓郁得来又够香，所以以呢个价钱来讲都可以接受。$62一碗连冻饮，可以一战～