大部分人對於喺中環搵食嘅印象，不外乎都係「貴」同「迫」，但如果細心觀察，都可以從中搵到更多人情味同文化價值。大館近排，就以「日安時刻」作為展覽主題，發掘中環社區嘅午餐文化，從包伙食、行政午餐、快餐、同鄉會等方面一一呈現「中環日常」。

 日安時刻展覽

 行政午餐展區

 同鄉會展區

除咗館內嘅展區外，多間餐廳亦都因應今次嘅展覽提供相應嘅套餐，畀大家一齊細味中環文化，今次就介紹其中兩間先~

同鄉會 江南名菜   奧卑利

香港有唔少同鄉會，大家同宗同族同鄉，感覺特別親切，其中有唔少都聚落喺中環一帶。奧卑利雖然唔係同鄉會，但就承載住江南地區嘅飲食文化，甚至引照當地家宴古風設計菜式，呈現當地風味。

今次佢哋特別為「日安時刻」呢個展覽設計咗兩款set lunch，由前菜、小籠包、主食到甜品都有。當中不乏上海經典名菜。

 酒糟蛋、陳醋紅蜇頭

使用加飯酒同酒糟醃製兩日嘅酒糟蛋相當入味，酒香味甚濃，仲甜甜地添。陳醋紅蜇頭口感爽脆，濃郁嘅醋香味道酸酸的。

 灌湯黑豚肉小籠包

小籠包可以話係餐廳嘅招牌菜之一，有多款新穎嘅味道，而套餐內嘅則係灌湯黑豚肉小籠包。熱辣辣嘅小籠包皮薄多汁，肉味鮮甜。

 清炒河蝦仁

至於呢碟清炒河蝦仁望落雖然好似好清淡，但其實相當考功夫。師傅以傳統方式烹調，河蝦洗乾淨後必須，係必須要抹去所有水份，令每粒蝦肉更易入味。而落鑊酒溫亦非常重要，太熱唔得太涼都唔得，眼明手快先至唔會過火。每一步微細嘅步驟都唔能夠忽視，先可以炒到呢道上海傳統菜式呢。

 午巿套餐 Set A部分菜式：奧卑利酒糟蛋、香干馬蘭頭、陳醋紅蜇頭、灌湯黑豚肉小籠包、清炒河蝦仁、干扁肉鬆有機四季豆、嫩雞煨麵

 午巿套餐 Set B部分菜式：十五年花雕醉雞、天白菇烤麩、灌湯黑豚肉小籠包、東坡肉、魚湯鮮茄浸時蔬、上海菜飯

地址：中環大館賽馬會藝方2樓

行政午餐 點心拼盤 The Chinese Library

中環貴為香港嘅金融中心，多間高級餐廳自然應運而生，行政午餐既要得體，亦要簡便。想一嚐呢區嘅行政午餐，可以嚟到位於大館01座1樓嘅The Chinese Library。餐廳設有室內及室外座位，開業以嚟致力為各式中菜添加創意。

  點心拼盤配紅/白酒

今次呢個點心拼盤，就要喺室外用餐位置先可以享用。坐喺長長嘅吧枱，望住大館園內景色品嚐呢份精緻嘅午餐，加多杯紅/白餐酒都只係需要 $158，中環價值都可以係悠然自得嘅。

 黑松露蝦餃、賽螃蟹鱈魚餃、羊肚菌水晶餃

三層嘅點心拼盤，包括有三款蒸餃、兩款酥物，同埋一件港式蛋撻。打開最頂層嘅蒸籠，三款造型精巧、顏色鮮艷嘅蒸餃非常吸引眼球，分別有黑松露蝦餃、羊肚菌水晶餃，同埋最有特色嘅賽螃蟹鱈魚餃。三款餃皮都煙煙韌韌，餡料豐富。黑松露味突出，羊肚菌小清新，而賽螃蟹鱈魚餃帶有淡淡魚香同蛋香，仲相當滑口。

 黑椒和牛酥、魚香酥芋盒、懷舊酥皮蛋撻

中間嗰層係黑椒和牛酥同魚香酥芋盒，前者外脆內軟，後者嘅芋蓉口感軟綿。最底一層係懷舊酥皮蛋撻，以滿滿嘅蛋香嚟結束呢個午餐都唔錯。

地址：中環大館01座1樓

「日安時刻」展覽詳情：
日期：即日至2020年2月8日
時間：上午11時至晚上8時
位置：中環大館01座複式展室
更多詳情：http://bit.ly/37u1auF