影片
更多
2014-06-20
16436 浏览
靓靓妈咪有一班靓太好友，每星期都会约出黎午聚，为求增加新鲜感，每次都会拣选不同餐厅。由于auntie们个个「入得厨房，出得厅堂」，对食自然系好有要求，聚餐时经常都会研究新食谱同食府，当中亦不乏外地o既食肆。靓auntie当中有几位系澳门o既常客，除咗得闲会玩两手，最爱就系尝美食，每次去完定必详尽报导；踏入马年，佢地其中一位就提议组团过大海，去佢地一致裁定为全澳最正o既名中菜厅「8」度食好野，实行「八」一「八」 ！小肥听见都已经流哂口水，当然系唔会玩怕羞啦，第一时间就问准auntie们可否拉埋表妹一同参与，嘻嘻，细佬喺度写得食评即系话有份去啦 ！我地一行十二人，乘坐早上十一点钟船，中午十二点前已经泊岸，由于澳门入境处人手足，效率高，港人无需填表，十分钟内就办妥好手续，真系话都冇咁易。计划周全o既领队auntie一早安排好专车接送，团员唔洗担心要揾的士，一到步就有车坐，加上马路上车辆不多，交通毫不挤塞，十二点半左右就到达新葡京酒店。「8」系新葡京酒店o既中餐厅，楼面高，设计装潢华丽，门面一串串o既「8」字连环扣耀眼闪亮，踏入餐厅门口同步入酒店大堂一样，都可以感受到𠮶种无形o既气派。
我地一行十二人，乘坐早上十一点钟船，中午十二点前已经泊岸，由于澳门入境处人手足，效率高，港人无需填表，十分钟内就办妥好手续，真系话都冇咁易。计划周全o既领队auntie一早安排好专车接送，团员唔洗担心要揾的士，一到步就有车坐，加上马路上车辆不多，交通毫不挤塞，十二点半左右就到达新葡京酒店。
「8」系新葡京酒店o既中餐厅，楼面高，设计装潢华丽，门面一串串o既「8」字连环扣耀眼闪亮，踏入餐厅门口同步入酒店大堂一样，都可以感受到𠮶种无形o既气派。食客必需行上几级，穿过一道以自动门开关o既「金鱼走廊」先入到餐厅大堂；正当大家不断赞赏地上游黎游去o既电子金鱼如何生动时，步出走廊𠮶一刻，发觉大堂中央摆设著o既落地水晶灯饰、天花挂著o既玉环吊饰，以及墙身o既金鱼刺绣，𠮶份震撼感足以令靓太们仪态不顾地哗声四起 。
餐厅用红色为主色，哈，同个餐厅名「8」真系夹 。Auntie们留意到餐厅虽然地方大，但系啲枱唔会排到密麻麻，位于中间o既散座全为高高o既皮櫈，舒适得黎好有私人空间。
餐厅内每一扇门都系自动开关，洗手间内o既所有配备亦同样地全为电动，客人出入洗手间或餐厅都无须触碰任何不洁之处，我地十二个人都对「8」奇高o既卫生意识水平印象都好深刻！小肥更因此次经历为以后o既食评重新定下新o既卫生分标准 。
「8」除咗格调高雅贵气，酒店级服务亦显专业。太太们一进场，几位服务生随即每人送上櫈架，以拱摆放手袋衣物之用。见客人安顿好行装，高高瘦瘦o既靓女姐姐就续一为我地奉上热茶、滚水，最惊喜就系喺客人面前表演魔术 ，变出湿巾（请看下图），既新颖又卫生！
