「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下太子。
松茸餃子 餃掂手工餃子雲吞專門店
一個人去食返碗餃都唔錯吖，簡單方便快捷。呢間手工餃店有款松茸餃，講到好特別咁，都值得一試嘅。餃皮薄薄地，如果就咁食略嫌松茸味唔夠濃嘅，可以再加松茸醬，香味即係大增。另外仲可以點埋其他芝麻醬、青瓜醬、四川辣醬之類。而芝士控唔使諗，一定嗌香煎軟心芝士餃，外層然後中間嘅芝士軟軟der熱食仲有拉芝效果，自己一個食都可以好開心。
五香蝴蝶腩車仔麵 十六座車仔麵
車仔麵亦係一人飯堂嘅不二之選。一大碗麵，鍾意揀幾多款餸都得，好自由。而如果嚟到呢間，就記得點最出名嘅五香蝴蝶腩同咖喱魷魚。呢兩樣都好入味，索盡晒啲湯底咁，呀，仲有車仔麵好少有得揀嘅流心蛋做餸。而除咗有一般嘅油麵幼麵揀之外，菠菜麵都有呀！
蚵仔大腸麵線 好媽媽台灣館
呢間台灣餐廳嘅蚵仔大腸麵線都幾大碗，而且原隻蚵仔都幾新鮮，仲食到淡淡嘅海水味。而另一款台灣名物——牛肉麵，同樣都係好適合一個人快速食完就走嘅原則。牛肉腍身，浸埋落湯底令到湯嘅味更香濃，麵條亦算彈牙。
【一個人開飯】系列： |
山東風味 阿純山東餃子
又係餃子店。不過呢間係富有山東口味嘅餃子店，呢度啲餃子全部都係人手整嘅，所以隻隻大細同個樣都有啲參差，但工夫嘢，冇計咁多啦。除咗有外邊比較少食到嘅京蔥羊肉餃同西洋菜餃外，都有其他山東小食，仲有羊肉餡餅、山東燒羊扒等等，鍾意食羊嘅人啱晒，自己嚟盡情食個夠。
開心果糊 蘭苑饎館
呢度最多人叫嘅一定係佢哋嘅甜品：開心果糊或者開心果糕，因為都真係好少地方有得食。雖然比想像中冇咁濃開心果味，但亦唔算甜，而且幾香滑。不過唔好以為呢度淨得甜碞食，佢哋仲有主菜、正餐㗎！好似蒸龍利柳、蒸雞呀咁，食落係幾有屋企飯餸feel。一個人冇飯開，咪去食下「家庭飯」咁。
文：Kar