每年新春拜年，最頭痛嘅莫過於揀賀禮。今個新年，或者大家都會減少聚會，不過都可以搵機會為你珍惜嘅家人、親友送上貼心嘅禮物，畀佢哋感受到你嘅溫暖同祝福。開飯仔都為大家搜羅咗唔同範疇嘅賀禮建議，有輕食、麵食或者茶酒等，總有款啱使。

YOKU MOKU 雪茄蛋卷/曲奇

對於一眾掛住日本嘅朋友仔，呢幾款由日本直送嘅賀年禮盒，一定係最佳嘅新年禮物嘞。雪茄蛋卷係佢哋嘅人氣招牌，以北海道牛油製作，喺鐵板上烤製，牛油味特別香濃，口感鬆脆。特別介紹「賀年雜錦曲奇蛋卷禮盒」，除咗有呢款招牌蛋卷外，仲有兩款全新口味嘅曲奇，分別係雙層朱古力夾心宇治抹茶味曲奇，同雙層朱古力夾心焙茶味曲奇，兩者茶味突出，前者甘香後者幽香，加埋微甜朱古力餡，人見人愛。

望月 雜錦曲奇/脆脆系列

呢個品牌嘅月餅一向都有好多粉絲，嚟到新年佢哋都推出咗唔同嘅賀年曲奇禮盒，例如經典口味雜錦曲奇禮盒、日本茶口味雜錦曲奇禮盒同埋脆脆系列等。經典口味包括有伯爵茶、雙重朱古力同杏仁曲奇，全部由紐西蘭牛油製成，口感鬆化。脆脆系列則選用法國朱古力Valrhona，配鬆脆脆米創出柚子、黑朱古力同紅桑子三款口味。朱古力嗰款更係今年新出嘅，帶有莓果、堅果等香味。

Valérie 雙重芝士酥條

抹茶控對於呢個品牌絕對唔會陌生，今個新年可以試下佢哋其他嘅烘焙食品呀。金裝雜錦禮盒就有齊招牌蝴蝶酥、曲奇同新產品：雙重芝士酥條，夠晒豐富。雙重芝士酥條相當脆口，以帕馬森芝士同車打芝士製成，鹹香芝味十足得嚟又有少少辣辣地幾過癮，原來係仲有加埋西班牙微辛煙燻紅椒粉。5款曲奇口味則包括牛油、抹茶、伯爵茶、朱古力同咖啡味。

甄沾記    椰子花生糖/椰露蛋卷/椰子糖禮盒

呢個本地1915年創立嘅椰子糖品牌今年一口氣推出三款新禮盒！椰絲花生軟糖禮盒有獨立包裝嘅椰絲花生軟糖，花生香氣同椰子甜味好夾！椰露蛋卷及椰子海鹽糖禮盒就有香脆椰露蛋卷同熱賣嘅椰子海鹽糖，最後椰子糖禮盒就有齊五款口味，從經典嘅椰子軟糖、椰子硬糖，到椰子海鹽糖、椰子海鹽軟糖，到椰子薑糖應有盡有。全部都無添加防腐劑或人造色素，而家去銅鑼灣皇室堡一樓嘅Pop-up店就買到喇。
 

Paul Lafayet    首創Cookirons

呢個六角形嘅金牛迎春禮盒，打開有三層架，驚唔驚喜？意唔意外？第一層係品牌首創嘅Cookirons，顧名思義即係將曲奇同馬卡龍混合，加入香甜嘅馬達加斯加雲呢嗱忌廉做餡，啖啖甜到入心。第二層有三款特色口味嘅法國精緻糖果，包括Weiss 精選朱古力、牛奶榛子朱古力同開心果杏仁鳥結糖；至於第三層則係别注版金牛陶瓷碟，係收藏家嘅至愛。每個禮盒仲會附上一套十個嘅限量版利是封添，送完即止。

moono    新春純素禮盒

呢個本地純素甜品品牌今年再度推出純素禮盒，以傳統全盒為概念，裡面有四款甜點小食：桂花烏龍黑朱古力雪球、100%海苔白芝麻脆片、「山楂」琥珀糖、黃金千層脆條，前三款仲係無麩質！「山楂」琥珀糖其實係用車厘子同豆蔻製作，顏色同味道都似返細細個食嘅山楂餅。黃金千層脆條就用自製純素牛油製作，口感酥脆。
 

