無論喺屋企定Office都要長備零食嘅各位零食控，想知有咩新出零食，同時又怕中伏？2023年開飯仔繼續幫大家行勻便利店、超巿、零食店、啤酒舖等，第一時間開箱試食！
12月22日更新
7-SELECT x 蓮香樓 豬肚燒賣／魚翅餃／芒果夾心慕絲蛋糕／白桃夾心牛奶慕絲蛋糕
銷售點：7-11
今次便利店聯乘百年懷舊茶樓蓮香樓，畀大家回味豬肚燒賣同魚翅餃，兩款餡料十足，即使叮熱都唔會令口感變得死實，亦冇油膩感。如果想配埋主食，重有大大份嘅梅菜扣肉飯同臘味糯米飯𠻹。另外兩款慕絲蛋糕則模仿Q版點心造型，「燒賣」芒果夾心相對「蝦餃」白桃夾心牛奶甜啲，但整體都唔算好甜。
白蘭氏 黑鑽護眼果凍
銷售點：7-11、萬寧
食甜品同時護眼～白蘭氏®全新推出植物性配方嘅黑鑽護眼果凍，一條條獨立包裝幾方便，食到有淡淡嘅黑加侖子味，口感Q彈。不過配方加入葉黃素同玉米黃素，建議4歲或以上嘅小朋友同大人先可以食用。
12月15日更新
卡樂 B 經典原味 / 酸忌廉洋蔥味 / 美式燒烤味薯片
銷售點：各大便利店及超巿
卡樂 B 最近推出「Potaland 系列」薯片，三款口味都係大家熟悉嘅經典口味，原味少少鹹帶出薯仔原味，酸忌廉洋蔥味聞落幾重酸忌廉香、食落就以烤洋蔥甜味為主，美式燒烤味就結合咗煙燻同烤肉香氣，三款都夠惹味。
奇華 迪士尼公主系列小食禮盒
銷售點：奇華餅家
各位迪士尼公主迷注意！呢間連鎖餅店最新推出迪士尼公主系列小食系列，包括灰姑娘、睡公主、白雪公主，同人魚公主，鐵盒分別裝住牛油蝴蝶酥、玫瑰曲奇、士多啤梨曲奇，以及紅菜頭蝴蝶酥。單獨買鐵盒得，自由組合四罐鐵盒變大禮盒亦得～
12月11日更新
DREYER’S 宇治抹茶 / 加州士多啤梨 D-COLLECTION 迷你脆皮雪糕
銷售點：百佳、惠康及各大超市，7-11（只售宇治抹茶）、OK 便利店（只售加州士多啤梨）
呢款迷你脆皮雪糕最近換上節慶限定版星空包裝，同時推出宇治抹茶同加州士多啤梨兩款新口味！每支都係 60 mL，迷你尺寸當飯後甜品都唔怕有罪惡感～宇治抹茶口味嘅茶香幾明顯，加州士多啤梨都酸酸甜甜咁，最加分配埋外面嘅朱古力脆皮都唔會太甜膩。
喜茶 HEYTEA 多肉葡萄雪條 / 芝芝桃桃雪條
銷售點：（2023 年 12 月 20 日起）7-11 及 OK 便利店
連鎖茶飲店將兩大招牌飲品：多肉葡萄同芝芝桃桃都變做雪條！兩款外層都係用冰涼清爽嘅綠妍茶冰，底部都有海鹽芝士奶蓋雪糕。多肉葡萄雪條裡面係多肉葡萄雪糕同啫喱，多肉葡萄雪糕嘅葡萄味幾自然而且唔死甜，配茶冰可以平衡甜度。而芝芝桃桃雪條裡面就係蜜桃雪糕同蘋果果肉，酸味同甜味都比多肉葡萄更突出。
agnès b. CAFÉ 無糖黑咖啡 / 低糖牛奶咖啡
銷售點：全線 agnès b. CAFÉ、百佳超級市場、7-11、指定 OK 便利店
法國生活品牌首度推出兩款限量版咖啡，標榜日本製造以及採用 100% 哥倫比亞有機阿拉比卡咖啡豆製作。紅色樽嘅無糖黑咖啡有淡淡果甜同酸香，口感輕盈易入口。藍色樽嘅低糖牛奶咖啡就多咗一陣牛奶嘅甜香，口感亦更柔滑。
BASE FOOD BASE Cookies
銷售點：HKTVmall
健康零食都可以好好食！嚟自日本嘅 BASE FOOD 新推出 BASE Cookies 系列，主打提供身體一日所需嘅 33 種營養成分，高蛋白、高膳食纖維，含有多種維他命同礦物質，而且醣分比一般曲奇低。最受歡迎嘅係椰子同抹茶味，特別係抹茶味，食多兩塊就會開始有抹茶獨特嘅回甘，而且唔太甜，非常討喜。亦有可可、伯爵紅茶同紫薯味。
Calbee JP 甜蝦濃味蝦條
銷售點：7-11
期間限定甜蝦濃味蝦條標榜採用 100% 天然甜蝦，食落感覺蝦味的確比一般嘅蝦條甜啲，蝦味都幾出。另一特色係蝦條更薄嘅麵團製成，所以幼身啲又輕身啲，不過一樣咁鬆脆。
多樂脆 爆蒜鮮蝦味粟米片 / 川味花椒雞味粟米片
銷售點：7-11
粟米片都有新口味揀～Doritos 兩款新口味聽落都幾吸引，爆蒜鮮蝦味聞落夠香，食落就無聞咁重口味。川味花椒雞味打卡就有花椒香氣，不過食落得少少辣，完全無麻感，食辣 BB 班都可以安心食。
Couverture by Multizen Sanrio Characters Chocolate Neapolitans
銷售點：7-11
身邊有 Sanrio Fans 嘅話，好啱買呢款禮盒送禮！一盒有齊 Hello Kitty、Keroppi、Little Twin Stars 同布甸狗四個角色嘅比利時片裝朱古力。裡面有 70% 黑朱古力同牛奶朱古力，後者比較甜，兩款口感都夠滑。
11月23日更新
7-SELECT x 地茂館 黑芝麻忌廉泡芙 / 黑芝麻忌廉蛋糕
銷售點：7-11
今次便利店就搵嚟開業超過 30 年嘅港式糖水店地茂館合作！將招牌黑芝麻糊變成忌廉泡芙同忌廉蛋糕。泡芙嘅黑芝麻味比較香，忌廉都相當幼滑、入口即溶。而忌廉蛋糕嘅黑芝麻忌廉就相對甜啲啲，同鬆軟嘅蛋糕平衡啱啱好。
7-SELECT x 地茂館 黑芝麻奶露 / 椰汁芋頭飲
銷售點：7-11
兩款飲品靈感嚟自黑芝麻糊同椰汁芋頭露，黑芝麻奶露用日本芝麻製成，口感順滑又保留少少芝麻顆粒感。而椰汁芋頭飲亦幾香濃，不過兩款都幾甜，建議唔好配蛋糕或者甜品飲啊。
SEVEN CAFÉ 朱古力奶油夾心餅乾 / 濃厚朱古力蛋糕
銷售點：7-11
朱古力奶油夾心餅乾以餅乾配搭朱古力奶油夾心，餅乾更以日本產牛奶發酵牛油同可可粉製成，加上砂糖顆粒非常酥脆，更突出朱古力奶油夾心嘅柔滑。濃厚朱古力蛋糕亦有好濃郁嘅朱古力香，可以試下雪凍再食，口感會有啲生朱古力咁！
7PREMIUM 朱古力脆磚 / 朱古力泡芙
銷售點：7-11
繼續朱古力系列～Bite-size 朱古力脆磚加上封口設計，最啱擺喺 Office 隨時想食就食。脆磚裡面有朱古力曲奇同原味餅乾，鬆脆得嚟又有口感層次。朱古力泡芙同樣一啖一粒啱啱好，而且一樣可以試下雪凍食，裡面嘅朱古力餡會好似雪糕咁！
7PREMIUM 朱古力法式吐司脆片 / 白朱古力法式吐司脆片 / 朱古力千層餅
銷售點：7-11
兩款朱古力法式吐司脆片都係朱古力脆皮包住用全麥麵粉烘焙嘅吐司脆片，吐司偏硬身所以都幾酥脆，不過兩款甜度亦比較高。特別係白朱古力口味，甜魔可以一戰。而朱古力千層餅係以牛奶朱古力包住威化餅、雲呢拿忌廉等，食得出層次感，不過朱古力加雲呢拿忌廉都偏甜啲啲。
瑞士蓮 特級純味可可 70%軟心朱古力 / 焦糖海鹽軟心朱古力
銷售點：7-11
兩款軟心朱古力各有特色，純味可可 70% 軟心就以朱古力嘅香醇為主，餘韻悠長。焦糖海鹽軟心朱古力就帶少少海鹽顆粒，鹽嘅鹹味會令焦糖同朱古力嘅甜味更突出，三重享受。
卡樂 B 松露味珍品蝦條
銷售點：7-11
一打開包裝就聞到松露香！食嘅時候反而無聞落咁勁，因為蝦條嘅鹹鮮香比較突出。勝在蝦條比一般嘅更粗身更脆口，配啤酒一流！
嘉頓 抹茶味夾心全麥曲奇 / 雙重朱古力味夾心全麥曲奇
銷售點：各大便利店及超巿
而家大家都更注重健康，所以嘉頓新推出嘅夾心全麥曲奇就標榜加入全麥粉、含膳食纖維、無添加防腐劑及人造色素。曲奇帶淡淡麥香而且好酥脆，兩款夾心都幾滑，抹茶味帶抹茶清香，雙重朱古力味亦有朱古力醇香，甜而不膩。
11月10日更新
7-SELECT x 蜜蜂工坊 「蜂」味「蜜」語系列
銷售點：7-11
台灣人氣品牌蜜蜂工坊首度海外聯乘！今次係同 7-SELECT 合作推出六款聯名限定款式產品～私心推介日本直送嘅蜂蜜忌廉蛋糕，蛋糕鬆軟唔太乾，裡面嘅忌廉入口有奶香再有蜜糖香，整體甜得嚟唔會太膩。蜂蜜忌廉瑞士卷嘅蛋糕都夠鬆軟、有蜜糖香，不過就略嫌裡面嘅 Butter Cream 比較膩。
蜂蜜雙層忌廉泡芙裡面嘅忌廉亦好重蜜糖香！而且 Creamy 得嚟，配搭泡芙皮一齊食唔會太 Heavy，配多杯茶或者咖啡做下午茶一流～
蜂蜜千層蛋糕非常工整，層層忌廉同班戟皮相間，用少少力就可以切得好靚。呢款係蜜糖香氣最突出嘅甜品，同時係甜度比較高嘅一款，可以搵埋朋友或者屋企人一齊開心 Share。
除咗甜品，亦有蜜糖燒雞翼，用微波爐叮熱就食得，懶人宵夜必備～帶淡淡蜜糖香，食落雞翼肉夠 Juicy，而且幾入味。
卡樂B 藤椒雞煲味薯片
銷售點：7-11
以川菜藤椒雞煲為主題嘅薯片，打開的確聞到幾勁嘅椒麻香，食落就係層次豐富嘅香料風味，少少麻、少少辣，食辣 BB 班都可以一戰。
固力果 冬季百奇朱古力 / 焦糖牛油餅乾條
銷售點：7-11
Pocky 都要轉季！冬季朱古力餅乾條外層嘅朱古力入口即溶，柔滑到有少少似生朱古力咁嘅口感，唔會死甜又有朱古力香，外面又有可可粉，最啱朱古力迷。而焦糖牛油餅乾條就甜中帶少少鹹味，層次豐富。
好時朱古力 脆窩夫柑橘味／海鹽焦糖味
銷售點：7-11
呢款朱古力窩夫走薄脆風格，硬到有少少似食緊餅乾咁，越嚼越有朱古力香氣。不過柑橘味嘅香氣就唔夠自然，要試嘅話比較推薦海鹽焦糖味。
金莎 Origins 15 粒裝
銷售點：7-11
呢盒金莎唔係普通金莎，而係一盒裡面有齊三款唔同可可百分比嘅特別版禮盒！三款分別係 50% 加納黑朱古力、65% 厄瓜多爾黑朱古力，同 80% 科特迪瓦（象牙海岸）黑朱古力，可以試齊三個地方唔同風味。
包點先生 x 蘇太名醬 麻辣系列
銷售點：百佳超級市場、TASTE、fusion
