唉，執下又一間，執下又一間……其實，快餐店曾經都算係香港人嘅最愛，啱beat吖嘛。香港生活節奏急速，個個開口埋口都係話「唔使急，最緊要快」，快餐店由搵位、嗌餐、食完走人，快嘅15分鐘內都搞得掂，絕對符合效益。想當年，香港嘅快餐店都有好多選擇㗎，而家就同你重回那些年，重溫其中經典嘅5間！
Wendy's
圖片來源：蘋果日報、Westonchurchill（香港討論區）
同Burger King一樣，Wendy’s都曾經兩度進出香港。最初佢哋係叫「得意妹」先嘅，後尾再回歸嗰陣先叫「雲狄斯」。雖然點望個logo個妹妹都唔得意，any肥，主打漢堡嘅Wendy’s最令人懷念嘅，反而係佢嘅芝士薯格同洋蔥圈，呢兩樣嘢係就係好鬼熱氣，但炸到脆一脆咁實在係好難抗拒！仲有仲有，有個配料自助吧，茄汁同芥辣鍾意幾多就攞幾多，一定唔怕唔夠汁，塊塊薯格都搽到成塊均晒都得！可惜，其他同類型快餐店攻勢太強，06年之後都冇咗影嚕。
陽光一代
圖片來源：動感墳場
80後對陽光一代應該最有共鳴！陽光一代喺沙田新城巿廣場嘅舖頭，有大大塊透明嘅玻璃櫥窗，裡面有個師傅喺度表演轉Pizza，細個去親新城巿廣場都一定要去睇，望住師傅將啲麵粉搓下搓下，用一隻手指喺度轉轉轉，轉到成個車轆咁大，真係好好睇，企好耐都唔肯走！睇完有得入去食嘅話，一定係嗌菠蘿火腿Pizza，又多菠蘿又多火腿，10蚊食到飽，抵到呢！不過後嚟公司轉型，轉搞學校飯盒同埋波仔飯。大部分嘅80後喺中、小學時期應該都會食過佢哋嘅飯盒，ABC餐有飯有意粉同埋有小食揀嘅，不過，啲味道就……年年都希望學校下年轉供應商，或者可以容許學生出街食飯囉。
雅香園
圖片來源：VCRCommercial 廣告頻道截圖（Youtube）
雅香園係一間專賣粥麵腸粉嘅中式快餐店，喺80年代大受港人歡迎，佢哋嘅廣告仲搵咗Beyond嘅黃家強幫手拍㗎，識唱嘅一齊唱：「逢親食指郁，見到食指動，一指指去雅香園」~ 舖頭外牆都有大大隻形態動感嘅手，表示食指大動！呢間快餐仲係24小時營業㗎，喺當時嚟講絕對係飲食業嘅先頭部隊。不過，後嚟好似話餐廳衛生程度唔太好，搞到結業收場。
東東雲吞麵
圖片來源：OpenRiceHK、VCRCommercial 廣告頻道截圖（Youtube）
東東雲吞麵嘅前身其實就係雅香園，大約80年代嗰陣開始崛起，同佢個廣告「大大大大大」講嘅一樣，啲麵又平又大碗，不過，價錢同味道通常都係成正比嘅，所以……淨係求果腹嘅話都係唔錯嘅選擇。不過喺云云咁多碗麵之中，炸醬麵同黑椒牛柳絲炒麵算係亮點，基本上每次去幫襯都係嗌呢兩款。BTW，發哥齣《吉星拱照》都喺呢度拍㗎提一提返！
哈迪斯
圖片來源：eternity80、搵黎緊係食啦
咁多間消失咗嘅快餐店嚟講，香港人對哈迪斯應該係最有感情啩，06年執晒到而家，都依然耐唔耐就會傳出佢哋喺香港重開嘅消息，唔知呢個大家都期待嘅畫面會幾時出現呢？哈迪斯嘅炸雞的確好食得嚟唔同啲，炸出嚟唔會有食油嘅感覺，皮脆肉香，仲有炸薯圈同蘑菇飯，仲有真係用大大個炭爐整嘅炭燒漢堡扒……唉，不要再說了.jpg，講到我而家好想食呀！
回憶簿裡嘅快餐店愈嚟愈多，香港人行得快食得快唔緊要，希望呢啲回憶唔好消失得太快啦！
文：Kar
隨時接收最新資訊
讚好OpenRice專頁！
