三兩知己想靜靜傾偈旺區有咩好介紹？

日日返工返學都有唔少壓力，有時想話放工後約返個朋友仔傾下計談下心，或者只係簡簡單單吹下水咁，但都好似好難。難唔係難在夾時間（雖然呢個都難），最難係搵個地方可以靜靜地，慢慢坐，邊食邊傾又唔會趕你走嘛。你知而家周圍都話有入座限時，個零兩個鐘就話要你埋單，食得嚟又傾唔到計，就算真係傾到都deep唔到，唔通下下都落bar咩？不過你哋有開飯仔呢個朋友就唔使愁，呢度有5間位於旺區嘅餐廳，都幾啱談心㗎，兄弟姊妹團要傾婚禮嘅嘢都一樣啱。

文青café 　　小房子

Photos by 為食MoJil & cwhanzawanaoki
呢間喺旺角嘅樓上café，位置上係喺冇咁旺嘅地方，而且冇大招牌掛出嚟，一個唔留神就會行過咗轉上去嗰條樓梯。上到樓，係一間以溫室花園做主題嘅café，每張枱枱櫈櫈都唔一樣，有矮櫈有梳化櫈，所有嘢都好似好隨意咁，畀人一種好relax好free嘅感覺，幾個知己談心就最啱嘞，而且全部花茶、熱飲都可以無限次再添，唔怕會傾到口乾！

嘢食方面，款式就唔算好多，但都幾吸引，以輕食為主。想食蛋糕嘅可以諗諗豆腐蛋糕或者甘荀蛋糕，都係平時較少見嘅口味，前者芝士味輕，豆味重；後者感覺同樣清新，另外仲有潮食水玄信餅！

好傾好食　　紅粉佳人

Photos by tempbond & sillysillya
呢間餐廳嘅位置同樣喺鬧巿中嘅一個較易被忽略嘅角落，但其實默默都開咗十幾廿年。入到去燈光暗暗地，都幾浪漫㗎哈哈，不過浪漫唔一定要同另一半嚟，同好朋友一樣得，大部分座位都係卡位嚟，仲有房仔添，基本上，星期一至四晚都冇入座限時嘅，可以慢慢摸下酒杯底都得。

雖然對住好朋友，傾偈都可以傾飽，但都要填下肚嘅，嚟到呢度必試佢嘅三文魚泡沫忌廉湯。好似咖啡咁層泡泡喺面，嗶到落底仲有一大片煙三文魚，成碗湯都好香濃嘅三文魚味，好開心。甜品嘅香橙味心太軟都值得一試，啲朱古力流心都幾澎湃，仲有啲真‧橙皮，甜甜地澀澀地。

悠閒嘆茶　　難得糊塗

Photos by luv2fly & Karying_karen
呢間café畀人感覺好光猛，而且枱同枱之間有一定嘅距離，空間感都幾多，三兩個好友圍埋傾心事講「咪咪」都唔怕畀隔籬枱聽到會尷尬。

而且呢度最大嘅特色就係有好多少聽啲嘅中國茶，就算係普洱，都有分好多種，唔同年份又有唔同咁樣。普洱奶茶嘅茶味夠濃，同時滲有奶香，而普洱生茶就有少少甘……傾嘢唔飲酒，飲茶都一樣得，仲多咗份放鬆嘅感覺添。

寧靜咖啡室 caffè HABITŪ

Photos by Edwina Chan & chiu_zone
好多人都鍾意搵間cafe，飲住咖啡咁嚟傾偈，呢間喺The One嘅咖啡店都係一個唔錯嘅選擇。雖然座落喺大商場，但佢位處嘅一個角落相對嚟講比較靜，成個setting都好舒服，都幾啱朋友嚟吹水傾偈。

傾偈前就梗係要嗌返杯咖啡啦，嗌乜好呢？薄脆焦糖咖啡吖，加咗焦糖唔會苦得去邊，焦糖同咖啡中間仲有多層滑捋捋嘅泡沫添，係有層次嘅。想食少少嘢嘅，沙律都係一個唔錯嘅選擇，有款紅菜頭汁配新鮮沙律菜，好鮮甜㗎。如果你想食多啲嘅，叫返個千層麵都ok㗎。

低調西餐　　合一咖啡屋餐廳

Photos by Scorpion J & WeirdJ
又係一間樓上cafe，餐廳望落感覺都幾寬敞，一班人想話圍埋一齊傾下偈仲可以早啲卜定間房仔，咁到時就可以有一個完完全全屬於自己嘅空間，傾乜傾幾耐都得。

嘢食方面都幾有驚喜，首推焗芝士吞拿魚開面三文治，開面固然係一個賣點啦，而另一個賣點係，佢多多料嘅包上面，有一大團吞拿魚醬，再上面有大塊火炙芝士呀！係溶溶地嗰隻呀！另外呢度嘅意大利芝士餅，係用好正宗好傳統嘅手指餅嚟做中間夾心嗰層，又香口又軟身。

如果你哋鍾意嘅，下次再同你哋介紹其他區嘅談心點！

文：Kar

隨時接收最新資訊
讚好OpenRice專頁！