爵樂印度餐廳

营业中

休息中

今日同朋友行街前想食印度菜，喺尖沙咀揾到呢一间印度餐厅，之前嚟过呢幢大厦几次，但系一直都冇留意过佢。原先我哋谂住散叫几款咖喱，上到去餐厅员工同我哋讲原来晏昼有buffet食，计埋加一$207一位，每人仲有两杯嘢饮。除咗buffet嘢食可以任添之外，唔同口味嘅印度薄饼都可以无限叫，同朋友计过数咁样抵食过散叫。整体食物质素符合预期，香料味好浓郁。因为预咗咖喱要配饭或者薄饼，所以就咁单食会偏咸，但系加咗薄饼之后就啱啱好。值得一赞系佢个薄饼真系好好食个底够脆，个面够软，每层酥中间都有空气，唔系实的的𠮶种薄饼。虽然个价钱唔系特别平，但系平时香港冇乜机会食印度菜，一个价钱可以食匀晒唔同款式，鸡、羊、海鲜、素菜、豆、烤鸡、咖喱角样样都有，仲有沙律、甜品、生果，其实计落都几抵，啱晒咩都想食少少，纯粹过口瘾嘅我哋。餐厅环境舒适干净，一出䢂口有个泰姬陵设计嘅框，装修几有心机。最值得一赞系呢度嘅员工同平时印度餐厅员工比较真系有善好多，老细广东话仲非常之流利，完全冇沟通嘅困难。