Starry Night (已結業)

嗌咗个二人套餐，头盘拣咗凯撒沙拉同埋苹果沙律，呢两个沙律个摆盘都几靓，凯撒沙律啲沙律菜极度新鲜，个沙律汁带有淡淡嘅芝士味，面包粒又烘得够脆，夹埋面头一片片嘅芝士，新鲜好味。而苹果沙律都唔错，夹埋啲提子干一齐食，口味独特。另外散嗌咗一个水牛城鸡翼，一向都好钟意食水牛城鸡翼，贪佢个酱汁酸酸甜甜辣辣，呢度个水牛城鸡翼完全满足到我，个酸辣程度掌握得啱啱好，外皮又炸到脆卜卜，正。套餐嘅猪鞍扒改咗牛扒，由于系二人份量，块牛扒又厚又大，初时仲惊佢会唔会因为厚所以会好韧，但系点知入口极度嫩滑，我平时通常食开五成熟既，今日因为就朋友所以嗌熟啲，势估唔到佢七成熟肉质都有咁嫩，牛味又够，简简单单落少少盐同埋黑椒经已无敌。朱古力布朗尼，呢个甜品系今晚一大惊喜位，估唔到呢间餐厅连甜品都咁出色，布朗尼个口感做到烟烟韧韧，唔会话好似出面其他餐厅咁整到成个莎莉蛋糕咁实的的，加埋𠮶球雪糕同埋曲奇饼碎一齐食，呢个甜品被我地秒杀。