點心專門店包點先生 15 週年啦！為咗慶祝，佢哋同本地特產醬料品牌蘇太名醬合作，推出麻辣菜肉包、麻辣鮮肉燒賣、麻辣鮮蝦餃皇同麻辣馬蹄肉餅飯，全部都係微波爐翻熱就得～麻辣菜肉包混入火爆辣椒醬同涼拌麻辣醬，所以特別係襯熱食嘅時候，麻香同辣味都幾出，但又唔會蓋過豬肉嘅香氣，要讃。燒賣同蝦記都皮薄餡靚，麻辣馬蹄肉餅飯嘅肉餅幾香口，裡面有粒粒馬蹄增加口感層次。
11月1日更新
伯朗咖啡 雲呢拿雪糕咖啡風味
銷售點：7-11（優先發售）
台灣品牌 Mr. Brown 伯朗咖啡推出全新嘅「雲呢拿雪糕咖啡風味」樽裝咖啡，咖啡加上雲呢拿雪糕風味，還原 Affogato 甜品！飲落先有咖啡香，再有雲呢拿香氣，味道就偏甜啲～建議大家雪凍飲，或者倒落雪條模度自製咖啡雪條當甜品食。
10月27日更新
YOKU MOKU 雪茄蛋卷禮盒（香港周年限量版）
銷售點：YOKU MOKU
嚟自日本嘅甜點品牌 YOKU MOKU 主打雪茄蛋卷，佢哋為咗慶祝登港 10 周年，推出香港周年限量版雪茄蛋卷禮盒！禮盒設計以山茱萸花為主題，花語係「回饋與感激」，好啱送禮～裡面有 20 條原味雪茄蛋卷，口感酥脆味道香甜，配茶當下午茶一流。品牌更特別搵嚟本地藝術家 Stella So、John Ho 及 Oh Mankee 繪畫明信片，買雪茄蛋卷禮盒（香港周年限量版）就會送其中一張！
而 Like YOKU MOKU Facebook 同 Share 指定帖文，更可以免費換領香港周年限量版雪茄蛋卷兩件裝乙套（數量有限，送完即止；適用於香港全線分店）。
10月25日更新
Snickers 杏仁半糖士力架黑朱古力棒
銷售點：各大便利店及超巿
Snickers 新出杏仁半糖士力架黑朱古力棒，顧名思義少甜啲、罪惡感都少啲～一包裡面有兩塊，每塊只係 101 卡路里！選用烘烤澳洲或美國杏仁，配上焦糖醬口感煙韌帶脆。想試嘅話留意返，嚟緊萬聖節，佢哋會喺指定地方免費派發超過 6,000 份！
Snickers 杏仁黑朱古力棒免費派送活動詳情：
10月31日 (星期二) 下午2時至晚上８時 尖沙咀天星碼頭
10月31日 (星期二) 下午３時至晚上９時 銅鑼灣行人專用區
11月1日 (星期三) 中午12時至下午６時 旺角朗豪坊門口對出 （近旺角港鐵站E1出口）
*活動時間及地點有機會因應天氣及當日路面情況或有改動
KITKAT 紫薯味朱古力家庭裝
銷售點：7-11
日本版紫薯味 KITKAT 換上萬聖節主題包裝。大包裡面係獨立包裝嘅迷你 KITKAT 朱古力～紫薯味都幾出，而且食落唔算太人工 Feel，不過就真係甜咗啲，送畀小朋友就啱喇。
味覺糖 SAKERU 萬聖節蘋果味撕撕軟糖、萬聖節棒棒糖
銷售點：7-11
去萬聖節 Party 前臨急抱佛腳要買 Trick Or Treat 嘅糖，都可以考慮呢兩款～撕撕軟糖係大人小朋友都會鍾意嘅蘋果口味，棒棒糖就勝在造型得意嘛。
7 PREMIUM 綜合味爆谷
銷售點：7-11
煲劇睇戲必食爆谷嘅朋友仔，有新口味呀～今次一包有齊鹽味同焦糖味，鹽味鹹度啱啱好，焦糖味就帶少少焦香。而且口感都夠輕夠脆，一鹹一甜好易一邊睇戲一邊食晒囉。
品客薯片 章魚燒味/手羽先味
銷售點：7-11
兩款日本期間限定新口味都係日本小食，分別係關西最出名嘅章魚燒同日式雞翼風味，兩款都幾成功還原到個醬嘅味道！特別係章魚燒，食落完全就係章魚燒個汁再加蛋黃醬同少少 Wasabi，用嚟止下旅遊癮都 OK～
AFTER EIGHT 薄荷朱古力薄片/薄荷朱古力棒
銷售點：7-11
兩款薄荷朱古力新上市，一款係薄片另一款就係支裝，食落薄荷嘅清涼感都幾自然。不過老實講就算食多兩塊都覺得薄荷味唔算好突出，如果係 Die Hard 薄朱控可能會有少少失望。
麥提莎 麥提莎金脆焦糖風味朱古力
銷售點：7-11
麥提莎新焦糖口味，外層轉咗做金黃色嘅焦糖朱古力，所以食落比一般麥提莎多咗一陣焦糖同牛油嘅香氣，同時亦更甜，建議搵同事或者朋友開心 Share～
10月11日更新
天仁茗茶 洛神花烏龍茶味爆谷
銷售點：7-11
天仁茗茶出完雪糕再出爆谷，選用非基因改造粟米，標榜不添加香精、人工色素或防腐劑。食落係酸酸甜甜嘅洛神花味，老實講烏龍茶味道就唔係好出，勝在口感幾脆又唔甜膩，係無負擔嘅下午茶之選。
Goshoku 燒扇貝邊/燒魚糕條、Goshoku Daily Premium 魷魚絲/魷魚乾
銷售點：7-11
呢幾款好啱送啤酒，或者口痕嘅時候食返啲～開飯仔私心最鍾意燒扇貝邊，有嚼勁得嚟越嚼越有鮮味！燒魚糕條同魷魚乾就比較軟身，睇大家鍾意咩口感喇。
FritoLay 元祖章魚燒味波波
銷售點：7-11
章魚燒唔係度度都有，不過喺便利店就搵到呢款章魚燒味波波啦～波波口感蓬鬆香脆，食落的確係聯想到章魚燒醬汁陣鹹香，加埋海苔碎還原度都OK，如果可以食得出章魚味就更爽喇。
奇華 迪士尼米奇米妮立秋/立冬小食禮盒
銷售點：奇華餅家
又到迪士尼Fans注意嘅時候，今次禮盒以二十四節氣當中嘅立秋同立冬做主題，鐵罐裡面分別係蜂蜜柚子鳥結糖同香橙朱古力曲奇。蜂蜜柚子鳥結糖嘅柚子味幾自然同突出，食多粒都唔會膩。香橙朱古力曲奇就以朱古力甜味為主，加上橙皮點綴味道更清新。
10月11日更新
卡樂B 金妹牌火腿味薯片
銷售點：各大便利店及超巿
大家細細個就聽到廣告裡面「有名有姓，品質保證」嘅金妹牌火腿，竟然同卡樂B聯乘出火腿味薯片！老實講薯片個味唔差嘅，都係鹹鹹哋又夠脆，但火腿味呢就唔算太出，Die Hard Fans 可能就會有少少失望喇。
Asahi 極泡啤酒485mL大罐裝
銷售點：7-11
7-11便利店嘅「7仔啤酒節」回顧啦！今期有嚟自日本、丹麥、波蘭等各國嘅精選啤酒新品，開飯仔私心最推嘅係 Asahi 極泡啤酒，罐頂可以完全拉開，唔使搵啤酒杯之餘，仲會自動湧出好似生啤咁嘅細緻泡沫！放工飲返杯爽啊！
灣仔碼頭 爆汁流沙包、麻辣小籠包
銷售點：各大超巿
灣仔碼點心系列推出兩款新品：爆汁流沙包同麻辣小籠包，用微波爐加熱或者蒸熱就食得夠方便。爆汁流沙包嘅奶黃餡鹹甜有致，而且流沙效果都唔錯。麻辣小籠包勝在皮薄得嚟唔易穿，湯汁都幾多，麻辣香口。
9月27日更新
卡樂B 大排檔咕嚕蝦味蝦條
銷售點：7-11及超巿
大排檔風味嘅咕嚕蝦，成為咗最新嘅蝦條口味，味道微酸帶甜，仲有鹹蝦香味緊接，不過要加多少少想像先會聯想得到係咕嚕蝦。
卡樂B 明爐乳豬味薯片
銷售點：7-11及超巿
卡樂B另一新作係乳豬味薯片，呢款還原度幾高，真心食得出係甜甜地嘅乳豬醬味，平時去酒樓鍾意食乳豬嘅朋友仔，可以一戰。
樂事 唐辛子/明太子雞創意料理味薯片
銷售點：7-11及超巿
兩款大大包嘅薯片，最啱開party時開心share。唔怕辣嘅當然揀唐辛子香料味啦，微辣鹹香過癮又刺激；明太子雞嗰款則係鹹鹹香香，都幾惹味。
Pejoy 特濃朱古力及士多啤梨夾心餅乾條
銷售點：各大便利店及超巿
呢款百力滋比較特別嘅係，士多啤梨醬同朱古力醬都係喺百力滋餅乾嘅中間，唔似平時食開嗰啲嘅coating喺外層，變咗拎上手嘅時候都幾方便，唔怕會沾污糟、或黐笠笠。朱古力味微微甘苦，士多啤梨則係淡淡香甜果醬。
7UP 無糖香橙檸檬味
銷售點：各大便利店及超巿
口渴時總係想飲啲有汽嘢，但汽水又怕肥？七喜最新出咗無糖香橙檸檬味，酸酸甜甜，感覺清新，最緊要係無糖兼零卡路里啊。七喜亦同時轉咗新Logo同包裝，形象變得更有活力。凡喺9月30日前買滿$20，更可參加抽獎，有機會贏得薄餅禮券 5張、7UP限量版不銹鋼杯同7UP超輕露營椅等。
7-SELECT x 阿華田 阿華田流心包、阿華田忌廉蜜瓜包、阿華田脆脆忌廉吉士包
銷售點：7-11
佢哋同阿華田首次聯乘，一口氣推出四款新品。當中阿華田流心包用微波爐叮熱之後有軟心效果，聞落阿華田香好重，食落反而無想象中咁甜。比起甜品更適合做早餐或者下午茶。另外兩款阿華田脆脆忌廉吉士包同忌廉蜜瓜包就甜多啲啲，但都唔會好膩。
BASE FOOD BASE BREAD 全營養麵包
銷售點：HKTVmall
喺日本銷量過億，有「完美營養主食」之稱嘅 BASE FOOD 登陸香港！BASE BREAD 麵包主打高蛋白、高膳食纖維，更包含鋅、鉀、鈣、維他命A、維他命K、葉酸等 26 種礦物質同維他命。皆因麵包選用全麥麵粉，大豆，奇亞籽等原料製作，最啱要 Keep Fit 朋友食。最推介嘅係朱古力口味，用微波爐加熱後口感鬆軟、朱古力香突出。
恆香 迷你蛋卷
銷售點：7-11
老餅店嘅迷你蛋卷，喺便利店都可以買到。兩款懷舊風味包括阿華田同香蕉船味，就咁食又得，加多少少創意拼落雪糕、乳酪等甜品度一齊食都得。不過蛋卷嘅鬆脆度有些少令人失望。
彩虹糖 巨型果汁糖袋裝
銷售點：7-11
細細個食嘅彩虹糖係細細粒嘅，而家大個食，彩虹糖都跟住變大粒咗！呢包巨型裝拆開有5款口味，士多啤梨、青檸、檸檬、橙同黑加崙子，比一般嘅彩虹糖大粒咗近3倍呢， 食落感覺更有嚼勁。
MR. BROWNIE萬聖節特別版朱古力粒布朗尼
銷售點：7-11
仲有一個月就萬聖節，四圍開始有萬聖氣氛，便利店亦陸續有應節食品出現啦。呢款朱古力粒brownie好可愛，每件蛋糕仔上面都有好多粒迷你南瓜樣。蛋糕軟綿，朱古力味道濃香。最好係佢係獨立包裝，啱晒拎嚟交換糖果。
法麗滋 雲呢拿雪糕味 / 布朗尼味可可曲奇
銷售點：7-11
