【開飯熱店大賞賽前睇】九龍城區長勝將軍力爭九連勝

大戰當前，幾隻為食貓聚埋一齊喺度論戰，估下賽果咁。餓底貓發現地區組別入面，有一個區喺過往8年都係由同3間餐廳稱霸！不過今年其中一間並唔喺入圍名單內，即係話，最少會有一個新面孔出現喇。唔怕話埋你知，呢區係九龍城區。大家都知呢區好多好嘢食㗎啦，戰況睇落都幾激烈。唔知已經連續拎咗8年嗰兩間餐廳可唔可以繼續成功爭取「九連勝」呢？

Garrett Popcorn

Photos by bageladdiction

嚟自美國芝加哥嘅爆谷名店，啲爆谷口味愈出愈多，原味以外仲有牛油、芝士、朱古力、焦糖、果仁等等，離遠都聞到嗰陣香氣，係好想食多幾粒，再食多幾粒……嘅。

越南麵包

Photos by eat_eat_everyday

越南嘢同麵包分別都成日有機會食，但兩者合體，越南麵包就好少食到喇。麵包餡都有好多選擇，咖喱牛腩又得、扎肉豬耳仔肉加辣椒蘿蔔絲青瓜絲等等又得，咦？咪即係平時粉麵啲料？咁特別，係有啲睇頭嘅。

時新快餐店

Photos by natfoodiary_

長勝將軍之一，呢間紅磡小店賣嘅漢堡多汁又厚身、薯條大份，又平又抵食，係學生哥同窮忙族嘅恩物呀，今年應該都有啲機會再下一城啩。

諾亞半熟蛋糕專門店

Photos by erika5kit

半熟芝士蛋糕瘋靡全城，呢間嘅cake仲可以做到流心狀態，當然能夠喺九龍城咁多間餐廳之中都喺入圍名單之內佔一席位啦。

Simplylife Bakery Café

Photos by piggy16

歐陸風café，門口經常都大排長龍，無他嘅，pizza意粉麵包西湯樣樣都喺水準之上，特別啲麵包係自家製作嘅就更加難得。

清真牛肉館

Photos by Vannie

長勝將軍之一，係呢區超過30年嘅老字號，以料多汁多嘅牛肉餅而聞名，又真係幾難挑戰到佢嘅地位嘅。

EXP

Photos by Sonata.J

打開餐牌有好多意大利粉、意大利飯、意大利薄餅等等，總之就成間都好意大利，其中最受歡迎嘅一碟菜帶子墨魚忌廉汁意粉，賣相黑麻麻，但蒜香味好濃呀！

School Food

Photos by carol.tsangns

新派嘅韓式餐廳， Carbonara年糕、烏卒卒飯卷、媽咪麵沙律……樣樣嘢都好似好新奇，樣樣嘢都好似係必食咁。

ICONIC H 特色熱狗店

Photos by shell_we_eat

熱狗嚟講，呢間餐廳都幾多花臣。喺一個包一條腸中間，加咗無限嘅可能配搭，又熱熔芝士又黑松露蛋又鴨肝又鰻魚咁，要食幾多次先可以食晒咁多種味？

eyescream and CHURROS

Photos by chowsmall.food

一條churros玩到出神入化，砌到個形靚一靚，仲可以自己揀味，揀完churros嘅味又可以揀埋雪糕味，又呃到like又滿足到食神。

文：Kar

開飯熱店大賞網站：http://tiny.cc/op_2016

隨時接收最新資訊
讚好OpenRice專頁！