廚魔 (已搬遷) 新店位置

好多时听到分子料理，总系会联想到啲古灵精怪嘅食物，有啲似旧式素菜馆，用斋嚟模仿猪肉牛肉鱼肉，唔知点讲，个感觉总系怪怪地。如果带住呢个谂法帮衬厨魔梁经伦嘅Bo Innovation，你会有惊喜。毕竟，一间米芝莲两星餐厅唔可以冇一定嘅食物质素。一餐晚餐食落嚟，你会讶异餐厅嘅心思，由餐厅嘅装修、布置、摆设，每一道菜唔同嘅餐具、洗手间嘅布置、播放嘅音乐，以至餐后提供俾客人攞返屋企嘅怀旧糖果同明信片，都紧扣𠮶餐嘅主题 "Remembering Hong Kong"。至于晚餐菜式，有十几道，每道菜嘅份量都唔算大，唔使惊食唔晒。总体感觉，前菜比主菜出色，食物味道唔错。叫得做分子料理梗系好多食物都系估你唔到嘅，当然有啲人会话，要食炸猪大肠同肠粉嘅味道，不如去深水埗食真嘅好过啦。不过我谂梁经伦系想用分子料理一次过做啲昔日香港小食俾人欣赏，讲得大啲，就系对「狮子山下」精神嘅致敬。