百福麵家

营业中

休息中

为咗自己嘅健康，我决定逐步减少我嘅食量。第一步就系每日嘅午饭或晚饭食粥或者食面。是日食晏我就决定食面，嚟咗澳门咁耐，都未食过认真好味嘅面，无论系名气大嘅(如黄枝记)，又或者系名不经传嘅，冇一间可以令我留下深刻嘅印象。有阵时要食好嘢都要讲吓缘份，好食嘅嘢可遇而不可求。今次嚟到呢间「百福」，唔知有冇食神呢？行到去门口，发觉玻璃窗上贴满多种信用卡招纸，心谂「食面啫，唔驶碌卡咁大阵像啩」，好彩坐低打开餐牌之后，见到部份菜色啲价钱都唔系话太贵。思前想后，我嗌咗个云吞搭牛腩筋汤面。云吞方面，用嘅系鲜虾，虾嘅鲜味唔系太丰富，但肉质都算爽滑；牛腩筋比我想像中炆得腍，就算系肌肉部分都可以一咬就开，但不知为何牛味冇一般咁浓，唔通用咗梳打粉整松啲牛腩？面条都系同「黄枝记」一样，唔够扎实，唔弹牙，一咬就散晒。如夹硬要海军斗水兵，我觉得「百福」稍为好少少。 呢碗面一啲都唔平，要成廿七蚊一碗。以咁样嘅价钱，我梗系唔敢推荐俾大家啦！