日本三大平民牛丼之一嘅松屋，將於8月11日正式登港喇！品牌嘅海外店唔係區區都由日本直營，但香港就得到呢份榮幸，而香港社長浜野先生更想帶領香港店做出超越日本嘅質素𠻹，即睇香港店有咩大不同啦～

浜野先生喺日本總公司主力負責海外市場品質管理，現為香港社長

皇牌牛肉飯5種分量$29起

牛肉飯有S至LL分量，若揀標準配「肉量大飯量中」即係EX. Beef分量（$45），肉量幾滿足

香港餐牌同日本基本無異，所有牛肉相關菜式亦同樣選用北美產穀飼牛肉，而唔同部位配合唔同切肉方向，口感亦有所唔同。好似牛肉飯嘅牛肉堅持每塊切成1.1毫米厚度，以保持軟腍口感，煮得入味又唔會老身。

牛肉入口鬆軟，肥瘦適中

店經理Ron表示，品牌自家秘製嘅牛肉飯醬汁不斷改良至第33代，為嘅係配合時代口味演變，現時配方偏濃味，但唔排除會按香港口味再作調整。開飯仔試過都覺得好夠味，加少少七味粉就更有層次。

W燒牛五花定食（$94）嘅「W」代表肉量double

另外Ron私心喜愛，亦係人氣款式之一嘅燒牛五花，牛肉切得厚啲，比較有口感，但咪畀「五花」呢個字呃咗，食落唔會好肥膩；加上牛肉喺日本醃好再直運到港，確保味道同日本一樣。

肉量double對女士嚟講可能會略多少少

所有醬汁都係日本運港，務求還原當地風味

餐廳提供多款醬汁同調味料，其中黑色蓋嘅3款都啱配燒牛肉；建議先試原味，再淋較濃味嘅甜燒肉醬，其次係BBQ醬，最後就係解膩嘅柚子醋。

香港升級100%牛肉漢堡扒

漢堡咖喱飯（$79）

品牌主打牛肉飯外，仲有咖喱同定食系列，因為想照顧上班族需要飽腹感嘅親民價正餐。而嚟到香港，漢堡咖喱飯嘅漢堡扒，就由日本嘅1:1牛、豚比例，升級為100%牛肉！所以口感同當地有所唔同，香軟之餘好juicy。咖喱汁底則同平時嘅日式咖喱相比辣少少，而且加入牛肉末，味道同口感更有層次。

小菜方面有多款選擇，由$6至$30不等，如日本運港嘅清甜山藥泥、配合香港風格嘅油菜、傳統納豆、燒三文魚等等，有成廿款選擇㗎。

落單係自助形式，其中一部機接受現金付款𠻹

店內設有卡座同單人座位

松屋
地址: 佐敦彌敦道219號莊士倫敦廣場地下G06-09號舖

文：Cathy
相：Yan Yan