兩款曲奇口味分別係雲呢拿雪糕同布朗尼，甜而不膩。曲奇口感鬆脆，細細塊罪惡感都唔會太大。
嘉頓 迷你威化餅系列
銷售點：各大便利店及超巿
細細包方便食嘅迷你威化餅最近改為升級配方，加入膳食纖維，有助保持腸道健康。佢哋有花生、朱古力、士多啤梨、紫薯、宇治抹茶、檸檬共六款口味選擇。
9月20日更新
維他奶 低糖蜜瓜味豆奶
銷售點：7-11 、Circle K
維他奶推出期間限定嘅低糖蜜瓜味豆奶，粉綠色包裝感覺清新之外，入口的確比一般蜜瓜奶無咁甜，同時又保留到蜜瓜香氣同柔滑口感。
媽閣餅家 粒粒杏仁餅/海苔鳳凰卷/合桃酥/四寶什錦雞蛋卷
銷售點：惠康
幾款小食均由澳門製造，杏仁餅細細粒，一啖一粒啱啱好，口感鬆脆，杏仁味都幾濃郁；雞蛋卷一盒有4隻味，包括原味、芝麻味、XO醬味同海苔味，其中XO醬味雖然唔太食得出係XO醬，但後勁帶有微微辣感都幾有記憶點。
思念 黑芝麻榛子/紫玉板栗玉湯圓
銷售點：惠康
中秋團圓要食湯圓，有超巿推出咗兩款口感十足嘅果仁湯圓，一款係黑芝麻榛子，一款係紫玉板栗；前者味道較甜香，後者啖啖軟綿栗香，外皮更以黑白糯米製成。
9月14日更新
Sara Lee 特級蘋果批/提拉米蘇蛋糕
銷售點：FRESH新鮮生活 (日出康城店、太古康怡店) 獨家發售
相信大家對莎莉蛋糕都唔會陌生，品牌最近出咗兩款新產品，分別係蘋果批同Tiramisu呀，方便一眾隨時想食甜品嘅朋友仔，可以買定喺屋企隨時有存貨，想食就食。蘋果批採用喺澳洲農場採摘嘅蘋果，酸酸甜甜，簡單以焗爐加熱就食得；Tiramisu則加入咖啡同澳洲忌廉，咖啡微苦正好中和返朱古力嘅甜膩，口感亦貫徹品牌一向紮實嘅特色。
桂新堂海老煎餅
銷售點：city'super時代廣場及海港城店 （期間限定：即日起至10月31日）
嚟自日本，有150年歷史嘅品牌專注製作海老煎餅，因應唔同蝦種會有唔同嘅烘烤方式。最近開設嘅Pop up店中，更首次推出咖喱口味嘅海老煎餅，連埋香料、堅果同蔬菜以灸燒方式製作，蝦餅薄脆，帶有陣陣咖喱風味，香而不辣。
CALBEE JP 鳳尾魚蛋黃醬味薯片
銷售點：7-11
細細塊薯片但好足味，除咗有酸咪咪嘅鳳尾魚加蛋黃醬味外，更加會食到微微嘅洋蔥同蒜頭嘅香味，夾埋一齊層次好豐富，好容易食唔停。
CALBEE JP 酸忌廉洋蔥味薯條、芥末醬油味脆條
銷售點：7-11
酸忌廉洋蔥味薯條係扭紋薯條，脆感十足，不過酸忌廉洋蔥味冇期望中咁濃郁，反而薯仔味較重。同埋薯條略嫌短/碎咗啲，食得唔夠過癮。至於芥末醬油味脆條則啖啖芥末嘅辛辣味，佐酒一流。
KOIKEYA 海老風味蝦味/芝士風味薯片
銷售點：7-11
口感較為硬身嘅六角形薯片，造形上係幾特別嘅，但味道卻冇太大驚喜。芝士味唔算濃郁，可能會令芝士控失望了。海老風味則有淡淡蝦嘅鮮香。
8月31日更新
春水良品 珍珠奶茶風味法國酥、荔枝紅茶厚捲燒
銷售點：7-11
人氣台式飲品店春水堂監制嘅品牌，2款零食分別係佢哋嘅飲品變奏。珍奶變咗做法國酥，外層薄脆，內餡薄薄一層茶味忌廉，而且冇想像中咁甜膩，試得過；荔枝紅茶變咗做厚捲燒，幾脆口但荔枝味唔算重。
Haitai X CALBEE 牛奶奶油風味薯片/烤洋蔥味脆圈
銷售點：7-11
韓國直送嘅卡樂B，牛奶奶油味係喺蜂蜜牛油味上再加埋甜奶油嘅味道，令到原本甜香嘅薯片，變得再甜咗，未必人人食得慣；烤洋蔥味脆圈就真係好似食緊洋蔥圈咁，無論聞定係食，都係超濃郁，好啱拎嚟送酒。
Haitai X CALBEE 甜薯薯片
銷售點：7-11
以韓國種植出品嘅甜薯製成，脆脆地之餘仲甜甜地，難怪成為韓國當地嘅大熱零食。
雙匯牌 辣辣/粒粒粟米腸
銷售點：7-11
即開即食嘅腸仔，一包5條，夠晒方便。下午茶拆嚟食又得，拎去行山、露營食都得。兩款口味有辣有唔辣，中間都有粟米粒粒嘅，雖然味道唔算突出，兩款嚟講，辣嗰款層次較為豐富。
卡樂B 芝士味粟米條
銷售點：各大便利店及超巿
芝士控以後唔淨止可以食芝士波波同芝士薯片，仲多埋芝士粟米條喇。喺濃厚嘅粟米味當中，芝士味依然有佢嘅位置，但如果真係鍾意勁濃味嘅芝士控，未算好滿足。
健力士氮氣咖啡啤酒
銷售點：各大便利店及超巿
健力士又出新嘢，今次係用cold brew 咖啡混合經典黑啤，一開罐已經聞到超重嘅咖啡味。加上用咗氮氣波波製作，所以啤酒嘅泡泡亦會特別多同綿密。入口首先衝出嘅係甘苦嘅咖啡，然後慢慢會試到埋烤麥芽香味同朱古力味。
8月24日更新
寶湖廚莊 養生湯包
銷售點：各大超巿 及 品牌網站
養生湯包方便上班族唔使去街巿買料都有啖湯飲下，最近新出2款口味，都係好啱夏天飲嘅，包括冬瓜蟲草花燉鴨湯、同哈密瓜羊肚菌燉豬展湯。前者清熱下火、潤肺生津；後者生津止渴、去水腫，既有哈密瓜嘅甘，亦有豬展嘅鹹香。而適逢品牌10周年，更推出限量套裝，內有3款湯包同一個保溫瓶，裝埋啲湯出街飲都仲得。
8月18日更新
JULIE’S X LINE FRIENDS 餅乾
銷售點：7-11
LINE FRIENDS嘅fans見到呢幾個包裝就要入貨啦？馬來西亞餅乾品牌同LINE FRIENDS嘅聯乘特別版，總共有3款口味，分別係方形餅嘅檸檬忌廉、車打芝士，同埋圓形餅嘅花生醬味，而且每包都會隨機附送一款心意卡。拆開係一包包細包嘅獨立包裝，芝士味較淡，而花生醬味則較為濃郁。
樂事 神戶厚切牛排/東京照燒烤雞串味薯片
銷售點：各大便利店及超巿
Lays今次2款新口味均以日本美食為主題，分別係神戶厚切牛排同東京照燒烤雞串。講真，神戶牛排嗰款係咪厚切其實就真係唔多食得出嘅，塊薯片都冇特別厚到，但就堅係食到牛排嘅油香同肉香，好似仲有少少鹽喺塊排上嘅感覺。至於雞串嗰隻味，就係酸酸甜甜嘅照燒醬味。
卡樂B JP 辛辣芥末味極黑飯糰 ／ 卡樂B 泰式辣醬味薯片
銷售點：7-11
卡樂B又有新嘢，黑麻麻嗰包係辛辣芥末味極黑飯糰，造型獨特，整到一粒粒迷你飯糰仔咁，幾可愛。口感酥脆，但又有少少似米粒嗰種黏，wasabi味濃郁但未至於嗆鼻；至於泰式辣醬味薯片則係7仔獨家發售，辣度輕微。
8月14日更新
太興 港式茶餐廳飲品雪糕系列
銷售點：全線惠康、Market Place、3hreesixty及Oliver's the Delicatessen獨家發售
太興奶茶出雪糕喎，另外仲出埋咖啡味同鴛鴦味，將3款茶記飲品變成雪糕，味道都算還原得幾似嘅。奶茶味以斯里蘭卡茶葉製作茶底，再加入全脂淡奶，茶香幾重。而鴛鴦味則比較偏重於咖啡味，奶茶味相對冇咁突出，但三者都略嫌唔夠軟滑。
LUCULLUS 限量版雜錦朱古力及曲奇禮盒
銷售點：全線LUCULLUS
有朱古力品牌聯乘香港電車推出咗盒限量版嘅雜錦朱古力及曲奇禮盒啊，個盒勁靚，show晒由第一代單層車卡到而家第七代嘅先進雙層車卡，電車迷必儲！打開盒內亦有驚喜，兩款紅色同綠色嘅電車造型朱古力，靚到唔捨得食。另外亦有電車站站牌朱古力、唔同苦度嘅黑朱古力，以及牛油曲奇。推廣期內，隨每盒限量版禮盒更附送限量聯乘版帆布購物袋。
媽咪點心麵 洋蔥味
銷售點：7-11
媽咪麵可以話係好多人細細個最鍾意食嘅零食之一，每次一食啲童年回憶就返晒嚟。嚟緊可以創造新嘅回憶啦，最新出咗洋蔥味。食落有少少似平時食開酸忌廉洋蔥味薯片隻味，不過味道略嫌鹹咗少少，唔夠平衡，洋蔥味唔算突出。而喺8月16日至8月29日期間，凡買媽咪麵產品2件，就可以用$20換夏日限量版手挽袋1個。數量有限，送完即止，Fans們要mark實日子啦。
華元 濃厚海苔鹽之花味/麻辣老火鍋味薯片
銷售點：7-11
由台灣直送嘅兩款薯片，包裝上大大隻「濃」字，係堅嘅，堅係濃味，無論係鹽之花定係海苔味都相當重，食多幾塊好快開始口渴。至於麻辣鍋嗰款，同樣重口味，又麻又辣，夠晒過癮。
維他 低糖氣泡菊花茶
銷售點：各大便利店及超巿
夏天飲有汽嘅嘢係會爽啲嘅，而家連菊花茶都有汽喇，仲要係低糖版。不過話就話低糖，其實飲落都幾甜。但有汽的確令整體感覺清新咗，大熱天時飲完幾舒服。預告一下，嚟緊會有街頭試飲活動。
鴻福堂 清代宮廷飲品
銷售點：全線鴻福堂
以時令夏天食材，融合古代宮廷食療秘方製作嘅健康樽裝飲品——茶桂妃即係荔枝楊桃桂花風味茶，有清熱生津嘅功效，味道偏甜；而茶殿下即係五味子蜂蜜茶，可以補氣生津，但由於成分有山楂、五味子、光果甘草同羅漢果等，味道酸酸甜甜中帶微甘。
8月3日更新
山浪 鴛鴦意式雪糕杯
銷售點：7-11 獨家發售
之前出過茶走味，今次出鴛鴦味。首先食到嘅係港式奶茶錫蘭茶嘅回甘香味，再滲出微微咖啡香，平衡度嚟講，奶茶味係相對突出少少嘅，但不失為一杯唔錯嘅雪糕選擇。
森永MOW 蜜瓜/特濃朱古力雪糕
銷售點：7-11 、Circle K
夏天係蜜瓜嘅季節，呢款蜜瓜雪糕選用Muskmelon製作，含有13%蜜瓜汁，食落啖啖都係juicy果香，但又唔算好甜。至於特濃朱古力雪糕就真係特濃喇，用厄瓜多爾可可塊製成，口感幼滑醇厚。
阿奇儂 冰沙
銷售點：7-11
兩款沙冰分別係奶蓋黑糖珍珠同奶蓋蜜桃柑橘味，買定喺屋企冰箱雪住，之後隨時想拎返嚟飲，放室溫攤返凍或放入微波爐快叮都得，好方便。前者珍珠雖甜，但有鹹鹹地嘅芝士奶蓋中和返；後者底層係乳酸混合新鮮柑橘果粒製成嘅柑橘冰沙，中間粉紅色嗰層則係白桃汁加蘋果粒調製，飲落柑橘味較為明顯，桃香則較為隱藏。
LOTTE抹茶朱古力批
銷售點：7-11
由日本製造嘅朱古力批，中間夾有抹茶蛋糕同淡奶油餡，淡淡茶香又唔算好甜，下午茶食個啱啱好。
