冇錯，又係來自國內嘅麻辣火鍋呀！今年真係開得特別多特別密，好似有海底撈、蜀大俠、臥龍等等，各位麻辣控呢個秋冬一於試晒佢！呢一間漲格重慶老火鍋來頭都唔少，開業16年左右，經獲得國內十佳火鍋店同重慶50大火鍋店榮譽，喺重慶、北京等地約有40間分店。香港店老闆係半個重慶人，試過多間都係覺得呢一間湯底最香最順喉，於是喺尖沙咀開第一間分店。

湯底底料由重慶運來，大廚再加入重慶石柱紅、貴州黃楊椒、內黃新一代辣椒、泰國小米辣椒4種辣椒同幾十種香料，以牛油炒足3小時製成湯膽，最後加埋豬骨湯做湯底。最得意嘅係大廚將牛油製成熊仔、麻雀同玫瑰造型，放入湯中慢慢融化，影相一流，免費唔使特別加錢，每日各限量6個，想要記得預訂。

將熊仔加入湯底，浮上一層紅油，咁咪油淋淋？牛油經過提煉係清油，同一般食用油、花生油唔同，所以唔會話好油膩，亦唔算好厚，麻辣火鍋精髓就係呢層紅油！辣度其實幾溫和，唔算好麻，但香氣有層次，最重要唔會越煲越苦。九宮格其實一樣味，但老闆建議中間最熱可放肉類及內臟等易熟配料，而側邊可放蔬菜類慢慢烚熟。

同總店一樣嘅香油，芝麻味濃郁，再落少少生蒜就係地道食法。

火鍋配料款式多，香港獨有嘅老闆娘串串牛肉($88)，本地牛頸脊卷起泡椒，酸酸辣辣好開胃。牛肉就有本地手切牛肉($288)、安格斯同埋耙牛肉等選擇。

麻辣火鍋配內臟特別夾，鵝腸($72)爽滑帶冇肥膏，黑栢葉($108)係本地新鮮貨，大塊薄身，淥幾秒食得，質感爽口不韌。

小食脆炸小鮮肉($55)炸得香口，炸粉唔過厚，豬黃喉($88)、豬大腸($72)等亦爽滑惹味。海白菜($38)由重慶運來，即是中華沙律內的海帶，質感厚身爽脆。

手打三色丸($68)有蝦丸、墨魚丸同豬肉丸，新鮮打成，個人最鍾意蝦丸，蝦味濃又彈牙。

自製紅糖糍粑($58)如年糕般煙韌，加埋黃豆粉同紅糖，甜度剛好。

座位唔算好多，以卡位同長枱，亦有一間貴賓房，訂定位就最安全喇。

漲格重慶老火鍋

地址：尖沙咀厚福街12-12A藍馬商業大廈1樓

文、相、片：Perrins