WIRED CAFE (已結業)

去咗美丽华广场二期地库，呢层好多都系服装店，入面仲有间用湖水蓝同黄色做主题嘅WIRED CAFE。餐厅啲梳化位摆咗唔同造型嘅咕o臣，几得意。虽然无任何遮掩，商场嘅游人可以轻易睇到餐厅入面嘅情况，不过𠮶日人流唔多，都算舒服嘅。呢度仲有自助嘅Detox Water提供，不过要惠顾某啲套餐先可以享用。我哋呢次只试咗轻食同饮品，杂莓吐司上面铺咗唔少鲜士多啤梨、蓝莓同红桑子，同埋淋咗士多啤梨酱，卖相吸引。我原本以为只系普通嘅吐司，切开之后先发现佢哋用嘅系多层兼松厚嘅丹麦方包，质感就好似牛角酥同方包嘅混合体，而且焗到外层酥脆，中间就吸满牛奶吉士之类，食起上嚟软绵湿润，有啲面包布甸嘅感觉，甜味亦唔会太高。不过因为面包太厚，所以都几饱肚。炸洋葱圈，拎到嚟时热辣辣。炸皮算薄脆，入面又唔干身，可以蘸埋两款酱咁食，唔觉唔觉就食晒喇。Lychee Sangria，佢加咗切粒红苹果、青苹果同橙，都几清新。Blue Lychee Fruit Tea，用咗蓝莓点缀，由杯嘅侧面睇系带啲红、紫嘅渐变色，入面嘅鲜西瓜同菠萝切得几大粒。饮起嚟荔枝味唔太突出，但酸酸甜甜兼有淡淡茶香，感觉讨好。