愈嚟愈接近5月17日開飯熱店大賞的日子喇，今次特種開飯團同大家睇睇新餐廳呢一組。每一年都有唔少新餐廳上場，可惜突圍而出嘅只有十位最強嘅新人！睇返入圍名單，新餐廳種類都幾多元化，有甜品、西餐、拉麵等等，可能大家會覺得奇怪，點解老店佳佳甜品都會上榜？其實因為店鋪搬遷，所以就列入成為新店喇。以下新餐廳你又有冇試過呢？
過江龍抹茶王 中村藤吉
圖：中村藤吉可以話係帶起香港抹茶瘋嘅始祖，有幾人氣唔使多講！呢間Mira Mall分店雖然只做外賣，只有芭菲、軟雪糕等選擇，不過憑住穩定水準而成為抹茶王。
足料中式糖水 佳佳甜品
圖：佐敦開業年的甜品老店，連續兩年獲米芝蓮街頭小食推介，因為店舖加租被迫搬遷，但仍然無損受歡迎程度。招牌作有芋蓉蓮子西米露、寧波薑汁湯圓同芝麻糊，真材實料而且樸實無華。
廣島辛辣拉麵 霸嗎拉麵
圖：來自廣島嘅霸嗎拉麵，長期有排隊人龍！全日本超過30間分店，主打濃厚豬骨湯底，由日本空運抵港，保證味道忠於原著，亦有辛辣、雞湯底等唔同選擇。
創意港式小菜 肉餅哥小炒料理
圖：港式小炒抬頭！呢間荃灣小店由肉餅作為主打，有成32款蒸肉餅，好似花膠肉餅、原隻龍蝦肉餅及帆立貝黑松露肉餅等等創意之作，價錢抵食又大份，係街坊心目中嘅Number 1!
大熱空氣梳乎里班戟 PAN de PAIN Pancakes & Sweets
圖：而今年最受歡迎嘅甜品呢，一定係梳乎里班戟莫屬！呢間來自沖繩嘅過江龍，一直人氣高企，梳乎里班戟整得鬆軟有空氣感，輕盈不膩，唔怪得咁多女仔鍾意食嘅。
人氣海鮮九層塔 九重鮮
圖：記唔記得舊年大家一窩蜂咁去食嘅海鮮九層塔呢？因為可以食到海鮮原汁原味，所以大受歡迎，呢間餐廳都可以講係九層塔嘅代表！雖然而家熱潮已經減退，但都仍然有唔少人幫襯。
風味貴陽麵食 十二味貴陽牛肉粉
圖：呢間餐廳就厲害喇，由一間小小嘅麵店，到今日有火鍋、小菜館等多個品牌。貴陽牛肉粉好有地道風味，牛肉濃郁充滿香料味道，辣勁十足，仲有涼麵、豬手麵等其他麵食。
日籍老闆拉麵居酒屋 浜滝
圖：拉麵店仲有呢一間由日本人主理嘅小店，主打拉麵同埋居酒屋小食，必試招牌自家製黑蒜湯底，亦有濃厚醬油湯底、蝦湯底等不同選擇。食到半路可加入燒熱嘅火山石，保持湯底熱辣辣。
灣仔抵食泰菜 新泰東南亞餐廳
圖：泰國菜不嬲都受香港人歡迎，九龍城就多，偏偏港島好似冇乜邊間特別標青，除咗佢！雖然都係賣大路菜式，不過味道做得正宗，而且亦唔算太貴，環境舒服，因此成為泰菜代表。
鹿主題工廈西菜 Deer Kitchen
圖：樓上café雖然唔及以往咁hit，不過呢一間位於觀塘工廈入面嘅新餐廳有唔少人捧場。裝修以鹿做主題，菜式選擇豐富，而且每道菜賣相靚亦有水準，薄餅、意大利飯都係招牌作。
文：Perrins
開飯熱店大賞網站：https://www.openrice.com/info/awards2017/index.html
