雖然仲有成個幾月先到聖誕，但係啲聖誕巿集已經陸陸續續開鑼啦，就好似九龍灣呢個商場咁，今日開始有巿集行啦。以德國做主題，除咗有好多隻可愛嘅泰迪熊仔之外，仲有好多德國小食同啤酒，當中黑啤蛋糕更加係全港首賣添。就等開飯仔同大家提早過聖誕，睇下呢度有咩食先：

講起德國，梗係會諗起鹹豬手啦，呢隻鹹豬手用秘製醃料醃足3日㗎，相當入味。70蚊就可以食到半隻。同檔仲有即場製作嘅巴馬臣芝士意粉，睇住啲意粉喺大大嚿芝士上面撈下撈下，都咪話唔治癒。

行過隔籬檔，就有一個個嘅牛角包賣。望真啲，有兩款嘅，一款係龍蝦配意大利黑松露，另一款係龍蝦配德國粗粒芥末，睇下你想要香口定香辣啦。

小朋友或大細路應該最鍾意呢檔，因為有好多德國軟糖夾呀。七彩繽紛咁，有啲仲要係果肉軟糖嚟，以原味果汁製嘅，粒糖入面真係有果肉㗎！另外仲有啲冇果肉，但咬開有果醬，一樣咁開心。

呢檔有好多款口味嘅糯米糍，如果你話芒果呀紫薯呀嘅味你已經食得太多，咁就要試下佢哋嘅新口味啦~ 最新奇嘅係德國黑啤味！佢哋用咗黑啤製成啫喱粒粒混入糯米糍度，味唔重唔會醉啦，但有絲絲麥芽味咁啦。另外仲有德國特濃朱古力、黑松露同車厘子味都係新出。

黑啤除咗可以用嚟整糯米糍，仲可以整蛋糕？！呢間人氣芝士蛋糕店，就研製咗隻德國黑啤戚風蛋糕喇。頂層係黑啤啫喱，呢層最重味，夠晒香甜，跟住就有啲黑啤忌廉同埋朱古力海綿蛋糕，都幾有驚喜。不過暫時係得呢個巿集先有得賣咋。

酒鬼應該唔會滿足於咁微量嘅啤酒，呢隻德國手工啤酒由有機認證嘅麥芽同啤酒花釀造，雖然係IPA但唔會好苦，麥香中滲透住陣陣柑橘果香。

點少得德國傳統聖誕飲品？即係Mulled Wine德國熱紅酒呀！用德國紅酒加有機肉桂條、丁香、大茴香、小茴香等製，飲落溫和、順喉，仲有多種功效添，例如暖胃止痛、補血、養顏等，啱晒各位女生。

最後要介紹樣特別嘢畀大家，Moscato 配鮑魚！好多女生本身都鍾意飲Moscato，貪佢甜吖嘛，但有冇諗過原來Moscato可以配埋鮑魚咁飲？上環有間海味店引入咗隻果味香甜嘅Moscato，建議大家可以倒出嚟，浸住隻鮑魚半分鐘左右再飲，呢個時候嘅Moscato就會變咗帶有鮮味，最尾餘韻仲會有少少salty嘅感覺，好得意。當然，隻鮑魚亦變甜咗啦。

德國主題聖誕巿集
地點：德福廣場1期中庭

文、相、片：Kar