品客薯片 安格斯厚牛起士堡/西班牙蒜味奶油蝦風味
銷售點：各大便利店及超巿
兩款新口味嘅薯片，都係歐洲美食嘅變奏。安格斯厚牛起士堡還原度唔錯，一食落去係好重嘅牛肉味，緊隨其後嘅芝士味亦頗濃郁，兩三塊疊埋一齊食確係有少少似burger feel；至於蒜味奶油蝦都有陣陣嘅蝦鮮味嘅。
OYATSU豚骨拉麵味/MAX豚骨拉麵味脆片
銷售點：7-11
拉麵味嘅脆片，兩款都係豚骨湯底，鹹鹹der， MAX當然就更加重口味啦，食完記得要飲返多啲水。
樂天 清河星光氣泡清酒
銷售點：7-11
便利店有唔少酒精飲品，其中呢款氣泡清酒，包裝幾靚，喺咁多支酒中亦輕易吸引大眾眼球。而且更喺韓國當地熱賣，而家嚟到香港當然要試下啦。低溫熟成，結合清酒同白葡萄酒，口感清爽，仲甜甜地添。
Blue Girl Blue Girl Light
銷售點：各大便利店及超巿
飲咗咁多年，呢個啤酒品牌相信大家都好熟悉，佢哋最近推出酒精濃度只有3.5%嘅Blue Girl Light，口感清爽而且感覺冇咁苦，變得更易入口。喺推廣期內（即日至8月12日）逢星期四五六，搵到專車嘅話更有機會免費得到啤酒同珍藏版Edan x Jeffrey嘅透明卡2張連卡套，爵屎同咖啡豆要留意喇。
伊藤家 X Mofusand 岩燒芝士貓吐司
銷售點：7-11獨家發售
繼續係呢隻可愛貓貓呀，今次係貓貓造型嘅岩燒芝士吐司，不過口感偏剛同偏硬，建議放入微波爐叮叮會好啲，至少面層嘅芝士同蜂蜜會香少少。
易極+草本 潤喉薄荷糖 蜂蜜檸檬/枇杷秋梨味
銷售點：各大便利店及超巿
唔少人成日隨身帶住嘅潤喉薄荷糖，最近出咗兩款新味，分別係蜂蜜檸檬同枇杷秋梨，淡淡薄荷涼感，微微甜，眼瞓時嗒一粒都有輕微嘅提神效果嘅。
7月24日更新
天仁茗茶 雪糕系列
銷售點：7-11獨家
呢個茶飲店品牌一向都有唔少fans，最近仲要推出3款茶味雪糕系列，包括913茶王、桂花金萱烏龍、同香芋奶綠雪糕。全部帶有茶香之餘，仲有陣陣北海道牛乳香。鍾意濃香回甘嘅朋友仔必試以烏龍茶同粉光參製作嘅913茶王雪糕；想清新啲嘅就可揀桂花金萱烏龍味；至於香芋奶綠味，更暗藏粒粒香芋，增加口感。
伊藤家x mofusand 三色貓吐司
銷售點：7-11
相信好多人第一眼都會畀呢隻可愛貓咪吸引咗， 係由伊藤家同日本超人氣插畫家Mofusand聯乘嘅作品。無論係包裝，定係三色貓造型嘅吐司都勁Cute，貓貓嘅兩邊耳仔分別係朱古力同咖啡味，係幾濃嘅，但口感略為dry咗少少。
伊藤家x mofusand 切片原味/朱古力卷蛋、日式芝士蛋糕
銷售點：7-11
卷蛋有原味同朱古力味，帶有淡淡嘅蛋香，口感濕潤。包裝印有可愛鯊魚猫造型的原創插畫， 至於日式芝士蛋糕，口感則偏濕潤。
無雙 泰國船粉
銷售點：7-11、大生生活超市
泰國船粉都有即食包裝，仲要係由泰國製造嘅添，夠晒正宗。湯底同醬料包等加入魚露、酸豆醬、醋、乾蔥等，神還原船粉嘅味道。食落有微微辣感，亦有濃郁嘅香料味道，隱約仲有啲芫荽同玉桂味。米粉彈牙，掛湯力高，吸盡湯汁精華。
7PREMIUM 枝豆味脆條
銷售點：7-11
一條條青綠色嘅枝豆味脆條，以豌豆和枝豆為主要材料，食落真係有陣陣豆香同埋微微鹽香，口感硬脆，好啱佐酒。
7PREMIUM厚切鹽味薯格
銷售點：7-11
日本製造嘅薯格，選用堅魚乾粉、海帶粉同香菇粉製作，鹽都用咗2種。同樣都係硬脆口感，鹹鹹香香，薯味突出，唔覺唔覺就食晒一包。
7PREMIUM芝士圈
銷售點：7-11
一打開包裝已經有好濃郁嘅芝士味衝出嚟，芝士控真係好難忍口，講好咗最後一圈又會忍唔住拎多一圈。採用北海道產車打芝士調味，好有細個食芝士圈嘅感覺，但呢隻芝士味再香濃啲。
SEVEN CAFÉ 檸檬味奶油夾心餅乾
銷售點：7-11
夏天總係想食啲酸嘢，感覺清新啲，就連食餅都係咁話。呢款夾心餅，使用西西里島嘅檸檬汁製成檸檬奶油，清爽酸甜，餅乾酥脆，細細包就算帶出街或者拎去野餐食都好方便。
森永 瑪麗棉花糖夾心迷你餅
銷售點：7-11
介紹下啲邪惡嘢先，日本森永期間限定嘅新品嚟架。瑪麗餅外層係香滑朱古力，中間仲要夾埋軟糯嘅棉花糖，甜到一個點。
7月18日更新
雀巢 椰子紅豆冰味甜筒
銷售點：各大便利店及超巿
舊式茶餐廳嘅特飲，椰汁紅豆冰，變咗做甜筒啊！拆開包裝係扭紋雪糕嚟，混雜咗椰子同紅豆味，仲有香烤花生粒喺面。意外地唔算好甜，不過椰汁味就重過紅豆味。
DREYER’S 茶系雪糕
銷售點：7-11、Circle K （單件裝）︳百佳、惠康及各大超巿 （多件裝）
愈嚟愈多茶系甜品出現，呢個品牌最近又推出多2款茶系雪糕，分別係中式烏龍茶同印度皇家茶。除咗有迷你杯外，前者有雪糕批，後者則有甜筒版。中式烏龍茶雪糕採用烏龍茶粉製作，微甜而後勁回甘突出，雪糕批更有朱古力脆片外層，口感多元；印度皇家茶味則以紅茶粉為原料，但卻缺少咗印度香料嘅味道，只係得甜甜嘅奶香同茶甘味，好似硬係爭緊啲嘢咁。
Premia 朱古力脆皮雪糕
銷售點：Market Place及惠康
新雪糕品牌Premia登陸香港！首推嘅朱古力脆皮雪糕系列都係日本製造，選用日本優質食材，雪糕奶香濃郁、口感柔滑，加上朱古力脆皮，呢個經典組合真係無得輸。45g迷你裝有經典原味、香脆杏仁、忌廉曲奇三款口味，甜而不膩。另外亦有75g經典裝。
Eden Orchards 100%純車厘子汁、有汽車厘子汁
銷售點：官方網站
車厘子飲品總係畀人伏嘅感覺？咁你就要試下呢個著名品牌嘅100%純車厘子汁喇，使用南半球紐西蘭南島奧塔哥地區嘅車厘子精製而成。每支750毫升嘅車厘子汁係由2公斤新鮮車厘子榨取而成，可想而之味道有幾濃郁，飲得出係天然嘅果甜香味。至於有汽車厘子汁則採用50%氣泡水同50%純車厘子汁混合而成，酸酸甜甜，感覺清新，好啱夏天飲。網站同時有其他蜂膠同蜂蜜產品如喉嚨噴霧、精油等。
KAGOME GREENS 一口果昔啫喱系列
銷售點：City’super（時代廣場及海港城店）
期間限定：即日起至8月31日
由阪急百貨店(Hankyu) 聯乘KAGOME嘅KAGOME GREENS果昔啫喱，首次登陸香港！果昔啫喱一啖一粒，每隻味都係蔬菜同水果mix，大部分原材料均選用日本國產蔬菜原材料，無添加任何甜味劑或洋酒，大約6個啫喱就採用1份的蔬菜（120克）去製作。5種口味包括奇異果羽衣甘藍味、芒果南瓜味、哈密瓜紅蘿蔔味、白桃石榴甜菜味同巴西莓紫薯味。想咩味都試下嘅仲有款雜錦果昔啫喱，一包有齊咁多隻味。大部分口味嘅比例，都係以水果味較為突出，當中又以哈密瓜紅蘿蔔味最甜。
7月11日更新
Pocari Sweat 寶礦力水特
銷售點：各大便利店及超巿
今次唔係新產品或者新口味，係新代言人呀！今年Pocari Sweat搵嚟Jeffrey Ngai 魏浚笙，成為品牌登陸香港逾40年嚟首位男代言人，更推出一套四款簽名限量紀念版Postcard。想帶Jeffrey學長Postcard返屋企，即日起到7-11便利店同OK便利店，購買寶礦力水特或ion water產品滿$30即有機會獲贈一張。到其他指定零售商購買寶礦力水特1.5L嘅2支推廣裝，或350mL嘅6支推廣裝，隨產品亦贈送一張。先到先得，送完即止。
Asahi 新配方Asahi Super Dry
銷售點：各大便利店及超巿
喺日本銷量第一嘅Asahi最近推出全新配方嘅Asahi Super Dry！唔單止換上新包裝，更以日本清酒為研發靈感，注入獨特發酵技術，令啤酒口感更清爽順滑。最啱呢個夏天雪凍嚟飲呀。
7月5日更新
楓葉 蛋卷曲奇
銷售點：楓葉 Maple 概念旗艦店（銅鑼灣波斯富街58號地下）
主打蛋卷同曲奇等小食嘅呢個品牌，最近喺銅鑼灣開咗間旗艦店，仲有枱櫈可以坐低試食，又會供應時令泡茶同咖啡，以下介紹其中幾款精選。
窩心杏仁蛋卷、醇厚朱古力蛋卷
窩心杏仁蛋卷唔係長筒形嗰隻蛋卷，而係似鳳凰卷嘅樣。最外層係以新鮮純蛋白製成，中間夾有天然烘焙美國製杏仁碎，食嗰陣要小心啲，好易碎。食到陣陣牛油香嘅，仲有淡淡果仁香，口感酥脆；至於朱古力嗰款，蛋漿採用新鮮雞蛋混合比利時黑朱古力而製，最好嘅地方係佢唔算太甜，罪惡感冇咁大。
傳統家鄉雞蛋蛋卷、斑蘭蛋卷
兩款蛋卷都係獨立包裝，一包內有兩細條，每次食少少就可以少食多滋味。口感鬆脆，好易食到成枱碎。蛋香都突出嘅，不過新出嘅斑蘭口味就略為淡咗少少。
果仁曲奇混合禮盒
1盒有4款口味，包括杏仁朱古力、開心果綠茶、亞麻籽燕麥同腰果小紅莓。曲奇以新西蘭深度發酵牛油作原料，帶有奶羶味。每塊曲奇都夾有唔同嘅果仁粒粒喺中間，增加口感。
碧根果核桃芝麻酥
呢款幾有驚喜啊，一啖食落去都幾重芝麻味，仲有大大粒碧根果喺中間，同埋其他多款果仁，有咬口得嚟亦有唔同層次。
百事可樂 無糖青檸味
銷售點：各大超巿
蜘蛛俠電影準備上映，百事可樂無糖聯乘電影出《蜘蛛俠：飛躍蜘蛛宇宙》別注版罐，勁靚啊，fans一定要買嚟收藏。另外，無糖青檸味亦同時推出，微微酸感喺大熱天時飲零舍清爽。
明玥 無麩質曲奇
銷售點：明玥
有品牌最新推出2款無麩質曲奇，為對麩質過敏嘅人士帶嚟福音。2款口味分別係榛子同杏仁味，前者添加咗鷹嘴豆粉，後者則添加富含蛋白質嘅杏仁粉同杏仁粒，杏仁粒堅果經過烘焗，味道香濃，並用杏仁粒打成杏仁粉取代麵粉，加埋有機椰子粉，曲奇食落除咗有杏仁香味外，亦有淡淡椰香。
