主打九州芭菲嘅日本餐廳Ufufu進駐沙田，新店除咗推出新口味嘅水果芭菲外，仲有好幾款搶眼又好味嘅鹹食，例如超澎湃嘅重達500克嘅漢堡巨扒、近1呎長嘅松葉蟹腳等，即刻睇下新店有乜必食items先！

相比起尖沙咀店，新店用嘅食材全面upgrade，超過80%嘅食材都係由日本直接運抵香港，例如鹿兒島和牛、千葉製生意粉、熊本番茄、靜岡蜜瓜、福岡八女抹茶、北海道牛乳等，而且食譜亦經由獲得多個米芝蓮認可嘅星級廚師監廚添！

Ufufu 7大必食！

#1　“Jum-burger”$198

重500克嘅珍寶漢堡扒係新張限定，以車打芝士、Mozzarella芝士、熊本番茄醬、磨菇、燒汁調味，並用日本運來嘅高溫火山石上枱，令漢堡扒keep住溫度，仲聽到嗞嗞聲添呀！

和牛一向予人油脂感重，但可能加咗味道帶酸嘅番茄醬，令和牛食落無咁油膩，和牛肉汁亦好juicy添！留意番“Jum-burger”只限於新開張期間供應，而且每晚只限供應10份架咋，想食就快啦！

另加$48可配新潟白飯、沙律及焗酥皮粟米湯。

#2　帆立貝、松葉蟹腳海膽忌廉汁意粉$198

成呎長嘅松葉蟹腳，而且蟹肉比想像中多，味道亦幾鮮甜。除咗蟹腳，仲有帆立貝及海膽，「鮮」味十足；意粉亦專程由日本千葉縣運來架，都幾「掛汁」，食落亦覺彈牙。

大部分客人都懶得拆蟹，尤其是蟹腳，所以舖頭會幫手開殼，客人可以連小小蟹腳嘅蟹肉都食到，好體貼。

#3　靜岡蜜瓜芭菲$198

至於招牌芭菲，舖頭新增靜岡蜜瓜芭菲，齋睇相都覺得豐富，有蜜瓜、忌廉、紅桑子、蜜瓜雪葩、蜜瓜雪糕、呍呢嗱雪糕，蕨餅及脆片。

1杯芭菲都有4-5塊靜岡蜜瓜，分量幾多，而且好甜。

#4　水果三文治$58

日本早排好hit嘅水果三文治終於嚟香港喇，以士多啤梨、奇異果、香蕉、芒果及忌廉製成嘅三文治。一向食開餐蛋治、腿蛋治嘅開飯仔開頭都驚味道怪怪哋，但其實味道、口感都好似蛋糕，而且忌廉尤其出色，口感輕盈之餘又甜又香滑，即使食晒一整件都唔覺好甜膩。

#5　抹茶意大利芝士餅配福岡八女抹茶$88

一上枱，就見到熱水、一個放有福岡八女抹茶粉嘅茶碗、茶筅以及抹茶意大利芝士餅。

介紹咗抹茶芝士餅先，無論味道、口感、層次都同正宗tiramisu都好唔一樣，呢個抹茶芝士餅好似日本甜品咁，用嘅忌廉芝士好厚身，微甜，不太膩，而且抹茶粉非常甘香，係一個茶味濃郁嘅甜品。

至於抹茶，客人可自己調配架！首先將熱水加入內有抹茶粉嘅茶碗之中，然後用茶筅按順時針方向將抹茶攪勻。

當抹茶粉已經攪勻，加上睇落有少少creamy之後，就可以飲得喇！

#6　心太軟抹茶芭菲$88

抹茶芭菲聽落似乎普通咗少少，不過你有無發現？抹茶芭菲上面仲有一件心太軟蛋糕架，食落更滋味。材料包括抹茶雪糕、呍呢嗱雪糕、抹茶醬、心太軟、抹茶蕨餅、忌廉及紅桑子。

抹茶甘香，心太軟質感，仲有幼滑忌廉，呢杯心太軟抹茶芭菲好有層次。

#7　Ufufu三色丼$128

三色丼有燒肉丼、帆立貝蟹籽丼及吞拿魚蓉丼，柯打一份就可一次過食到3款迷你丼，啱晒「三心兩意」嘅客人。

吞拿魚蓉嘅軟腍，加上青蔥嘅微微清新口感，夠鮮甜。

L.D.K. by Ufufu Café
地址：沙田沙田正街18號新城市廣場一期1樓115號舖

文：Joy