除咗人人都知「路邊野菇不要採」之外，仲有啲咩關於野生食用菌，係你一定要識嘅？今次專誠搵嚟喺香港開咗多間野生食用菌專門店嘅負責人Nelson，畀5大貼士大家，分享點樣揀到新鮮嘅野生食用菌，返到屋企又應該點處理。

 野生食用菌專門店負責人 Nelson

Q: 邊種野生食用菌最貴？邊種較平？

 羊肚菌

以乾嘅野生食用菌嚟講，野生羊肚菌應該係最貴嘅，零售價大約 $7500一公斤。佢嘅價格取決於幾樣因素，其一係因為佢嘅供應比較少，每個季節嘅產量有時都唔一樣。另外就係佢嘅功效比較好。例如人體必須有嘅19種胺基酸，食一隻羊肚菌已經齊晒，營養價值非常豐富。

至於相對地平少少嘅野生菌，則係黑木耳。野生黑木耳一公斤大約$400、$500。

Q: 係咪人人都啱食野生食用菌？

女士們，或者手腳冰冷嘅朋友仔會比較適合。你煲完個羊肚菌湯飲完後，係滋陰補腎嘅，飲完身體會好溫暖，咁手腳冰冷嘅情況亦應該可以改善。

而有尿酸高嘅人，就唔太適合食野生食用菌喇。

Q: 點樣揀新鮮嘅野生食用菌？

揀新鮮野生菌嗰陣，最主要就係拎上手，秤秤睇下係咪「墜手」，睇下水份有冇流失，咁就可以睇到新鮮度係咪足夠。新鮮嘅野生食用菌都係墜手嘅、 飽滿嘅，唔會有皺皮。如果水分少咗，通常係因為放耐咗，乾咗，咁就即係唔夠新鮮喇。

 左邊嗰嚿嘅傘頭未開，相對新鮮

揀雞樅同松茸嘅話，可以睇睇佢哋嘅傘頭。如果傘頭未開嘅話，就相對較新鮮。

羊肚菌呢，就可以睇佢嘅帽頭同帽腳嘅比例，比例要適中。例如腳長頭細，或者身長腳短都係唔太好嘅。

Q: 咁買咗返屋企後，點樣保存最好？

如果乾菌係未開封嘅話，放室溫都可以，但最好當然係放喺雪櫃度啦。

至於新鮮嘅野生菌，則建議先搵一啲抹手紙，逐隻包好，再放入紙袋入面，然後將紙袋放入雪櫃，咁就可保存得好啲。如果就咁攤開放喺雪櫃度嘅話，就會抽乾佢嘅水分。

Q: 點樣處理野生食用菌最好呢？係咪唔可以用水洗？

又唔完全係唔可以嘅，主要因為用清水洗野生菌嘅話有2個問題，第一，會令菇菌原本嘅香味流失咗啲。另外，當佢哋入水後，煮嗰陣啲水又會滲返出嚟，又係會令真味流失。

大家可以搵把刀仔慢慢刨走啲泥，又或者搵塊濕布抹乾淨後，再用乾紙巾索乾，咁就可以保留到野生菌原本嘅香味。不過當然，功夫比較多。如果想折衷少少嘅話，都可以快速用清水清洗後，但一定要即刻用乾布索乾返。

鳴謝：菁雲

文：Kar
相+片：Tony

【OHealth!】 食用真菌篇

5種常見食用真菌介紹及功效   (傳送門按此)
輕鬆食譜跟住整 迷你蘑菇漢堡 （奶素/純素） (傳送門按此)
8大推介 真菌餐廳集合 中西日式都有  (傳送門按此)
歪歪實試！尖沙咀松露主題餐廳 邊道菜式最濃味？ (傳送門按此)
歪歪實試！尖沙咀新派中菜 大推松茸羊肚菌海膽燴飯 (傳送門按此)
營養師拆解坊間菇菌類零食 標榜全天然/營養豐富 就真係健康？ (傳送門按此)