微熱山丘  新年旺來禮盒

台灣微熱山丘嘅招牌土鳳梨酥大家可能都食過，佢哋今年就推出旺來餅。唔單止賣相改為有層層鳳梨花瓣嘅圓形，裡面除咗經典土鳳梨果醬，仲特別加入柔滑嘅奶黃，少少鹹香更帶出土鳳梨嘅酸甜！點解個名係旺來餅？原來因為鳳梨台語諧音係「旺來」，旺來餅就可以象徵新嘅一年好運旺來！
 

鮮芋仙 冷凍芋圓

人氣甜品店首次推出外賣冷凍產品——冷凍芋圓。100%台灣手工製作再直送香港，一盒有4款芋圓，包括細細粒嘅芋圓、地瓜圓，同埋大粒啲仲有餡嘅芝麻餡紫薯圓同芋泥餡芋薯圓，份量都幾多下，最啱一家人開心share。煙煙韌韌，內餡唔算太甜，芝麻濃香。新年食湯圓時一齊食，都幾滿足。

Schoggi Meier 招財貓咪曲奇/90% 濃黑金箔松露朱古力

喺香港自設廠房嘅朱古力品牌，採用瑞士原材料Couverture 100% 可可脂朱古力製作，每粒手工朱古力都非常香甜幼滑。鍾意dark chocolate嘅朋友仔，送90% 濃黑金箔松露朱古力畀佢哋就最啱，口感輕盈，內餡軟心，入口即溶，食落有種幸福感呢。而曲奇則以可愛嘅招財貓做包裝，榛子曲奇充滿果仁香，伯爵茶曲奇茶味香濃。

Lady M   新春糖果禮盒

每個女生聽到都會變心心眼嘅呢個品牌，出親嘅禮盒都一定勁靚，呢個新年禮盒當然都唔例外。粉紅色嘅五角形禮盒，打開晒啲格仔就好似一朵盛開嘅花咁，無論咩年紀嘅女性收到都實冧。內有6款賀年糖果同朱古力，款款造型精緻，例如有鮮甜多汁嘅大桔柑橘軟糖、士多啤梨金牛軟糖、粉紅杏仁朱古力同榛子夾心朱古力等。每個禮盒仲會附送同一系列嘅新春手抽袋，同 8 個相襯利是封。

Oisix 仙貝禮盒/金箔蜂蜜蛋糕

冇得飛日本買手信都唔使愁嘅，香港都可以買到東京手信。兩款仙貝禮盒都好有日本手作嘅感覺，分別以江戶摺紙同東京和服做主題，內裡嘅仙貝全部人手製作，脆卜卜，係送禮嘅輕裝之選。至於大家都好鍾意食嘅金箔蜂蜜蛋糕，則換上新裝。牛年，就變咗做牛牛造型，好cute呢~ 原味同抹茶兩款口味嘅蛋黃味同樣濃郁。

當文歷餅店 紅棗柑桔年糕磅蛋糕  

當文歷餅店最鍾意將港式嘅飲食文化加入西式甜品中，而今年佢哋推出首個農曆新年蛋糕，以粘糯嘅年糕作為靈感，將年糕嘅軟糯口感加入蛋糕中，再加入甜蜜嘅紅棗同清新嘅糖漬柑桔，令蛋糕食落甜而不膩。新一年，新意思，收到呢個咁有創意嘅蛋糕一定好驚喜！

回味 x 南山園   抹茶·焙茶蛋卷

呢個本地蛋卷品牌今年亦同日本抹茶名家南山園聯乘，推出香港限定嘅抹茶·焙茶蛋卷禮盒！南山園1935年創業，出產嘅抹茶連續三年獲得最高金賞受賞。蛋卷用到嘅抹茶同焙茶粉都從日本直送，加上新西蘭牛油、頂級麵粉同鮮蛋，喺自家工廠沿用自家秘方製作。抹茶蛋卷茶香自然、帶甘香，焙茶茶香更突出、味道微甜討喜。全線菁雲、誠品書店、city'super有售。
 

