近幾年興起食Semi-buffet，畀一份主菜多啲嘅價錢可以任食沙律前菜同甜品，無論係細食嘅女士定大食嘅男士都一樣滿足。開飯仔就幫大家搵咗呢五間每人Semi Lunch Buffet收費$300有找嘅餐廳，搵日好好Hea返下回個氣！
九龍灣任食日本菜 鳴門割烹料理
相信唔少人都有食日式放題嘅經驗，但日本餐廳做Semi-buffet就真係比較少。呢間餐廳逢星期六、日及公眾假期都會有呢個90分鐘半自助午餐，12:00-2:00入座起計90分鐘，可以任食刺身、壽司、串燒、沙律、和食同飲品。而主食就每人任選一份，想回本嘅話推介食三色丼，上面有海膽、三文魚子同拖羅蓉，大大碗又鮮味十足！
銅鑼灣靚海景西餐 Alto
無錯，繼鋸扒指南之後，銅鑼灣呢間餐廳再次成為開飯仔嘅情侶搵食推介，皆因有靚海景又有抵食Semi Buffet真係唔多見。餐廳每日都會供應限時兩個鐘嘅Lunch Buffet，可以選擇任食前菜、沙律同甜品，或者加埋牛扒、漢堡、意粉等其中一款主菜。沙律吧款式多，色彩繽紛又開胃。而主菜就可以一試佢地嘅足料漢堡。
銅鑼灣酒店多國菜 協奏坊西餐廳
同樣位於銅鑼灣，呢間酒店餐廳嘅Lunch Buffet（12:00-14:30）同樣抵食。自助餐枱上面嘅沙律、小食、湯、熱盤、甜品同雪糕都係任食，甜魔仲可以試下用佢地嘅自助班戟機整熱辣辣迷你Pancake。而主菜會定期更換，通常都會有齊西式同東南亞菜選擇。雖然食物味道未到令人眼前一亮，但勝在選擇多而水準平均。
更多【二人前指南】： |
元朗驚喜西班牙菜 Iberico & Co.
圖：au9
入到元朗想慢慢Hea返下嘅話，呢間西班牙餐廳絕對係其中一個好推介，皆因佢地逢星期一至五可以由11:30食到15:00，星期六、日及公眾假期甚至可以由11:30食到16:30！Menu定期會定期更換，不過都係會有任食沙律、冷盤、小食同湯，再加意粉、扒類或者西班牙飯等主菜選擇。唔少食家都話主菜分量偏細，不過有特色小食搭救，都算幾抵食。
觀塘有情調美國菜 Manhattan Grill & Bar
圖：朱麗莎
呢間餐廳夜晚有唔少人會去食生蠔，但其實佢地午市個Semi Buffet都幾抵食。每日11:30至15:00供應，任食嘅包括各式沙律、冷盤、湯同甜品，而主菜方面平日同星期六日或公眾假期嘅選擇會有唔同，不過都係以意粉或扒類等大路種類為主，驚喜唔大。室內環境有情調，亦有戶外座位畀大家同陽光玩遊戲。
文：Cathy
