芝士蛋糕，仲要係北海道嘅芝士蛋糕，一向都係芝士控同甜品迷嘅飛佛，最近有間cheesecake專門店，由一間蛋糕店/pop up店，開到變café呀！

主打嘅芝士蛋糕當然有得食啦，除咗原味之外，仲有其他唔同嘅口味，好似玫瑰荔枝味咁，粉紅粉紅嘅玫瑰cream cheese面，底層就係軟滑嘅芝士蛋糕，蛋糕面仲要散落幾片玫瑰花瓣，女生見到唔冧豬就奇。想要原個又得，件裝又得。

而另一款都會令女生一秒變心心眼嘅就係紫薯芝士蛋糕喇，呢期嘅期間限定嚟。成個cake都係粉紫色，切開橫切面就會見到分幾層，最頂嘅紫薯cream cheese、中間嘅紫薯蓉芝士蛋糕同最底薄薄地嘅芝士蛋糕，成個蛋糕香滑軟身，紫薯味突出得嚟又唔會太甜膩，室溫食似蛋糕，雪凍食就似雪糕，紫薯控必試。

而叫得café，當然就仲有其他日式甜品食啦。好似極濃抹茶軟雪糕、CRUNBAR芝士忌廉脆條呀咁，後者仲係獨家首創㗎。首先打發好啲芝士忌廉，喞入麵包條入面，再雪凍佢，到食之前就放入焗爐烤焗。麵包都做過「手腳」㗎，搽咗些少蜜糖，再加入果仁，所以食落脆脆地、甜甜地咁。而重點嘅cream cheese就由兩種芝士混合而成，雪凍後再焗，令佢呈現出外熱內冷嘅口感，流心得嚟又有些少雪糕嘅感覺。呢種經特別調配嘅cream cheese，比起芝士蛋糕嘅嗰種，更加滑身。

飲品方面，以咖啡為主，女仔想要成餐玫瑰嘅，可以揀玫瑰鮮奶咖啡呀。另外都有Green tea latte同hojichi tea（焙茶）latte選擇。其中green tea latte嘅甘味比想像中重呀。

Luna Café
地址：九龍尖沙咀河內道18號K11, B201舖

文、相：Kar