卡樂B 松露味薯片
銷售點：7-11
又有松露味嘅薯片出現，今次呢款淨睇包裝都有種grand嘅感覺，黑底金字。用上成熟嘅松露製作，一打開包裝已經聞到陣陣松露香，味道濃郁。
FLEUR厚切年輪蛋糕
銷售點：7-11
日本製造嘅年輪蛋糕，質感鬆軟，蛋香味濃之外仲有甜香嘅楓糖味，細細個Size，用嚟做早餐或者下午茶都好啱。
森永 經典牛奶焦糖味夾心蛋糕
銷售點：7-11
甜魔記得試！森永啲product出名甜，一盒6個裝嘅蛋糕鬆軟，中間夾心係順滑嘅焦糖忌廉夾心，香甜嘅焦糖味甜得有啲霸道。
6月21日更新
公仔鬼辣 水煮牛肉味即食麵、酸菜魚味米粉
銷售點：7-11優先發售，其餘超巿將於7月發售
食辣嘅朋友仔，又有新品可以挑戰。專出辣嘢嘅呢個品牌，新出2款即食麵，分別係2級辣嘅酸菜魚味米粉同4級辣水煮牛肉味即食麵。前者有埋酸菜包，湯底酸香微鹹，辣感雖然刺激但只算BB級，應該大部分食到辣嘅人都一定食到；後者則湯底沖完出嚟鮮紅色已經有預感，麻辣濃烈帶勁，自問唔怕辣嘅先好試啊。
阿奇儂 楊枝甘露雪糕批
銷售點：7-11
夏天特別多雪糕新味，由經典糖水演變嘅楊枝甘露雪糕批，分咗幾重口感。黃色脆皮係台灣枋山愛文芒果製嘅，內層係椰奶搭新鮮西柚果肉，內餡仲有西米露啫喱果凍，雪糕則係芝士味，還原度唔錯，芒果味突出，不過係偏甜咗少少。
阿奇儂 黑糖布丁雪條
銷售點：7-11
畀定心理準備你，呢款真係甜到爆燈。選用新竹寶山嘅黑糖，以古法熬成外層，有陣陣焦香；內餡係雞蛋布甸，仲有啲布甸啫喱，間唔時一啖食到就會有煙韌口感。
樂天 Goo Goo脆皮雪糕批
銷售點：Circle K
韓國直送嘅朱古力雪糕批，仲要加埋焦糖、同棉花糖，係就係甜架喇，但甜得幾開心。而且脆皮層更有粒粒香脆花生，增加口感之餘又賒去咗啲甜，朱古力控可以一戰。
The Prisoner限量版禮盒
銷售點：(按此)
飲開紅酒嘅朋友仔，The Prisoner新推出幾款限量版，好靚架個包裝，特地同日本當代著名書法家之一川尾朋子合作，印上書道藝術I Am Fearless （大胆不敵）。4款混釀葡萄酒包括The Prisoner Red Blend、The Prisoner Cabernet Sauvignon、The Prisoner Chardonnay同埋The Prisoner Pinot Noir，主要以最初定居喺納帕谷嘅意大利移民所釀造嘅葡萄酒為靈感，再混釀埋加州最好同最唔常採用嘅葡萄品種，味道帶有滿滿果香，口感溫和。
樂天 宇治抹茶味小熊餅
銷售點：7-11
細細個就開始食嘅熊仔餅，出咗隻令人心心眼嘅宇治抹茶味！使用宇治抹茶粉製作，抹茶呈淺綠色，苦甜度平衡而且茶味濃郁，食到停唔到口，可惜一包份量唔多，好快就食晒。
卡樂B JP芝士黑胡椒味脆片、日式芝士味薯片
銷售點：7-11
日本卡樂B有新作！今次兩款口味均係為芝士控而設，芝士黑胡椒味脆片用咗3倍嘅車打芝士粉去整，香味自然加倍，仲帶有陣陣黑胡椒嘅辣香，好啱佐酒；至於日式芝士味薯片，一開封已經聞到好濃嘅芝士味，仲要每塊波浪切嘅薯片上面，都黏滿奶油同芝士粉，芝士控一定會食得好開心。雖然每食一啖都會講個肥字，但都係忍唔住會繼續食下一塊，大推！
HELLO KITTY台灣菓子
銷售點：7-11
怎麼可以吃Kitty？Hello Kitty粉你哋買完會唔會唔捨得食架？3款Hello Kitty造型嘅台灣菓子分別有紅豆麻糬、芋頭麻糬同鳳梨酥。先講麻糬款，蛋餅皮鬆軟，內餡麻糬Q彈，不過芋頭味就唔算好重。鳳梨酥呢，則係100%用鳳梨熬煮成內餡， 淡淡果香，餅皮仲係帕瑪森芝士味添，多重口感。
天仁茗茶 x LINE FRIENDS隨行杯套裝
銷售點：7-11獨家
450mL嘅LINE FRIENDS 隨行杯幾靚架，有兩款設計選擇，打開入面，仲有包仔綠茶芥末花生，同埋有張天仁茗茶蜂蜜綠茶 (中杯) 贈券，拎住隻杯去換返杯嚟飲，又解渴又環保。
奇華 迪士尼100周年系列禮盒
銷售點：奇華餅家
迪士尼粉絲見到個盒應該幾開心，一次過可以集齊超過20個角色，就連平時好少有product嘅阿拉丁精靈、獅子王拉飛奇等都有，值得收藏。盒內有5款小食，包括特濃朱古力蛋卷、芝麻餅、迷你合桃酥，其中曲奇同鳳梨金酥更有米奇造型呢。
森永 經典牛奶焦糖味忌廉夾心餅
銷售點：7-11
森永fans實會留意到呢個包裝，係日本森永復古海報合集週年嘅特別版！1盒內有8包獨立包裝，橫紋間條嘅焦糖曲奇餅都幾鬆脆，夾住層牛奶焦糖味忌廉，濃甜得有啲過份。
7-SELECT x 八天堂 雞蛋仔造型菠蘿夾心吉士慕絲蛋糕
銷售點：7-11
外貌協會嘅朋友仔見到呢款蛋糕實想要，雞蛋仔造型夠晒cute，打卡嚟講係唔錯。慕絲蛋糕係吉士味，中間有層酸酸甜甜嘅菠蘿果醬，不過打卡嘅嘢，嗯，你明啦。
7-SELECT x 八天堂蜜瓜忌廉蛋糕 / 蜜瓜忌廉瑞士卷
銷售點：7-11
夏天係蜜瓜季節，便利店聯乘八天堂，都出咗一系列嘅蜜瓜甜品。例如忌廉蛋糕同瑞士卷。兩者蛋糕部分都係口感軟綿嘅，至於蜜瓜忌廉就……有啲甜啦。
6月8日更新
阿波羅 薑汁番薯雪條
銷售點：全線惠康、Market Place、3hreesixty及Oliver's the Delicatessen獨家發售
繼上年腐竹糖水雪條後，呢個品牌再出港式糖水系列，選用紫心番薯製成「薑汁番薯雪條」，淺紫色嘅雪條，口感偏軟身，食食下仲有粒粒紫心番薯仔，紫薯味都香嘅，而且好在唔會太甜，但可惜薑汁味唔算突出，還原度扣咗少少分。
桃哈多 松露味薯圈
銷售點：7-11
硬脆嘅薯圈本身都有唔少捧場客，今次加埋松露味粉，入口鹹香，愈食愈上癮。最特別係除咗薯圈外，居然仲有夾雜咗啲杏仁喺度。
美祿 可可球穀物棒家庭裝
銷售點：7-11
穀物棒係好多運動族，特別係行山朋友嘅選擇，由歐洲入口嘅美祿可可球穀物棒，全穀物製造，仲要每條穀物棒都少過100 kcal。上層係美祿脆脆，下層係白朱古力coating，都幾甜下。
TAIYO原味年輪蛋糕/香月堂朱古力蛋糕/ KS原味紅豆銅鑼燒
銷售點：7-11
呢幾款糕點都係由日本製造，年輪蛋糕蛋香奶香味平衡，口感鬆軟綿密，微微甜；朱古力蛋糕細細嚿，做早餐或下午茶就啱啱好，黑朱古力苦中帶甜。至於個銅鑼燒，比一般嘅大好多，係特大版，質感軟熟，中間啲紅豆蓉餡有少少甜。
6月1日更新
Binggrae Freshes Premium士多啤梨雪條
銷售點：7-11
韓國直送嘅果味雪條，除咗之前介紹過嘅扁桃同熱情果味，最近仲嚟埋士多啤梨味！啖啖都係酸酸甜甜嘅果香，仲食到一粒粒士多啤梨籽，啱晒夏天解渴消暑。
Häagen-Dazs馬卡龍雪糕系列
銷售點：各大便利店及超巿
Häagen-Dazs今次同法國殿堂級甜點大師Pierre Hermé首度聯乘，推出馬卡龍雪糕系列，英國法國出完，而家香港都有啦！
士多啤梨紅桑子味係最開心嘅，又有雪糕杯又有脆皮雪糕批。佢哋嘅士多啤梨味雪糕一向係大家嘅首選，而家混埋紅桑子軟心醬，仲有粉紅馬卡龍脆餅粒，微微酸甜中滲有杏仁香氣，脆餅粒口感脆得嚟又有少少煙韌，層次豐富。
另外兩款口味分別係雙重朱古力馬卡龍，同柚子檸檬馬卡龍雪糕。兩者同樣有相應嘅馬卡龍脆餅混入雪糕之中，增加口感。前者係以經典朱古力加Ganache 黑朱古力軟心醬，香濃甘甜；後者仲加埋柚子檸檬軟心醬，酸甜清新。
5月25日更新
KOKUAJI Premium Ice Cream 雪糕系列
銷售點：惠康、Market Place、3hreesity 及 Oliver’s The Delicatessen 之香港店舖獨家發售
選用日本人氣咖啡品牌UCC The Blend 114、117 及炭燒咖啡即溶咖啡為原材料嘅3款咖啡雪糕，非常有驚喜！咖啡控一定要試啊。3款口味包括榛子碎咖啡、香濃咖啡碎同埋炭燒咖啡味，其中最推介嘅係香濃咖啡碎味，咖啡甘香味濃郁，而且仲有粒粒咖啡豆碎，無論口感定味道層次都再昇華咗。至於碳燒咖啡則以UCC炭燒咖啡所製，咖啡味道同樣濃厚甘醇，更有陣陣焦香味道。
Bulla 乳酪雪糕杯
銷售點：7-11
呢款乳酪雪糕由澳洲直送，分別有芒果同士多啤梨味，都係以澳洲新鮮牛奶加新鮮果肉製作。重點係每杯只得3%脂肪，食完都唔怕變肥仔。芒果味清甜，士多啤梨味則帶微酸，果味較輕，面頭嗰層嘅口感有微脆感覺。
卡樂B 宅卡力薯條
銷售點：7-11
呢條Line嘅薯條係偏硬脆嘅口感，今次兩款新口味包括雙重芝士同紫菜味。前者製作時釀入車打芝士同忌廉芝士，每條薯條上仲可清楚見到啲淡橙色芝士粒粒，愈食芝士味就愈出。
卡樂B 傳說蜜糖雞味薯片
銷售點：7-11
呢款應該係卡樂B出過咁多薯片以嚟，最細又最薄嘅一款。100%使用葵花籽油嘅韓國大熱蜜糖雞味，食落蜜糖甜味較輕，但勝在夠脆口。
BIGCHURI煙燻雞蛋
銷售點：7-11
好多朋友仔都鍾意食蛋料理，以後喺便利店又多一款選擇啦。以韓國雞蛋同秘製醬汁燻製，彈牙得嚟有嚼勁，有啲似台灣鐵蛋。不過煙燻味就唔算太濃，反而有微微酸味。一包仔有2隻，開嗰陣要小心漏汁啊。
珍珍 泰式肉碎生菜包味薯片
銷售點：7-11及各大超巿
講真見到呢個包裝時係有啲期待的，始終生菜包嘅味道都比較複雜，到底點樣可以融合晒落片薯片度呢？可惜食落係有些少失望嘅，還原度唔算高，最突出嘅應該係泰式肉碎嘅味道，另外仲有後勁嘅酸辣，但整體合埋一齊就係唔太似啊。
