知道大家過時過節當然想食好啲慶祝下，不過如果Budget有限嘅話，不如考慮轉食自助午餐或者半自助午餐？雖然嘢食選擇可能會少啲，但唔少酒店餐廳喺午餐時段一樣有表演一樣有聖誕氣氛，最緊要嘅係又比自助晚餐平啲，慳返筆錢買聖誕禮物就可以豪啲啦。
同Chocolate Rain食「蠔」啲 悅來酒店咖啡室
荃灣呢間酒店今年聖誕唔單止同本地設計品牌Chocolate Rain合作，自助餐仲以蠔做主題，由新鮮美國太平洋生蠔到鵝肝紅酒汁焗蠔同煙肉蠔卷等，夠「蠔」氣！Chocolate Rain Fans記得留肚食得意Chocolate Rain 聖誕繽紛啫喱樂呀！
供應日及時間：2016年12月24日至26日 及 31日 (12:00 - 14:30)
環球時令美食加持 The Market
尖沙咀呢間自助餐廳口碑一向都唔錯，加埋呢個聖誕以環球美食做主題就更加吸引！除咗應節嘅美式傳統聖誕火雞同蜜糖燒火腿，仲有時令嘅手切意大利火腿、滋補五蛇羮、泰式明爐浸三色魚等。食埋聖誕主題嘅甜品例如聖誕布甸或者朱古力樹頭蛋糕，Sweet住過聖誕。
供應日及時間：2016年12月24日至27日 (11:45-14:30)
早午餐任食6個鐘 forte
雖然唔少自助午餐時間都比較鬆動，但可以食足6個鐘又係另一個講法！觀塘呢間餐廳嘅半自助早午餐時段足有6個鐘，無論你係大胃王定係要不斷相機食先嘅Foodie都實夠時間。而且十幾款主菜都有板有眼，包括御前虎大蝦伴黃油春雞同及芝士焗龍蝦伴美國牛柳等。
供應日及時間：2016年12月24日至27日 (11:30 - 17:30)
夢幻聖誕童話森林 儷廊咖啡室
而家相機食先，就算去食自助餐都要講主題。九龍城呢間酒店餐廳以火焰. 雪國. 聖誕森林嚟做主題，火焰熱盤代表有荔枝木煙燻聖誕火雞同火炙波士頓龍蝦黃金燒等，而雪國冷盤就有綠茶煙燻鮑魚等，而聖誕森林系甜品當中最吸睛嘅就係3D童話旋轉木馬能呢個甜品平台！
供應日及時間：2016年12月24日 (12:00 - 14:30) 及 25日至26日 (11:30 - 15:30)
主題樂園抵食半自助午餐 海龍王餐廳
如果聖誕節會去海洋公園玩嘅話，就可以去佢地呢間餐廳到嘆個抵食半自助午餐啦！唔單止有非常應節嘅聖誕火雞燒肉車畀大家任食，甜品仲有自助聖誕曲奇工作坊，DIY自己嘅薑餅人最啱相機食先。埋單都係$368(成人，需加一服務費)，主題樂園嚟講CP值唔錯。
供應日及時間：2016年12月24日(11:00 - 14:00) 及 25日至27日 (11:00 - 15:00)
試勻世界聖誕美食 Three on Canton
香港人鐘意食自助餐，其中一個原因就係想試勻哂唔同國家美食，尖沙咀呢間酒店餐廳就集合咗傳統聖誕火雞、燒豬配意大利飯、火腿芝士墨西哥卷、車厘子配希臘芝士、俄羅斯沙律等美食。當然亦唔少得新鮮海鮮同嘅款聖誕甜品啦。
供應日及時間：2016年12月24日至26日 (12:00 - 14:00)
*另有下午茶自助餐 2016年12月24日至25日 (15:00 - 17:00) 及26日 (15:15 - 17:00)
任食海鮮半自助午餐 City Art Restaurant
唔少人去食自助餐都鐘意食海鮮，貪其回本夠快又唔會太飽肚可以食幾Round，咁沙田呢間酒店餐廳嘅節日任食半自助午餐就啱哂啦。除咗三款主菜任揀，最緊要有個自助海鮮吧畀大家任食即開生蠔、藍青口、冰鎮海蝦等多款凍盤，最後食多件即叫即製香煎鵝肝，大滿足。
供應日及時間：2016年12月24日至26日 (12:00 - 14:30)
開飯編輯推介：
1. 【專訪】「我喜歡堅持 我只得堅持」 新入圍米芝蓮法式泡芙店谷底反彈
3. 10月份好評餐廳十強
熱門文章推介：
3. 精選芋圓甜品舖PK戰
隨時接收最新資訊
讚好OpenRice專頁！
