茶記菠蘿油都可以變日式？原來呢間新開小店將配方改良，特別係將牛油變成入口即溶嘅北海道忌廉，仲有五款不同口味任揀！另外仲有牛角包、蛋糕等，配多杯口感特別嘅芝士蛋咖啡，最啱附近嘅上班一族當早餐或者下午茶呀。
 

OURS喫茶店位於鰂魚涌海光街，主打日式麵包。最搶眼嘅一定係五款有啲熟悉又色彩繽紛嘅日式菠蘿油！點日式法呢？原來係將一般菠蘿包改為菠蘿丹麥酥，菠蘿脆皮係熟悉嘅甜味，但麵包就變得更鬆軟。
 

日式菠蘿油（$22/個）

餐廳會焗返熱麵包，再夾入用北海道煉奶同忌廉整嘅夾心，夾心咬落有啲似雪糕，凍得嚟又入口即溶，口感Creamy而唔膩。
 

（左）日式菠蘿油（抹茶），（右）日式菠蘿油（芝士）

夾心有五款口味：原味、抹茶、草莓、朱古力、芝士。以清香有回甘嘅抹茶，同帶少少鹹味嘅芝士呢兩款口味最受歡迎。
 

黑松露炒蛋牛角酥（$28/個）

另外亦有四款唔同口味嘅牛角酥：原味、火腿芝士、牛油果火雞胸片，同黑松露炒蛋。黑松露炒蛋嘅黑松露香味突出，加埋滑溜炒蛋簡單而滿足。
 

 

芝士蛋咖啡（$32/8oz）

芝士雞蛋同咖啡嘅配搭聽落夠新奇，其實係喺熱咖啡上面加上凍嘅芝士蛋漿，再灑上咖啡粉點綴。建議大家飲嘅時候好似飲芝士奶蓋茶咁，先試下芝士蛋漿嘅厚滑口感同甜中帶鹹嘅味道，飲到一半再搞勻。
 

呢度亦有各款蛋糕，真係要嚟多幾次先試得晒啊。
 

OURS喫茶店
地址：鰂魚涌海光街13-15號海光苑地下6B號舖

文、相、片：Cathy