澳门通auntie曾多次于「8」用膳，深知除咗必需要预先订座之外，有几款菜式如「原只乳猪焗饭」都一定要预留，今次亦做足功夫，为团友们订咗两只，谂住咁美味，食剩都可以包走 。唔知澳门通auntie会唔会系VIP呢，定亦或系因为我地订咗乳猪饭o既原固，坐底冇耐，两位经理非常好客地续一同我地打招呼，派咭片之余，亦不忘介绍镇店点心及小菜；叫𩠌依个重大责任，我地当然系交比团队中o既澳门常客啦！值得细佬喺度赞o既系经理o既细心体贴，虽然我地叫o既食物大多以点心为主，佢都好乐意地印制多份餐单，比我地攞返屋企作为参考及纪念，好等女士们有一个美好o既回忆 ！
Amuse-Bouche之柚子鲍鱼，彩椒猪爽肉（估计系免费赠送 ，不过由于帐单唔轮到小肥睇，所以不能作实）：以鲍鱼作为前菜，如果真系免费赠送的话，「8」真系好慷慨 ！鱼形匙羮上除咗有两片鲍鱼之外，原来底部有层薄薄o既柚子啫喱，鲍鱼爽口鲜甜，啫喱清凉醒胃；鲍鱼旁o既彩椒猪爽肉带丁点儿辣味，入口醒神，配上底层o既雀巢一齐食，口感更觉香口爽脆，食后大家都越来越期待接住落黎o既菜式！
蟹肉小笼包（$60），蓝天使虾金鱼饺（$60）：可爱o既蓝天使虾金鱼饺同门口条「金鱼走廊」及墙身o既金鱼刺绣好相衬 ！金鱼饺层外皮烟烟韧韧，冇想像中咁厚，做得好出色；其内涵亦非常丰富，经理哥哥解释话，每件金鱼饺内都有一只New Zealand o既蓝天使虾，出名爽口弹牙，事实亦的确如此 。蟹肉小笼包外表虽然不及金鱼饺吸引，但味道绝不比其逊色；小笼包皮薄又juicy，入面o既馅肉质极为松软，而且咬落一啲都唔肥腻，点上黑醋又能特显蟹肉o既鲜甜味，正！
香煎琵琶燕盏（$68），脆香叉烧包（$45/笼）：香煎琵琶燕盏，即燕窝盏，煎香咗o既外皮又薄又香又脆，最重要系唔会食到成口油，而且燕窝馅份量足，味道清香得黎完全唔觉淡，可惜其不大出众o既外貌只能轮为碟中o既配角。
一众auntie离远见到一碟碟o既刺猬叉烧包已经情不自禁地赞叹其趣致o既外形，哈，原本无意拍照o既长辈们最终都要用智能手机影返几幅比自己啲孙仔睇 。师傅不但有心思，而且仲好有心机，因为据经理哥哥所讲，叉烧包上o既每一条刺都系由师傅续一拉出 ，少啲功夫同时间都唔得。再者，「8」o既脆香叉烧包同外间o既叉烧包造法有几点不同：第一，叉烧包不但经过蒸制，同时亦要被煎煮，所以其底部奇脆无比，香口非常；第二，叉烧包馅中加入咗梅菜，味道香浓而不浊；第三，叉烧包层刺猬外皮经过搓揉及拉制，质感较为软熟，而且冇咁粗糙。刺猬叉烧包美观又美味，精彩得令人眼界大开，拍案叫绝 ！
竹笙鱼圆：Auntie话中国人食饭一定要有汤水先够滋润，所以就应经理哥哥o既推介，叫咗依款竹笙鱼圆豆腐羮。哗，师傅将豆腐切成千丝万缕o既幼丝，不但尽显其精湛o既刀功，豆腐羮中o既三粒鱼圆更加系一绝！由桂鱼所打制而成o既鱼圆外皮犹如蛋白般幼嫩滑溜 ，鱼圆心却又能质感弹牙，好得意。碗中爽脆o既竹笙同鱼圆本身冇味，同火腿及瑶柱味浓o既豆腐羮好夹，以甜甜o既杞子加以点缀更觉清润，妙呀！