IF 椰青紅茶飲品、士多啤梨火龍果蘆薈飲
銷售點：7-11及各大超巿
夏天最啱就係飲椰青或者果汁消暑，品牌新出嘅兩款特飲，椰青紅茶飲品清爽提神；士多啤梨火龍果蘆薈飲品仲有粒粒蘆薈，增加口感，味道酸酸甜甜。
5月17日更新
卡樂B 香辣青檸味蝦條
銷售點：各大便利店及超巿
成個包裝都好清新，不過食落感覺唔太似青檸，但類似香茅、香料嗰啲泰國風味，微微酸，再喺喉嚨度感受返啲辣，幾特別嘅。
FRITOLAY 雞肉紫菜味、洋蔥清湯味薯條
銷售點：7-11
扭扭狀薯條口感較為硬脆，但亦因為咁而更易沾上調味料，令到每條薯條都好夠味。藍色包裝嘅係雞肉紫菜味，橙色嘅則係洋蔥清湯味，陣陣洋蔥甜香，唔覺唔覺好快就清咗一包。
湖池屋 芝士岩鹽味薯片、松露鹽味粟米片
銷售點：7-11
芝士控值得試下芝士岩鹽味嗰隻薯片，芝士味幾香，而且塊薯片有啲厚道，口感唔錯。至於松露鹽味粟米片，則可能會令松露控失望。第一啖入口係有輕輕嘅松露鹽香嘅，但好快畀粟米味蓋過咗嚕。
Nina Patisserie 別注限量版 Hello Kitty蝴蝶酥禮盒包裝
銷售點：Nina Patisserie
呢間酒店餅店嘅蝴蝶酥本身都好受歡迎，最近唔止推出2款新口味，仲出埋Hello Kitty別注限量包裝添（原味都有Kitty版，放心），好靚，食完仲可以留返起。兩款新口味分別係滿滿堅果香杏仁味，同埋一拆開就已經聞到好香嘅玉桂味，味道偏甜。
5月10日更新
卡樂B 宅卡B薯條燒烤味（企身袋裝）
銷售點：各大便利店及超巿
卡樂B最經典嘅BBQ口味終於變做薯條產品啦。一大包入面有5包仔，一條條粗厚薯條嘅薯味係十足嘅，仲有陣陣烤肉風味。不過唔知係咪食慣咗嘅關係，硬係覺得燒烤味配薯片係夾過同薯條。
樂事 日式椒鹽海老天丼味、魚子章魚燒料理味薯片
銷售點：各大便利店及超巿
Lays又出咗2款日式風味嘅期間限定口味薯片，日式椒鹽海老天丼味嘅椒鹽味相當突出，濃郁嘅鹹香味中又輕輕滲有蝦鮮味，幾惹味，大大包有排食；至於魚子章魚燒料理味則比較似章魚燒醬汁嘅味道，甜甜地。
Coolhaus 家庭裝雪糕
銷售點：惠康
美國呢隻雪糕品牌標榜使用Perfect Day無動物成分乳清蛋白製作，無動物成分乳清蛋白係世界首創通過微生物群發酵而成，分子結構上與源自牛奶嘅乳清蛋白完全一樣，所以佢哋嘅雪糕同樣都可以有幼滑口感同香濃奶香，但就不含乳糖同膽固醇。今次引入香港嘅家庭裝有5款口味，包括：焙茶珍珠。忌廉曲奇、芋香珍珠、軟心朱古力同埋花生醬軟糖。特別推介花生醬軟糖，花生醬味夠晒香濃，幾有驚喜；芋香珍珠嘅芋頭味略甜，混入埋一粒粒Q彈珍珠，絕對可以討得一眾珍珠控歡心。
King’s 寶冰 粒粒椰青雪條
銷售點：Circle K
夏天總係會想食椰青，嚟自泰國嘅呢款椰青雪條就夠晒開心。以椰子加入椰奶製成嘅雪條，椰香十足，而且仲有啖啖椰青肉，口感豐富，清爽解暑。
Binggrae Freshes Premium 扁桃/熱情果雪條
銷售點：7-11
呢2款果香味雪條則係由韓國直送，食得出以鮮甜果汁製作，尤其是扁桃嗰隻口味，桃香甜得嚟幾自然，仲有粒粒果肉食得到，開心仔！至於熱情果嗰款，味道酸酸甜甜，同樣佈滿熱情果肉同埋熱情果籽，真材實料。
Ekselence 焦糖花生脆脆配花生雪糕/曲奇餅乾麵團配香草及朱古力雪糕
銷售點：百佳超級市場
拉脫維亞雪糕品牌Ekselence今次推出兩款新雪糕，焦糖花生脆脆配花生雪糕有粒粒花生碎，花生香十足，不過加埋焦糖醬味道真係比較甜。而曲奇餅乾麵團配香草及朱古力雪糕裡面係一半雲呢拿雪糕加一半朱古力雪糕，兩邊當中都會有粒粒曲奇麵團，口感更豐富。
少爺啤酒 酒花街5號
銷售點：Circle K
酒花街系列嚟到第5款，今次呢隻Hazy IPA選用嘅酒花係Cascade，酒體色澤偏濁黃色，酒花香味濃郁，帶有柑橘、西柚等果香，口感乾爽，收尾有微微回甘。
少爺啤酒x Cloudwater 落花流水
銷售點：Circle K
由本地精釀啤酒廠少爺同英國Cloudwater Brew Co合釀嘅Cold IPA，釀製過程中大量加入3款唔同啤酒花，不過飲落比想像中輕身，酒花香而不苦，帶有熱帶水果，例如芒果同木瓜嘅果香。放耐多少少，麥芽中嘅甜味變得更加突出，愈飲愈甜。
YBC X PABLO芝士撻味脆條
銷售點：7-11
深受港人歡迎嘅日本品牌PABLO聯乘YBC，推出咗隻芝士撻味脆條，1包有6條獨立包裝，脆條細細條，面層係軟身嘅芝士，鬆化餅乾有層朱古力coating，一啖食晒剛剛好，淡淡嘅芝士香幸好冇被甜味蓋過。
SUNLAVIEEN濃厚芝士蛋糕
銷售點：7-11
切開成5條裝嘅芝士蛋糕，用咗大洋洲產芝士忌廉，以六甲山麓牛乳而製成，另外加入咗少量白朱古力，所以食落有香濃嘅芝士同奶香味之餘，亦有陣陣甜香。口感鬆軟，不過就比平時食開嘅日式芝士蛋糕稍稍重身少少。
5月5日更新
華點 鳳梨酥/奶油酥餅
銷售點：官網 (按此)
華點係來自台灣嘅甜點品牌，主打法式甜點包括鳳梨酥同奶油酥餅等，選用台灣特有嘅食材，而且多個工序均由人手製作。佢哋嘅酥餅以酥脆見稱，最近打入香港巿場，更特別研發咗香港限定嘅口味——茉莉香橙鳳梨酥。餅皮帶有淡淡茉莉花茶香，內餡係冬瓜鳳梨膏加香橙皮，清新酸甜，層次多變。另外嘅奶油酥餅則設鹽花香草籽、鹽花鹹蛋黃、鹽花焦糖餡、柴燒桂圓烏龍、58%朱古力同北港鹹花生口味，全部都係酥香可口，好啱下午茶食返一塊叉個電。
5月2日更新
味覺糖x LINE FRIENDS推廣裝連竹纖維碟
銷售點：7-11
LINE FRIENDS粉絲最近行過便利店有冇發現到呢個新出嘅禮盒裝？竹纖維碟共有2款設計，拎上手非常輕身，又靚又實用，仲有兩包味覺糖都係LINE FRIENDS包裝㗎。
BURTS淡海鹽味、芝士洋蔥味薯片
銷售點：7-11
喺英國製造嘅薯片，無添加任何味精、人工香料同人工色素，而且仲符合Red Tractor及無麩質食品標準，素食朋友仔都啱食。兩款口味各有特色，芝士洋蔥嗰款就濃味少少，口感屬硬身少少嘅薯片。而且每包薯片包裝上面仲印埋生產時間、手炸員工同埋薯仔農個名，好認真。
Pocky 抹茶雲呢拿雪糕味餅乾條
銷售點：各大便利店及超巿
Pocky最近出咗唔少新款百力滋，抹茶控就必試呢款喇。粗身嘅百力滋，混合厚厚一層嘅抹茶朱古力同雲呢拿，除咗有香甜嘅茶味外，仲有淡淡嘅奶香，新嘅朱古力發泡技術令朱古力口感更具空氣感。不過一盒有2包，每包得6條，相當珍貴。
極脆帆立貝味百力滋餅乾
銷售點：7-11
呢兩款口味均由日本直送，綠色嗰盒係香草烤雞味，紅色則係帆立貝味，同上一款唔同，呢款則係幼身好多嘅百力滋。其中帆立貝味係以日式高湯製作，如果一次過將三幾條同時放入口，再吮一吮埋呢，就會食到扇貝獨有嘅鹹香味喇。（溫馨提示單一條食嘅話太幼，係脆嘅，但唔多食到帆立貝味囉）
固力果杏仁百奇朱古力
銷售點：7-11
同樣由日本直送嘅百力滋，濃甜嘅朱古力醬包住粗粒杏仁碎，口感豐富之餘，更可食得出杏仁經過煎製，有陣陣嘅烘焙香味。
7-SELECT x 伊藤久右衛門「宇治茶の味」系列
銷售點：7-11
便利店又同日本京都宇治抹茶品牌合作啦，6款期間限定嘅甜品中，最推介嘅係宇治抹茶紅豆忌廉銅鑼燒，唔止內餡係抹茶忌廉，就連餅皮都加入埋抹茶粉，食落啖啖都係抹茶嘅甘香，而且仲有微甜嘅紅豆餡料添。至於抹茶忌廉泡芙則係一貫嘅水準， 內餡嘅茶忌廉濃郁滿足。
另一特別推介嘅係宇治焙茶紅豆忌廉蛋糕，忌廉幼滑，蛋糕軟熟，焙茶微甘帶甜，仲加多幾粒紅豆，整體味道平衡。而抹茶紅豆忌廉瑞士卷則以日本麵粉烘焙而成，口感軟綿，茶香清雅。
早餐之選則有抹茶吉士紅豆包同首次登場嘅宇治抹茶吐司，後者以日式烘焙技術製作，口感鬆軟，帶淡淡抹茶香。
華園酸菜魚味焗鱈魚柳
銷售點：7-11
唔少人都係酸菜魚嘅Fans，但當酸菜魚變成零食後會係咩感覺？有零食品牌推出酸菜魚味嘅焗魚柳，不過味道就同想像中有啲分別。冇錯係幾香口幾惹味嘅，仲有陣陣刺激嘅辣香，煲住劇睇住波食都一流，仲好夾啤酒添，不過可惜就爭緊少少酸菜嘅精髓，酸度唔夠。同埋平時食開嘅酸菜魚都係軟腍嘅口感，變咗偏硬身嘅魚柳條就有少少唔太慣。
OOHA 檸檬蜂蜜味汽水
銷售點：各大便利店及超巿
由Anson Lo代言嘅汽水，出咗新味呀。繼續都係0糖0卡0脂肪，今次係檸檬蜂蜜味，味道清爽微甜，好啱而家春夏之交嘅時份飲。即日起至5月26日期間，到任何一間指定商戶購買OOHA®產品滿港幣$30，即可透過指定廣告#上嘅QR Code登入網站，上載收據參加抽獎！大獎可以得到「限量版 OOHA® World 驚喜禮盒」（26名），內有巨型A0海報、紀念卡、杯墊等紀念品（款式隨機），幸運兒更有機會得到證書連Anson Lo親筆簽名啊！（詳情按此）
4月20日更新
日本直送抹茶甜品
銷售點：7-11
抹茶控想隨時食到抹茶甜品，去便利店行個轉就得。今期有3款由日本直送嘅甜品，包括TAIYO雙層抹茶牛奶年輪蛋糕、MANNEKEN京都抹茶味窩夫，同埋IZUMIYA抹茶長崎蛋糕。雙色嘅年輪蛋糕蛋香十足，仲有淡淡抹茶香，口感柔軟；至於鬆軟嘅長崎蛋糕，抹茶味則更濃郁。
華園、鋒味 齋燒鵝味爆谷
銷售點：7-11
細個成日食嘅齋燒鵝，大個變咗做爆谷？華園同霆鋒主理嘅鋒味兩大品牌最近合作推出咗齋燒鵝味嘅爆谷，神還原經典嘅味道，一盒內有兩大包，但呢啲香口嘢一拎上手就停唔到，兩包都應該好快食晒。
