知你怕麻煩，所以唔洗再Download咁多嘢，喺OpenRice app頂部就可以輕鬆轉換地區！
人氣雞飯 天天海南雞飯
圖：晴朵拉 & bobo_gang
新加坡旅遊局曾經選出全新加坡最好食嘅三大雞飯店，包括有文華酒店嘅Chatterbox同文東記，不過今次開飯仔要推介嘅，就係同樣正宗好味但價錢最相宜嘅天天海南雞飯！佢地嘅香飯名副其實：充滿油香！甚至有食客話淨食香飯都非常滿足。雞肉亦相當嫩滑，配埋獨家調製嘅醬料，無得輸。所以每日都有唔少人嚟排隊。
秘製喇沙 結霜橋叻沙
圖：sugarcat & spherepiece
就算係夏天熱辣辣熱辣辣好熱好熱嘅時候，喺新加坡無冷氣嘅熟食中心，依然有唔少當地人無懼炎熱要嚟食一碗惹味嘅喇沙。咁你就知道喇沙有幾大吸引力啦！呢間小店仲堅持用炭爐嚟煮湯底，比較重椰奶味，亮點係鮮甜嘅螄蚶，令成碗喇沙生色不少。加埋旁邊嘅秘製醬汁同面頭切成絲嘅喇沙葉，更添風味。
香辣湯底 松發肉骨茶
圖：Encandy & yummymich
另一星馬必試名菜，肉骨茶嘅種類主要分為三種，今次介紹嘅松發肉骨茶係屬於中藥味比較輕，重胡椒香味嘅潮州派。排骨大塊得嚟，因為煲得夠耐，用筷子一夾就會骨肉分離，而肉質綿密。湯底重胡椒香味之餘唔係得個辣字，而係保留排骨嘅豬肉味。如果同行朋友完全唔食得辣嘅話，可以另外點一份滷豬腳，皮彈肉嫩一樣好味。
鑊氣十足 源記鮮蛤炒粿條
圖：leo1701 & FoodieFC
炒粿條係潮州嘅小食，即係香港人叫嘅炒貴刁（粿條嘅潮州話音譯），所以炒粿條同廣式嘅乾炒河有異曲同工之妙。所以鑊氣非常重要，有鑊氣先炒得出一碟乾身鬆軟嘅粿條。呢間小店就符合要求，炒出嚟嘅粿條鑊氣十足。建議點加咗黑豉油嘅黑粿條，將黑豉油嘅鹹、豬油渣嘅香、鰤魽嘅鮮融為一體，一樂也。
炭燒沙爹 舊榜鵝沙爹
圖：CEIL JOVEN & monsoon
雖然就咁食沙爹串未必食得飽，但喺熟食中心裡面，呢個可能係最能夠滿足到食肉獸或者重口味朋友嘅選擇之一。呢間沙爹店有兩點特別懷舊，一係沿用炭燒，火候控制得宜所以肉質有咬口；二係呢度嘅沙爹醬唔係普通沙爹醬，而係加入菠蘿蓉嘅菠蘿沙爹醬。加咗一份清新嘅菠蘿沙爹醬最適合拎嚟點豬肉串，雞肉或者羊肉串亦相當出色。
鮮甜魚湯 瑞記(家嫂)魚頭米粉
圖：sugarcat & cheesemafia
首先要說明一下，呢間店嘅消費會比上面介紹嘅貴少少，不過食完之後你就會覺得物有所值。新加坡唔少美食嘅調味都比較重，想食返Light少少就可以嚟食碗魚頭米粉。呢間係唔少新加坡人嘅至愛，原因在於佢地嘅奶白色魚湯鮮甜得嚟，魚肉仲Keep到彈牙，唔會煮到太爛。
新加坡嘅熟食中心，有唔少小店都有公休日，而且比起香港嘅餐廳都要遲開早收。事先Bookmark哂所有心水餐廳，隨時隨地要睇資料都咁方便！
文：Cathy
隨時接收最新資訊
讚好OpenRice專頁！