當葵廣嘅小食店愈開愈多嗰陣，旺中嗰邊都唔弱，呢個月已經又有幾間新店開咗，有以饅頭漢堡作招徠嘅，有做串揚物嘅，仲有啲係主打12吋長嘅韓國窩夫同手工調製嘅靚靚飲品……

手打牛肉饅頭漢堡  The Beef & Leaf



呢間試業咗幾日嘅舖頭，Fusion味極重，將中式饅頭溝埋西式漢堡嚟做饅頭漢堡，中間啲餡都好新奇下，包括咕嚕、沙爹同芒果都有。漢堡用嘅係澳洲牛，每日新鮮手打，厚厚der好有質感，連埋酸酸甜甜嘅咕嚕汁一齊食係超juicy的說。店主亦推介法式野菌饅頭漢堡，用咗4種菇菌整㗎。



但數到最吸睛嘅一定係芝士流心蛋饅頭漢堡！睇住師傅喺個burger中間開窿再落隻蛋落去，然後蓋埋返芝士一齊煎！邪惡到呢！食嗰陣，蛋汁肉汁熱溶芝士都一啖食晒，係食得「呢hea」少少，但係鹹鹹香香咁好好食呀。

比起一般漢堡，塊包換咗做饅頭就更加吸汁，而且饅頭軟熟得嚟，咬落又煙煙韌韌，每個都係即叫即整，價錢都只係38蚊至48蚊左右，又食得飽算係幾抵食。



另外仲有隻牛葉船，可以話係牛魔王必試！用牛近ribs嘅部分，煎到大約三、四成熟就切開再加上炸蒜粒，超腍身，同埋好juicy。配埋蘑菇汁同辣汁食，開飯仔試過晒兩隻汁之後，覺得蘑菇汁同牛肉更夾，點得太多辣汁反而有機會搶咗啲牛味。



嘢飲方面，有三青兩紅一白，三青即係薄荷葉、青瓜同青檸梳打；兩紅就係洛神花茶，而一白就生熟薏米水，三款都有美顏嘅功效，食完啲邪惡嘢飲返杯感覺平衡返啲嘛。

負責人話遲下準備進駐葵廣㗎喇！仲會有季節限定嘅醬汁同配料！好期待！



The Beef & Leaf
地址：旺角彌敦道688號旺角中心一期1樓F87A號舖

串揚物  串得喜



呢間店主要係做串揚物嘅，望下個menu最吸引嘅係龍蝦尾！龍蝦係嚟自加拿大嘅波士頓龍蝦，拆肉再炸。配青瓜汁食又幾夾。上碟嗰陣原條龍蝦尾放埋喺度，用嚟呃like幾有效！炸到脆卜卜係幾香口，不過龍蝦略嫌韌咗少少啦，唔夠爽。



另外黑松露海膽炸帆立貝同炸溏心蛋都係必食之選。前者賣43蚊，可以一次過食到晒3種高級嘅食材，而且海膽冇苦味都算係咁，可惜黑松露味太香，蓋過咗其他配料嘅味。而隻炸溏心蛋就真心好食，半熟嘅程度剛剛好，外層炸到脆一脆，而且炸粉又唔會太厚，平衡得幾好。師傅話係因為佢哋選用比坊間一般用開更幼細嘅麵包糠呀！

串得喜
地址：旺角彌敦道688號旺角中心1樓FK1A1


12吋長嘅韓國窩夫  Nun Asia

基本上只要你行過呢間舖，都一定會畀佢擺晒出嚟嘅窩夫sample吸引你停低望一望，因為都堅係浮誇呀，條條窩夫都勁長，仲要勁多配料/醬喺面，啲款式都幾特別呀！至少我就未食過炸雞窩夫嘞。另外梗係唔少得長期人氣高企嘅芝士、抹茶、朱古力同紫薯等等，窩夫以外仲有小食食。

全部都係即叫即整嘅，要畀啲耐性等下呀……紫薯窩夫真係超紫薯㗎，逐層同你數！窩夫上面係紫薯忌廉，之後有紫薯醬、紫薯蓉同埋紫薯粉，所以味道嚟講係好濃郁嘅，紫薯控會好開心。而窩夫就偏扁身，都脆口嘅，但略嫌太重蛋味，同上面嘅紫薯唔算太夾。BTW，無論你諗住叫邊款味都好，認真，一條12吋真係太長喇（特別如果叫紫薯、芝士或者炸雞嘅真係會超飽），一個人好難食得晒，最好搵多幾個friend一齊食啦。但如果你真係得自己一個人行過又好想食，有半條揀㗎。

Nun Asia
地址：旺角彌敦道688號旺角中心1樓F84號舖

手工調製飲品  Healahoma



而另一間嘅新店，其實就喺窩夫店隔兩個舖位，之但係嗰個area仲係裝修緊，如果唔係特登行入去望，就會miss咗嘅。呢間賣嘢飲嘅，重點係每杯都係即場手工調製，同埋個look好靚，仲有得揀樽添呀。想平少少就可以要膠杯，但如果想靚啲，畀多10蚊就可以揀玻璃樽，仲可以拎返屋企循環再用。



暫時有4款靚靚嘢飲，叫sunset、forest、flaming同blue Monday，嗯，講完個名都唔知咩嚟嘅。簡單介紹下啦，全部都係用生果調製嘅mocktail嚟嘅，有啲就用咗菠蘿、有啲就用咗哈蜜瓜、檸等等，特別講下杯blue Monday啦~ 好似好多人都鍾意藍色飲品咁。呢杯係用藍柑橘、橙、檸檬等等酸性比較重少少嘅生果嚟調製嘅，飲落酸得嚟又幾fresh！

Healahoma
地址：旺角中心1樓86A


文、相：Kar
片：Cathy、Kar


其他新店介紹：
韓風吹到嚟 浮誇鮮果沙冰店生果成座山咁高（有片）
全港首間churros專門店本月開張 變身日系churros衝擊味覺
遊日必食人氣蜜瓜包 登陸銅鑼灣開分店！


 

隨時接收最新資訊
讚好OpenRice專頁！