Luna Cake  巴斯克蛋糕   

Luna cake 將日系甜品嘅手藝加入傳統巴斯克蛋糕做法，令蛋糕更濃郁。而佢哋最近推出期間限定嘅可愛貓喵造型巴斯克蛋糕，蛋糕採用澳洲頂級忌廉芝士同日本雞蛋，用料上盛、口感濕潤綿密，加上得意造型，吸引到爆，男女老幼都適合，用嚟送禮就啱晒，同三五知己或者一家人分享「芝」味又得～

經典麵食

香港維港凱悅尚萃酒店 x 雙喜粉麵廠   蝦子麵賀年禮盒

位於北角嘅呢間酒店，聯乘同區嘅老字號麵廠，推出蝦子麵賀年禮盒。每個禮盒內有兩種口味，粗幼麵都有。瑤柱蝦子麵由原粒瑤柱同一級蝦子製造，味道香醇突出；鮑魚蝦子麵亦啖啖鮮香，麵質爽滑。兩款口味都唔需要特別加啲咩調味料，湯底已經好濃郁啦，而且煮兩分鐘就食得，夠晒方便。

大囍慶   瑤柱花膠麵

另一間本地製造嘅麵廠，同樣推出多款新年禮盒。佢哋嘅麵食堅持無添加，唔加味精、防腐劑同鹼水，但麵條依然保持爽彈口感。幾款禮盒包括有、經典蝦子粗麵、黃金蛋XO醬撈麵、吉品鮑魚麵及富蠔撈麵等。平時食開嘅蝦子麵通常都係幼身，而呢間嘅係粗麵，更有口感呢。但講到矜貴就一定係瑤柱花膠麵喇，製作時喺麵條中加入乾花膠同瑤柱，食嗰陣仲可以食到一絲絲瑤柱添，即刻升咗幾個lvl。

茶酒類

FORTNUM & MASON 茶罐套裝

呢個英國著名茶葉品牌，買嚟送畀一眾茶葉迷就最啱數。其中專為農曆新年設計嘅茶罐套裝，就集合咗品牌最受歡迎嘅三種散葉茶：經典伯爵茶、皇家茶同埋下午茶。想再豐富啲嘅，就可以選擇農曆新年禮盒，除咗有茶飲外，亦有多款品牌自家嘅輕食，例如Piccadilly凝脂奶油餅乾、伯爵茶餅乾等。

Tea WG   福建春露

呢個茶葉品牌亦有唔少忠實粉絲，佢哋每逢節慶都會有新品推出，2021年新春系列茗茶中，就有款新嘅限量版福建春露，茶葉細嫩翠綠，仲散發出陣陣嘅天然蜂蜜、茉莉花香同埋雪松木餘香，清新怡人。

軒尼詩  新年限量版

身邊總有親友係酒迷，送酒畀佢哋就實冇錯。軒尼詩推出咗兩款新年限量版，分別係紅紅紫紫嘅V.S.O.P，同埋火紅帶金嘅X.O，由當代藝術家劉韡創作。 淨講個包裝已經好值得收藏，加上酒香醇厚，層次豐富，一定得到酒迷歡心。

大亞洋酒 匈牙利貴腐甜酒

酒都有好多款嘅，如果親友鍾意啲甜度高啲嘅酒，不妨考慮Oremus Tokaji Aszú 6 Puttonyos 2006 匈牙利貴腐甜酒。呢款酒甜酸度平衡，既有新鮮檸檬香，亦有烤杏仁、橙皮同奶油糖果等味道，可以單獨飲用。如果做pairing嘅話，配搭水果類甜品、鵝肝或者芝士都相當夾。

重要優惠

另外，即日起凡經OpenRice購買賀年食品嘅餐飲券，輸入優惠碼【CNY200】，滿HK$200即減HK$40，輸入優惠碼【CNY500】，滿HK$500即減HK$120！優惠名額有限，先到先得，額滿即止。
（詳情按此）

文：Kar
相：Kar、Tom Li