ZENTRO (已結業)

今日喺上环放工，超肚饿，就喺威灵顿街度揾餐厅食饭。上咗呢间zentro，呢间餐厅主打用备长炭嚟整串烧，原来备长炭有净化空气嘅功能～环境几雅致，座位都几多，空间咁阔落。我哋两个人食到好饱饱，超满足。而家等我逐一介绍边样野系一定试㗎啦！前菜就叫咗一碗蘑菇汤，超级creamy，仲有少少黑松露味，超级足料！如果钟意饮蘑菇汤一定要试！仲有我嘅至爱鹅肝多士，鹅肝入口软滑，多士超级松脆！真系谂起都流晒口水，好想再食啊！主菜就叫咗蟹肉意粉同黑松露带子意大利饭，份量都好多。蟹肉意粉超多蟹肉！其实佢本身系长通粉，不过咁岩冇晒，所以转咗做意粉。黑松露带子意大利饭，啲饭外软内韧，超creamy! 带子都好大粒，超厚肉，仲有成三粒咁多！！仲有呢个澳洲顶级安格斯腹心肉，肉质鲜嫩，最正嘅系佢个酱汁！串烧我哋就叫咗鸡肾、白鳝同鸡肉！串烧嘅份量唔会好多，唔会好饱肚～ 鸡肾爽脆香口。白鳝肉质细嫩，好厚身，好多汁(我自己本身超钟意食鳝，所以一定要食尽周围嘅白鳝串，呢度嘅白鳝真系值得一试！）、鸡肉都几大块，上面搽嘅酱汁味道好match！服务员态度有礼，我地超级肚饿，上菜速度超快，值得一赞！