田园杂菜伴南瓜汁：一向对菜反感o既XO仔尤其讨厌菠菜，因为只要食一口，条脷都会嚡哂 ，好唔舒服；好奇怪，「8」所烹调出黎o既菠菜一啲都冇令细佬条脷有所不适，妈咪唔讲真系唔知自己食紧菠菜 ！菠菜不但唔嚡脷，味道同底层o既红萝卜丝一样咁甜，个人觉得配上香滑o既南瓜汁有种中菜西食之感，赞 ！
至尊京都肉排：京都肉排看似平凡，但原来内有干坤！炸制o既外层超薄超脆，食落仲以为自己食紧春卷咁，去咗骨o既肉排肉汁丰厚，肉质好似层层叠o既火腿卷般，整体劲松化。
鲜腐竹银杏炒时蔬：讲真，小肥喺一餐饭入面毫无怨言地食咗成碟菜已经好难得，所以见到一碟沉闷o既白果腐竹西兰花，胃口顿时大减，最终亦选择比菜后表妹搞掂 。表妹食后感想：「腐竹好腍，西兰花同白果就好脆，厨师用果干调味有啲西化，不过效果唔错，因为腐竹喺口内散发出阵阵果香，感觉新奇有趣。」
桂瑶鱼翅炒米粉：桂瑶鱼翅炒米粉其实系由桂花翅所演变而成，前者主要少咗蟹肉同芽菜，但系就加插咗瑶柱同米粉，价钱亦相对地较便宜 。捞入鱼翅o既新竹米粉炒得好够干身同好够松，不过最靓就系面层o既瑶柱粒；瑶柱干炸到好似薯片咁脆，而且香口味浓，夹住米粉一齐食，唔需要多余o既调味已经好美味！
原只乳猪焗饭：请留意，原只乳猪焗饭必先预订，Auntie订咗两只，不过我地十二人当日都只系食得落一只。如相所示，饭系放入乳猪内所焗制，饭粒软绵绵得黎非常入味，包住焗饭o既乳猪亦都唔输蚀，皮脆肉嫩，香口野味 ！
炸龟苓膏之龟兔赛跑：XO仔燥底，所以好多时都会食龟苓膏清热，夏天涷食、冬天热食，就连涷食龟苓蛋都试过，就系未听过龟苓膏可以炸黎食 ！
热辣辣o既炸龟苓膏外脆内流心，伴碟o既兔仔棉花糖香甜软熟，乌龟莲蓉酥松脆得黎又唔会过甜，三款都各具特色！
值得一赞再赞o既系「8」o既厨房班底，一再证实创意果真系无限，喺炸龟苓膏o既同时亦不忘加插一段龟兔赛跑o既小插曲作为伴奏，犹如划龙点睛般精彩 ！（注：始终炸制食物属热气食品，所以建议热气o既朋友都系食返非炸制o既龟苓膏。）
葡挞，奶茶（免费赠送）：「8」o既葡挞可以话系小肥喺港澳食过最正宗o既葡挞，简直可以同肥肥家族两年前喺葡萄牙始创葡挞𠮶间Pastéis de Belém店舖食过𠮶啲比美 ！（http://travel.openrice.com/traveller/reviewdetail.htm?reviewid=9086）千层酥皮葡挞每层都好够薄，而且毫不油腻，叠起上黎松化香脆，轻轻喺蛋馅上洒上焦糖粉、云尼拿粉及朱古力粉加以调味，认真滋味无穷，再配上杯香滑浓郁o既奶茶就仿如神来之笔，清香怡人，写意舒畅 ！
埋单每位五百大元，中西合璧o既菜式不但高质，造形亦极之创新及吸引，当中更包括有鱼翅、燕窝、鲍鱼，太太们都大赞抵食！除咗食物水准高，服务生态度诚恳，「8」对其环境、气氛、装饰、卫生亦非常讲究，我地十二个人都食得好满意，小肥更准备每次游澳将「8」列为必经之站添 ！
张贴
