怕羞草 (已結業)

最近知道亿利工业中心入面新开咗呢间Mimosa Pudica，呢日就嚟试试。入口附近摆咗怕羞草，同店名首尾呼应。入面环境唔错，窗上面嘅小鹿玻璃贴好梦幻呀！餐垫嘅树林图案，都几有特色。台上面嘅橄榄油黑醋樽既可以用嚟做装饰，又有实际用途。佢哋午餐价钱由七十几到百几不等，下午茶就由四十几至八十几左右。我叫咗份午餐，先嚟嘅系番茄沙律，除咗番茄之外仲有牛油生菜、紫生菜、紫椰菜、樱桃萝卜，蔬菜爽脆，配埋芝麻酱几开胃。周打海鲜汤，入面有唔少蚬肉、鱿鱼同切粒西芹等等。跟埋嘅牛油蒜蓉多士烘到脆脆哋，用佢蘸汤食都唔错。纽西兰西冷牛扒配马沙拿烧汁，伴碟有烧茄子、意大利青瓜、西兰花同薯蓉。西冷扒煎得香口，食起嚟唔会太浓又啱啱够味。我仲加多咗份Tiramisu，口感软绵都算讨好。蝶豆花梳打，呈渐变紫红色，味道唔浓，以卖相取胜。