H.K. Lovecraft 盼望Table Lager
銷售點：各大精釀啤酒店、酒廠網站
呢罐係本地精釀品牌H.K. Lovecraft 出嘅第一罐茶啤啊，選用立山小種茶葉釀製。酒精濃度比一般啤酒低，得3.8%，而且酒體輕身，茶味突出，仲帶有龍眼嘅甘甜同埋陣陣煙燻香味，好啱一班朋友gathering嘅時候暢飲啊。
CW香蕉麻糬朱古力曲奇、Hershey's朱古力麻糬曲奇
銷售點：7-11
以前去親韓國都被點名要買返嚟嘅朱古力麻糬曲奇，而家香港唔止有得賣，仲有新口味添。香蕉麻糬朱古力曲奇，一打開包裝陣香蕉味就湧出嚟，香蕉麻糬夾心煙韌甜身，外層曲奇鬆軟。
伊藤 迷你碎朱古力曲奇 / 迷你牛油曲奇
銷售點：7-11
日本直送嘅曲奇，牛油味濃香，細細粒一啖一粒嘅size，絕對令人唔覺唔覺好快就自私食晒一包。另外朱古力味嗰款仲有埋朱古力粒，口感更豐富。
UHA 味覺糖 甜粟米味/金奇異果果汁味
銷售點：各大便利店及超巿
軟糖口味愈嚟愈多，出開果汁糖系列嘅Cororo，今次輪到金奇異果味，酸酸甜甜仲要有幾粒奇異果籽喺中間，幾唔錯啊；但點都冇估到居然會有隻粟米味嘅糖，嗒得出陣陣粟米甜香，但就唔係太習慣粟米變咗呢隻texture咯。
4月17日更新
POLS 迷你雲呢拿雪糕球
銷售點：Market Place、惠康
北歐雪糕品牌POLS又有新品登陸香港啦，今次係迷你雲呢拿雪糕球。牛奶朱古力脆皮裡面係用頂級拉脫維亞牛奶製作而成嘅雲呢拿雪糕，外脆內滑，而且Bite Size幾方便食。另一加分點係包裝選用可生物分解嘅紙盒，為環保出一份力啊。
4月12日更新
維他奶 VitaOat朱古力燕麥奶
銷售點：各大便利店及超巿
VitaOat繼原味燕麥奶後，4月最新推出朱古力燕麥奶，同樣源自100%燕麥，口感順滑。而且係低糖配方，加入可可粉後味道依然唔會太甜。唔單止適合有乳糖不耐症或者素食者享用，亦好啱控制體重或者注重健康嘅朋友仔飲呢。
4月4日更新
Hoegaarden 果味白啤酒雪葩
銷售點：7-11
Hoegaarden出雪葩啊！！呢兩款雪葩早前喺Clockenflap期間曾免費派發，而家喺便利店都有得賣啦！暫時見到嘅有兩款口味，都係果味白啤酒系列——紅桑子白啤酒味同蜜桃白啤酒味。兩者都食得到有果香，不過甜味散得好快，然後啤酒嘅苦味就開始滲出嚟。比較嚟講，會投蜜桃味多啲，但試過就夠咯，之後都係飲返酒會開心啲。btw，提一提，兩款雪葩都有2.5%嘅酒精架。
3月30日更新
日清 摩斯漢堡撈麵
銷售點：7-11
撈麵口味愈出愈多，但點諗都諗唔到連MOS Burger味都有？！仲要有2款添，分別係芝士漢堡味同辛味熱狗味，2款都係參照MOS Burger嘅食品創作研製調味粉。雖然食落同burger係有啲分別，但係番茄、肉醬同洋蔥味都算還原到部分感覺嘅。
Hankyu x UHA味覺糖高級版Cororo仿果實軟糖
銷售點：city'super時代廣場及海港城店限定快閃店 (即日起至2023年4月30日)
果汁糖幾時都好有market，無論大人細路都鍾意食。今次殿堂級日本百貨公司Hankyu喺city’super開pop-up店，引進味覺糖高級版Cororo仿果實軟糖，粒糖仲要係普通版嘅1.5倍，以日本果汁製作，內層有仿種子嘅啫喱珠，啖啖都果香感十足，6款口味包括有香印青提、巨峰提子、甜王士多啤梨、法蘭西梨、湘南黃金蜜柑同佐藤錦車厘子。開飯仔最推介黃金蜜柑，內有柑橘果皮，微甜清新。
city'super x Deadman比利時濃金黃蘋果香檳艾爾啤酒
銷售點：city'super獨家發售
city’super聯乘本地精釀啤酒廠Deadman Brewery，推出以香檳Brut風格釀製嘅啤酒，仲要融入咗超過300公斤嘅日本進口蘋果，不過飲落嘅蘋果味道又冇想像中咁突出，反而有些少丁香同梨等味道，微甜得嚟亦有微微香檳酸澀之感。
卡樂B 章魚燒味/關東煮味薯片
銷售點：各大便利店及超巿
卡樂B又又又有新味，今次係兩款日本小食嘅味道。關東煮味其實係講緊個湯頭嘅味道，微鹹中帶點甜，但老實講其實唔多食得出係關東煮味；反而章魚燒味嘅還原度高啲，係面層日燒醬汁加蛋黃醬加海苔嘅味道。
萬代 多啦A夢4D口袋朱古力
銷售點：7-11
多啦A夢嘅粉絲實好鍾意，雖然細細盒，由包裝到造型都好靚。百寶袋feel嘅小盒，打開會有多款唔同道具造型嘅朱古力，隨意門、記憶麵包、縮小電筒等等都有，好cute cute，食之前仲可以玩個小測試睇下自己認唔認得晒咁多種道具。
春日井立頓 檸檬茶軟糖
銷售點：7-11
平時成日飲檸茶嘅朋友仔，要試下呢隻檸茶軟糖，無論係紅茶香定係檸檬酸嘅平衡都做得相當唔錯，甜度都適中，好似飲緊杯咬得嘅檸茶咁。
3月28日更新
童星超闊條麵 麻辣味/鹹蛋味
銷售點：各大便利店及超巿
細個嗰陣點會估到呢隻零食會出鹹蛋味呀？聞落真心香嘅，不過可能expectation太高，食落反而唔覺得太重味，輕咗少少；麻辣嗰隻就幾刺激，後勁凌厲，feel到個喉嚨熱熱地。
FRITOLAY JP高級焦糖爆谷
銷售點：7-11
黑金色嘅包裝有種高級感，焦糖味爆谷口感香脆，陣陣甜香，就咁一粒一粒食又得，加埋雪糕一齊食都夾，焦糖控試得過，但小心會食到停唔到口。
卡樂B Chill 辣味蝦條
銷售點：各大便利店及超巿
呢輪多咗啲辣零食，蝦條又有Chill辣味，個名改得幾好，因為真係辣辣地但又唔會令你辣得好辛苦，輕輕送少少刺激出嚟，點到即止。當然如果你一次過連啪十幾廿條，就唔敢擔保咯~
GODIVA 春季片裝巧克力花形鐵盒
銷售點：GODIVA門巿
GODIVA最近趁住春天兼臨近復活節，推出咗春季限量系列，其中呢個粉紅花花鐵盒深得女生們嘅歡心，內裡有2款朱古力，分別係片裝榛子黑朱古力，同50%黑朱古力，用嚟送禮都幾啱。
3月21日更新
SunLavieen長崎蛋糕卷蛋 / 抹茶長崎蛋糕卷蛋
銷售點：7-11
一盒已經預先切好4件嘅長崎卷蛋糕，以日本產雞蛋製成，口感軟熟，仲有陣陣蛋香，充滿驚喜，可以話係便利店中嘅高質甜品之一，而且好就好在就算有cream都感覺輕盈；而抹茶嗰款則選取京都産宇治抹茶製成，微甜中帶甘香。
SunLavieen軟滑焦糖布丁撻 / 窯燒朱古力撻
銷售點：7-11
日本直送嘅兩款甜品撻，分別係焦糖布丁同窯燒朱古力味，前者忌廉係以北海道産生乳100%製成，加埋自家研發嘅吉士醬同焦糖醬，甜度唔算高，反而仲有微苦焦糖香，但感覺同焦糖布丁嘅還原度就仲爭咗少少蛋香，同埋可能因為冷藏過嘅關係，撻底唔夠脆；至於後者則選用六甲山麓牛乳同加納產可可豆朱古力，朱古力味極其濃厚。提一提返幾款甜品都係先儲存喺冰格，到享用前3-4個鐘放返入4-10℃雪櫃解凍嘅效果最佳。
雀巢 抹茶紅豆雪米糍
銷售點：各大便利店
抹茶紅豆呢對最佳拍檔，拍埋一齊點都唔會失場。今次呢款雪米糍糯米皮薄軟糯，內餡抹茶雪糕同紅豆蓉甜甜香香，如果紅豆蓉嘅比例再多少少會更開心。
Hershey's黑白朱古力/碎朱古力/白碎杏仁曲奇
銷售點：7-11
如果你係呢個朱古力品牌嘅fans，又有新款追啦。最新推出嘅鬆軟曲奇系列，都幾大塊下，有一隻手咁大呀！建議食用前放入微波爐輕輕加熱，香味就更突出。無論邊款曲奇都好，都幾甜身，有埋朱古力粒嗰啖就更甜，絕對係為甜魔而設。
FRITOLAY JP牛油果味玉米片
銷售點：7-11
好多人都鍾意食牛油果，見到呢款新出嘅牛油果味玉米片或者都會有興趣想試。報一報告返先，口感酥脆，帶微微cream cheese嘅酸香，不過認真，就唔好期待會食到牛油果味啦，就咁食又得，加入沙律等當脆脆增加口感都唔錯。
淳。茶舍 玉露、雲抹
銷售點：各大便利店及超巿
今次唔係出新味，而係升級原有口味。玉露同雲抹均採用100%來自日本靜崗、奈良茶葉，前者甘甜，後者鮮而不澀。而重點係嚟緊3月29日至4月30日期間，只要買淳。茶舍®及紅茶花伝™ Craftea™指定金蓋產品，即可參加抽獎，仲有機會贏到一票難求嘅舞台劇《愛我別走》門票！
3月14日更新
7-SELECT x PABLO 甜點系列
銷售點：7-11
日本人氣芝士撻專門店PABLO同便利店嘅聯乘又返嚟啦，今年共有4款甜品同2款麵包。
先講最吸睛嘅一定係燒粟米造型白桃夾心乳酪芝士慕絲蛋糕，像真度甚高，雖然唔明點解白桃味但整粟米造型，但係幾可愛嘅。切開有乳酪芝士忌廉，同埋白桃夾心，甜度十足。
日本直送嘅海鹽焦糖芝士忌廉泡芙，則貫徹過往泡芙嘅水準，泡芙鬆軟，有空氣感；而內餡嘅芝士味忌廉雖然都幾多，但味道輕盈，稍為被濃郁嘅海鹽焦糖醬蓋過。
白桃芝士忌廉瑞士卷同白桃乳酪芝士忌廉蛋糕同樣都係由日本直送，前者採用100%日本麵粉製成瑞士卷，桃味夠晒甜身；而後者忌廉帶有乳酪酸味，蛋糕偏濕潤，但反而桃同芝士味都略為太輕。
兩款麵包分別係芒果芝士忌廉包同芝士忌廉包，同樣以100%日本麵粉製成，前者中間有薄薄一層嘅芒果醬；後者則有滿滿嘅芝士忌廉。
湖池屋ｘPepper Lunch蒜香醬油味/蜜味蒜香醬味薯片
銷售點：7-11
相信大家對Pepper Lunch嘅黑椒牛肉飯一定唔會陌生，今次變成薯片口味，應該都會幾多人想試。薯片係V-Cut款，口感較硬脆。無論係蒜香醬油味又好，蜜味蒜香醬又好，都係黑椒味比較突出，味道好濃，食多幾塊會開始覺得鹹。蜜味嗰款相對平衡會好啲，鹹香中帶有微甜。
