仲煩惱緊聖誕假去邊度食好嘢？開飯仔搜羅咗一系列特色聖誕大餐畀大家，間間都好吸引，快啲睇吓邊間啱心水！

7道葡萄牙菜聖誕晚市菜單 Casa Lisboa Gastronomia Portuguesa  

擁有15年歷史嘅葡萄牙菜，由葡萄牙主廚Rodolfo Vicente主理，堅持帶嚟正宗地道嘅葡萄牙美食。今個平安夜同聖誕節推出7道菜葡萄牙聖誕晚市菜單，以5款前菜揭開序幕，鮮甜嘅紅蝦他他配牛油果、青蘋果同木蜜瓜，味道清新作為開胃菜好合適；慢煮砵酒豬面頰搭配菠菜蓉，肉質鮮嫩，酒香濃郁。主菜方面推介葡萄牙紅蝦蟹肉海鮮飯，加入滿滿鮮甜海產，超鮮味；香煎鯛魚配奶油Murganheira檸檬醬，鯛魚嘅油香配上檸檬醬啱啱好。壓軸甜品包括迷你葡撻配紅莓雪葩、砵酒煮梨及香橙布甸配櫻桃醬同銀杏酒，香甜又層次豐富。

供應時間: 2024年12月24日及25日，分為6:00pm及8:30pm兩節

經典聖誕歌劇晚宴 Casa Sophia Loren  

呢間位於灣仔和昌大押嘅餐廳推出咗經典聖誕歌劇晚宴，唔單只有多道正宗意式美食，仲有現場歌劇表演，氣氛爆燈！前菜方面有大衛赫維生蠔配紅石榴沙冰，新鮮爽口；意粉部分唔好錯過雜錦海鮮貝殼意粉配海膽及檸檬皮，鮮味同檸檬香超match。主菜都一樣精彩，有烤龍蝦配法式小圓扁豆湯及栗子同油封鴨腿配薯蓉、小西蘭花及紅莓醬，而甜品則有充滿節日感嘅聖誕麵包配意式沙巴雍，同埋清新嘅意式雪酪飲Sgroppino～

供應時間: 2024年12月24日及25日

米芝蓮一星印度菜 CHAAT

聖誕節又點可以少咗一餐豪華又有驚喜嘅大餐？米芝蓮一星印度餐廳由主廚Gaurav Kuthari用心打造，帶嚟獨一無二嘅印度美饌體驗。平安夜推出嘅聖誕晚餐由頭盤到甜品都展現咗印度料理嘅精髓，餐單以魚子醬生蠔脆球作開胃菜，鮮味十足；之後嘅虎蝦咖喱伴小餐包鮮甜多汁，配搭軟滑嘅黃油麵包，層次豐富。主菜阿瓦迪火雞咖喱混合小荳蔻、丁香同茴香嘅香料，香料味恰到好處；黑松露香飯用印度香米同羊肚菌製作，香氣撲鼻。最後仲有聖誕布丁雪糕作甜品收尾，濃濃節日氣氛為聖誕晚餐畫上完美句號。

供應時間: 2024年12月24日

六道菜聖誕嚐味套餐 Arcane  

主廚用心挑選優質嘅時令食材，展示當代歐陸料理嘅精髓～六道菜聖誕嚐味套餐由日式茶碗蒸開始，嫩滑嘅蒸蛋搭配蘑菇高湯果凍、酸奶油、鱘魚魚子醬同烤藜麥，細膩而充滿層次。麵包蟹配上細緻嘅檸檬蛋黃醬提升鮮味，而經典招牌菜自家製意式薯糰嘅節日版本更加升級！薯糰柔滑細膩，搭配濃郁嘅羊肚菌醬、巴馬臣芝士同黑松露，每一啖都係享受。慢煮和牛牛臉頰滲透住濃郁肉香，甜品雲呢拿白酒燴香梨香甜又充滿酒香，搭配特製嘅聖誕布丁雪糕同金寶奶酥就更豐富！

供應時間: 2024年12月23日及24日

節日分享套餐 BÀRBAR

呢套節日分享套餐嘅菜式多樣又精緻，包括經典嘅伊比利亞黑毛豬火腿同風乾伊比利紅椒辣腸，開胃一流；再加上清新又惹味嘅Rusa薯仔沙律同香口嘅鱈魚炸丸子，滿滿西班牙風味。主菜方面有烤去骨牛肋條，肉質鮮嫩；墨汁西班牙海鮮麵同升級版龍蝦墨汁西班牙海鮮麵，兩款都超鮮味。如果想再增添奢華感，餐廳亦設有限定黑松露菜單，乳鴿燴飯搭配鵝肝、西班牙蛋餅及芝士蛋糕都刨上黑松露薄片，味道即刻升級，完美體驗黑松露嘅獨特滋味！

供應時間: 整個12月

節慶限定鐵板燒 MINATO

精緻嘅日本料理食府為迎接節慶，特別推出一系列限定菜單～如果你係鐵板燒愛好者，呢個11道菜嘅 《椿》菜單絕對唔可以錯過！餐單嚴選來自海陸嘅高質食材，包括鱈場蟹、南非鮑魚同A5宮崎和牛，而和牛嘅烹調方式仲可以揀薄燒或者厚燒，完美滿足唔同口味需求。想體驗沉浸式嘅日式懷石料理嘅話，《菊》菜單就係你嘅首選。當中包括香濃嘅海膽醬燒鱈場蟹腳、嫩滑嘅A5宮崎和牛牛柳厚燒以，以及清香撲鼻嘅魚湯脆米泡飯，令你全情投入日本料理嘅極致享受。如果鍾意壽司同刺身，餐廳仲提供兩款每日限量嘅節慶限定菜單，鍾意日本料理嘅朋友唔好錯過。

供應時間: 2024年12月15日至2025年1月15日晚市時段

文：Yanica
編：Cathy