臨近年尾，又有一系列聚會等緊大家，最好就係約埋朋友舒舒服服食餐好嘅！今次同大家分享兩間環境氣氛一流、食物高質嘅半自助餐餐廳，佢哋嘅午餐同晚餐用OpenRice預訂都有優惠㗎，即睇有咩好食啦～
復古格調酒店扒房酒吧
餐廳以20年代美國禁酒時期為主題，融入格調紅磚牆同華麗吊燈設計，環境舒適，好似置身喺美國當地嘅扒房一樣。菜單由擁有超過26年烹飪經驗嘅主廚陳超明師傅主理，出品有水準。
3道菜半自助午餐包括自助任食頭盤沙律、自選主食一份以及甜品一份，選擇豐富之餘，每道菜都好高質。約多幾個朋友一齊食，仲可以享有4人同行1人免費優惠，計埋加一服務費人均$372.5就食到！
自助任食吧長枱兩邊擺放唔同類型食物，一邊多達15款新鮮沙律菜同自家製沙律，當中特別有牛肉他他配多士、雞蛋椰菜花沙律、西西里紅蝦他他杯等。
另一邊則有精選凍肉同特選芝士區，前者選擇豐富，包括意大利香腸、一系列醃製火腿、法式雞肉鵝肝醬配龍蒿等等。後者則有原個圓柱形帕馬森芝士霸氣坐鎮，食客可以自行刮取芝士，亦可以挑選旁邊已分割好嘅各種芝士。
主菜方面，客人可以8選1，當中有海鮮、羊扒、和牛漢堡、黑毛豬架等選擇。牛魔王推介可以揀澳洲安格斯牛腹肉或者升級為美國安格斯肉眼，後者牛扒表面有明顯烤紋，外層帶微焦感；切開中間會見到粉嫩肉心，入口軟嫩又重牛肉香。
澳洲羊扒同樣吸引，熟度烤到啱啱好，伴有薯菜同酸酸甜甜嘅紅酒醃洋蔥，一併食好開胃。
另推薦和牛漢堡，漢堡扒比例由大廚調配，以一比一澳洲九級和牛肉眼同埋美國頂級紐約西冷製成，平衡肉味同油香，淋上自家調製車打芝士醬更加邪惡啊！
最後有精選甜品，劃上一個甜而不膩嘅滿足結尾。
套餐仲可以升級2.5小時無限暢飲精選氣泡酒、紅酒及白酒。
Prohibition 扒房．酒吧 
地址：黃竹坑黃竹坑道180號海洋公園香港海洋公園萬豪酒店C區地舖
意大利南部風情餐館
餐廳有大玻璃同浪漫燈光真係幾時都咁有feel～呢度主打意大利南部菜式，晚市仲會供應海鮮同沙律自助吧，同摯愛一齊慶祝特別日子就啱晒啦。
頭盤有沙律吧同冰鎮海鮮打頭陣，食客最愛嘅海鮮區分別有長腳蟹、青口、蝦、蜆同埋生蠔，睇見都流晒口水啊～而沙律吧就提供凍肉、芝士、西式沙律等，賣相精緻，相當吸引。
主菜供應8選1，海鮮迷要試波士頓龍蝦扁意粉，拆肉龍蝦彈牙富鮮味，食落啖啖肉，搭配煙韌掛汁扁意粉，整體好惹味。
嚟到意大利餐廳，點可以唔食Pizza呢？四重芝士薄餅分別用咗Gorgonzola、Scamorza、Parmesan同Mozzarella共4款唔同風味嘅鹹香芝士製成，配埋無花果同核桃，集清新同惹味於一身。
香煎三文魚配芒果莎莎醬擺盤精緻，七彩鮮豔嘅時蔬拼湊成園藝風格咁，好啱相機食先！香煎三文魚油脂感豐富，蘸上酸甜醒胃嘅芒果莎莎醬，整體好夾。
多達10款甜品以自助方式供應，當中有巴斯克蛋糕、泡芙、冬甩、朱古力撻等，仲有大人小朋友都鍾意嘅朱古力噴泉𠻹。
Velo Italian Bar & Grill
地址：尖沙咀梳士巴利道18號維港文化匯K11 Musea 1樓103號舖
主持：Nicole
文：Sharon
編：Cathy
相：Michael
片：YanYan