3月9日更新
卡樂B 鬼之麻辣味波浪薯片
銷售點：各大便利店及超巿
又有辣嘢！呢隻薯片用咗花椒同辣椒粉等多種辛香調味料製成，呈波浪紋狀。一開封就聞到啲麻辣香味，做好晒心理準備之後食，反而又冇想像中咁刺激，後勁嘅辣感喺喉嚨度慢慢出返嚟，輕輕拮下拮下咁。
一合缶 埼玉縣24酒藏、久保田 雪峰 純米大吟釀
銷售點：City’super「清酒祭2023」 (3月8-22日)
清酒祭又返嚟啦，sake迷可以留意下。今年有20家酒藏直送超過200款日本酒過嚟，並以露營為主題，介紹多款好啱露營、燒嘢食pairing嘅清酒。其中特別推介細細罐，方便攜帶嘅一合缶 埼玉縣24酒藏 集合版（24罐入）。24罐清酒集合咗埼玉縣唔同酒造嘅風土同傳統技術，純米原酒、純米吟釀、純米大吟釀等都有；另外，如果BBQ嘅話就最啱配襯嚟自朝日酒造嘅久保田 雪峰 純米大吟釀，以山廢酒母釀造，酸度圓潤，香醇旨口。喺清酒祭期間，買滿指定金額更可獲贈禮品，例如保溫瓶等。
Monster Energy - Ultra Paradise
銷售點：各大便利店及超巿
今次嘅全新口味倒出嚟係青綠色，味道酸酸甜甜，係集合咗奇異果、檸檬同青瓜嘅風味，飲落幾清爽嘅，重點係無糖兼零卡路里呀。
3月2日更新
Binggrae Cledor 韓國直送雪糕批
銷售點：7-11
4款雪糕批分別係美式特濃朱古力、濟州綠茶、韓國雪香士多啤梨同馬達加斯加雲呢拿味。全部都有層脆脆地嘅朱古力脆片喺外層，最濃味當然係朱古力啦；綠茶嗰隻係採用濟州早春第一摘綠茶磨成嘅綠茶粉製作，味道偏清新，aftertaste仲有少少回甘添；至於士多啤梨，有粒粒果肉增加口感，果味濃郁，微酸微甜。
樂天 特濃軟心朱古力、特濃軟心朱古力脆脆雪條
銷售點：Circle K
同樣由韓國直送嘅雪條，特濃軟心朱古力味外層係朱古力雪糕，中間夾住軟心朱古力，有雙重口感，雖然唔算話超濃，但都幾甜下；至於脆脆嗰款，就係中間再夾多埋脆香米，令口感更豐富。
Lotte 富士山河口湖完熟芝士小蛋糕、名古屋栗子味朱古力小蛋糕
銷售點：7-11
日本直送嘅兩款小蛋糕，口感鬆軟，細細件兩啖食完。芝士嗰款嘅芝士味唔太濃郁，反而畀朱古力味蓋過咗；栗子嗰款就幾有驚喜，雖然外層有朱古力包住，但仍難阻陣陣甜香嘅栗子味湧出。
森永 班戟味Choice餅、楓糖味瑪麗餅
銷售點：7-11
一向推出唔少甜品嘅呢個品牌，今次出兩款餅都係加入咗楓糖製作。前者雖然話係班戟味，但拎上手一聞都係以楓糖味為主，好彩食落又唔算話好甜，下午茶食兩三塊都唔會好重罪惡感。至於圓形嘅楓糖味瑪麗餅，則係日本森永期間限定嘅新品，但楓糖味同樣唔算重，只係輕輕帶過。
甘樂Marosh 葡萄蘇打 / 乳酪蘇打 / 香橙蘇打味棉花糖
銷售點：7-11
3款口味嘅棉花糖，都有激活味蕾嘅效果。事關隻棉花糖就唔係完全軟心嘅，略有咬口，咁一路咬就一路畀面層嘅酸粉刺激，眼瞓時嗒一兩粒即刻醒咗。
2月15日更新
少爺啤酒 情人節限定啤酒
銷售點：Circle K
2月係情人節嘅月份，少爺啤亦特意推出2款酸酸甜甜嘅限定酸啤，酸啤可以話係近年精釀界嘅潮流。2款口味分別係蜜桃酸啤同紅莓酸啤，前者加入新鮮水蜜桃，甜得嚟有微酸；後者則加入大量新鮮紅桑子，酒體亦呈深粉紅色，睇見都浪漫。無論聞落定飲落都有陣陣莓酸，即使冇飲開酸啤嘅朋友亦容易接受。
湖池屋 海膽味脆格
銷售點：7-111
見到海膽味嘅零食，的確會有份好奇心想試。呢隻脆格海膽味唔算話好濃，無海膽嘅甘但有海膽嘅甜，做定少少期望管理再試係幾OK嘅其實，加上酥脆口感，好快就可以食晒成包。
萬代4D軟糖 星之卡比
銷售點：7-11
類似嘅包裝之前應該都見唔少，但每次見到係自己嘅本命時，都係會忍唔住想買。今次輪到星之卡比做主角，係香甜嘅桃味呀，口感軟得嚟幾chewy ，卡比仲有2款表情添，好qq。
新世紀福音戰士玻璃杯 / 水樽 連糖果
銷售點：7-11
EVA粉絲呢期行過便利店好易守唔住，有太多周邊出咗喇。其中呢2款玻璃杯同水樽都印有EVA 初號機同特務機關 NERV 標誌，夠晒經典，隨盒仲會附送一包糖仔。
2月13日更新
情人節要食朱古力，呢間餅店乘勢推出情濃朱古力禮盒，包括有岩鹽朱古力蛋卷同首度推出嘅朱古力脆曲奇。前者以純天然黑朱古力磚製作，香脆但唔易散，朱古力味濃香得嚟又帶有微鹹；後者則較為甘香，仲有牛油香添。
2月2日更新
Carb Balance 烤芝士/朱古力蛋糕
銷售點：7-11
一盒6件蛋糕仔，2款口味分別係烤芝士同朱古力味，兩者均減咗60%嘅糖分，所以食落又唔會話好甜膩。前者帶有燻香嘅芝士味，後者則係相對輕身，甚至帶少少微甘嘅朱古力口感。
TENKEI 朱古力蛋糕
銷售點：7-11
一袋有5件獨立包裝嘅朱古力蛋糕，選用信州雞蛋製作，甜度較上面嗰款高，但開心位係間中可以食到一粒粒朱古力，增加口感。
SANRIO創意朱古力工具套
銷售點：7-11
情人節親手做朱古力送畀另一半，夠晒冧豬。呢個套裝喺便利店就買到，齊晒模具同唧唧筆，仲有比利時原材料朱古力，盒底有說明教你點整，步驟簡單，包保零失敗。如果另一半係Ahiru no Pekkle、Little Twin Stars或者Hello Kitty嘅fans就真係冇藉口唔整了。
SANRIO心形朱古力棒棒
銷售點：7-11
氹SANRIO粉絲開心其實好簡單，突然送呢幾支心形朱古力棒棒畀佢哋，都有小驚喜。話說啲朱古力都係用比利時朱古力整架。
1月27日更新
DYDO X PH檸檬紅茶
銷售點：7-11
由日本入口嘅檸檬紅茶，用足成粒檸檬去榨汁架，另外仲加咗檸檬皮同香茅提取物，難怪飲得出比一般檸檬茶嘅檸檬味更為突出，錫蘭紅茶葉亦令茶香味濃，惟一要挑剔係甜咗少少。品牌同時仲出咗香桃紅茶味。
1月19日更新
IZUMIYA蜂蜜長崎蛋糕
銷售點：7-11
日本早餐嘅味道，香港便利店都搵到。由日本直送嘅蜂蜜長崎蛋糕，口感鬆軟，帶有微甜蜂蜜香。底層有一排砂糖粒，係幾有口感嘅但同時都好甜。
Taiyo 士多啤梨年輪蛋糕
銷售點：7-11
同樣由日本直送嘅甜品，士多啤梨年輪蛋糕，不過無論顏色同食落都唔算好士多啤梨，比想像中輕身，口感偏實淨。
少爺啤酒 《鴛》IPA 、《鴦》Stout
銷售點：Circle K
茶記有咖啡奶茶鴛鴦，精釀啤酒都有？！本地精釀啤酒品牌少爺啤酒趁住新年，出咗兩隻經典啤酒賀歲應節，仲可以溝埋一齊飲，點睇？經典IPA《鴛》甘苦味中帶有柑橘香，而Stout《鴦》則有較濃嘅烘焙香味同朱古力味，兩者各自各飲又得，溝埋一齊飲又得。溝埋嘅話Stout會變得輕身咗，IPA嘅苦澀感亦低咗。
生力 朱古力啤酒
銷售點：7-11
難得見到生力啤有新嘢，朱古力lager，開罐後首先聞到嘅係突出嘅朱古力味，不過飲落就唔算話好濃味，反而有少少似攢盒內嘅金幣朱古力味。如果玩開food paring嘅，可以試下夾埋啲朱古力食品一齊享用，提升朱古力甜味嘅輔助效能唔錯。
Tenkei 豆沙奶油三明治
銷售點：7-11
一包8件獨立包裝，分別有紅豆蓉同栗子蓉2款口味，口感鬆軟，味道微甜，細細件作為下午茶過下口癮都幾啱數。
MANNEKEN朱古力味窩夫
銷售點：7-11
另一款由日本直送嘅甜品，感覺偏甜，無論朱古力味定係甜味，都略為單調咗少少。不過就幾有飽肚感。
KITAGAWA朱古力甜甜圈
銷售點：7-11
雖然呢個甜甜圈細細包，包裝又唔算好吸引，但唔建議miss咗佢。甜甜圈外脆內軟，啖啖濃郁朱古力味，甜魔表示好can。
1月16日更新
Asahi 新春限量版Asahi Super Dry
銷售點：各大便利店及超巿
日本啤酒Asahi Super Dry換上新裝，圖案設計糅合日本傳統Origami工藝及數碼摺紙藝術，加上啤酒清爽口感，務求同大家一齊「朝氣開好年」。
1月6日更新
Beard PaPa’s 年輪蛋糕家庭裝 / 片裝蛋糕
銷售點：7-11
嚟自大阪嘅人氣泡芙店出咗唔同包裝嘅蛋糕，年輪蛋糕一包有12件，Bize Size最啱開心Share。直送片裝蛋糕就有雲呢拿、豆乳香蕉、芝士共三款口味，口感濕潤而且甜度適中。
卡樂B 泡菜炒年糕味薯片 / 韓式烤魷魚味薯片
銷售點：各大便利店及超巿
兩款期間限定韓式新口味，泡菜年糕味食落的確係韓式泡菜嘅酸酸辣辣、食多兩塊甚至覺得幾開胃，不過就唔係好聯想到年糕囉。韓式烤魷魚味係V-Cut薯片，聞落魷魚香好勁，食落就係魷魚醬嘅鹹香。
卡樂B 李錦記海皇XO醬味薯片
銷售點：各大便利店及超巿
用本地工廠新鮮製作嘅李錦記海皇XO醬整成薯片，聞落XO醬嘅蝦味特別明顯，鹹鹹香香咁，食多幾塊就會開始覺得辣，係過癮嘅辣味嚟。
Pokka Sapporo 杯裝湯
銷售點：7-11
冬天去日本必飲熱粟米湯嘅朋友仔，喺香港都可以買呢個牌子嘅杯裝濃厚粟米湯嚟過下口癮嘅。另外有南瓜湯同參雞湯，參雞湯飲落其實無乜人參味，所以怕苦嘅朋友唔使驚。勝在口感濃稠更有一粒粒雞肉，隨時隨地可以飲杯熱湯暖下胃係幾窩心嘅。
褔 韓辣福氣鍋禮盒
銷售點：百佳超級市場、TASTE、fusion
韓風繼續吹！連香港經典品牌都推出韓式禮盒，最加分嘅係裡面有埋不鏽鋼韓式褔氣鍋，明火同電磁爐都用得！套裝包括韓辣味湯麵、辣雞味撈麵、芝士辣雞味撈麵同上湯伊麵。買嚟送畀鍾意食韓國菜嘅朋友都幾啱。
文：Kar、Cathy.H
