Little Tipsy Restaurant & Bar (已結業)

住观塘既好处就系美食多箩箩，而且通常要捐窿捐罅先有惊喜。话说有日阿妈去平时去开𠮶间汇丰，发现楼上竟然有间西餐厅。今晚就应阿妈要求，去呢间西餐厅食个晚餐。上到嚟，装修几靓，有个酒吧。呢度夜晚冇set，要散叫。我哋叫咗一个前菜，一个主菜，一个伴菜，同埋一个甜品。焗北海道带子配蟹肉（$108）非常唔错呀，带子大大粒又够弹牙，配左菠菜加蟹肉，味道有所提升。杂菜沙律（$58）有火箭菜、罗马菜、番茄仔等等，无点加沙律酱，系健康既！美国牛柳配澳洲龙虾（$298）牛柳系超好食，肉质鲜嫩多汁，5成熟左右，容易咬，牛味各样都保持得好好。龙虾相比下就失色喇，肉质唔系好弹牙，亦唔算多肉。朱古力心太软伴雪糕（$68）心太软系热既关系，所以上面球雪糕黎到已经溶紧，一叉个心太软，反而系雪糕流落黎先，心太软入面就反而比较干身，不过互补作用，最后效果都唔错啦。甜度适中，加上粒粒红梅，作为一餐既终结。呢度星期六晚都几热闹既，加上播住啲up beat流行音乐，朋友聚会可以放肆倾到兴高采烈，都唔怕比人话！