起鍋 (已結業)

今日嚟湾仔做嘢，晏昼约咗喺附近返工嘅朋友食个 quick lunch。拣咗友人提议嘅呢间「起锅」，餐厅晚市主打火锅，而午市就有粉面饭套餐等供应。店舖装潢别致，走怀旧复古风，由门口嘅七彩灯笼、铁闸、邮箱，以至室内嘅布置和摆设，每个角落都充满心思，啱晒同朋友嚟影相打卡！我哋点咗两个餐，泰式鸭髀河、香叶肉碎煎蛋饭，同一客手工饺子，跟餐 free 罐装汽水，+$12 可转泰式奶茶、青柠梳打或三色冰。先尝泰式鸭髀河 ($88)，汤底味道唔错，入口浓郁鲜甜，水准甚佳。鸭髀大大只，啖啖肉，皮与肉中间有层薄薄嘅油脂，鸭味非常香浓。河粉比平时见惯嘅阔身，入口滑溜好吃！另外呢客香叶肉碎煎蛋饭 ($68)  卖相亦很吸引，白饭伴以香叶、豆角爆炒嘅肉碎，配上切得细细嘅小辣椒，辣辣地，超开胃，加埋只煎蛋一齐食，真系冇得输。手工饺子 ($16)：饺子 3 大只、外皮薄滑，内里塞满香叶肉碎馅，入口清香不腻。下次经过会再嚟试下其他一人餐。