喂喂喂，元朗街坊唔使跨區行大型超巿喇，形點入面封咗圍板裝修一段時間嘅一田，終於喺今日正式開業喇！除咗有大量日本生果、零食、酒水等等，呢間舖亦設有幾個飲食專櫃，其中仲有間首度登陸香港嘅日本拉麵店添~

「4大和食專櫃」

1. 北海道 勝手丼 

香港人鍾意食爆丼飯，貪佢可以一次過食晒好多款魚生嘛。呢間舖都有得食，仲要係自選嘅添，想要咩款就揀咩款，而正值秋天，有限定嘅深海池魚同炙燒秋刀魚添。

喺開店初期，每日都會有3款輕便嘅爆盛丼杯（每款限量20杯），分別係海膽三文魚子丼、珍寶赤蝦三文魚丼特厚三文魚腩蟹腳丼，唔好睇佢細細杯，一層飯一層吞拿魚蓉一層蛋咁，面頭嘅刺身仲鋪到滿一滿，都幾足料，食晒係會有飽嘅感覺。

2. 九湯屋

呢間就係開初所講，首度登陸香港嘅日本拉麵店喇！集齊南日本九州豚骨風、東京醬油風、北海道味噌風三大派系嘅拉麵，而開店限定嘅爆盛極豚拉麵就堅係爆多豚肉喇，圍住晒碗邊，好有視覺效果！叉燒係用自家秘製醬料滷製㗎，幾濃味，客人亦可自選拉麵嘅粗幼度，每日限售30碗咋。

3. Châteraisé

山梨縣人氣日本品牌甜品店，甜品控見到實流晒口水，抹茶千層蛋糕等皇牌甜品固然之有得食，但嚟到記得要試呢度獨家嘅山梨晴王鮮忌廉蛋糕呀，用頂級山梨晴王麝香葡萄整，夠晒香甜。

4. 地道屋台小吃

喺日本便利店成日都見嘅關東煮，呢度都有，昆布鰹魚湯底加鱈魚豆腐，係鮮甜嘅，懶得諗又或者有選擇困難嘅朋友，一set雜錦包晒獅子頭、奶油南瓜包等煮物，不過當然，有部分如菠菜丸咁，就要散叫先有喇。同場仲有大阪燒、炸薯餅之類嘅和風系食呀。

 「2大洋風美饌」

Vom Fass

其他幾間一田都有嘅德國品牌cocktail bar，有果酒有果醋連威士忌都有，全部都可以即場試飲，再決定揀邊款。今次特別要同大家介紹嘅野莓甜酒、車厘子伏特加，同杏仁甜酒，頭兩款略帶酸味，嗒真啲又滲有些少果香，溝埋sparkling 咁飲應該幾唔錯；至於杏仁嗰款，就咁聞都好勁杏仁味，好似杏仁露嗰啲味，果仁香重，但未必人人都受得到。

OYSTA+

開始踏入生蠔嘅季節，蠔吧當然唔少得，閒閒地都有十零廿款嚟自美國、法國、紐西蘭等地嘅生蠔，蠔魔開心死！比較特別嘅有法國皇御金箔蠔呀介紹返，成隻蠔殼上面真係有一粒粒金箔㗎，師傅話係認證嘅上等貨嚟。大大隻，食落好爽口、海水味濃得嚟又幾fruity下。

BTW，呢間超巿有區叫「懷舊昭和菓子Corner」，係將舊陣時嘅零食集晒一齊，眼鏡朱古力呀、煙仔糖呀、BB糖呀之類，啲童年回憶返晒嚟喇！

而為咗慶祝新開張，超巿對出嘅商場範圍，亦舉辦咗個「一田旬の秋祭」，其中有幾檔有啲小食，包括近期大熱嘅玉子燒同特長薯條。

玉子燒即叫即製，用北海道雞蛋加鰹魚汁混製蛋漿，由京都師傅親自逐層煎香，蛋半熟，好滑好鬆軟。除咗有食開嘅芝士、明太子等口味，仲新創咗隻南瓜味，睇住師傅真係一嚿嚿南瓜蓉放落去㗎，又綿又甜。

早前喺Sogo都賣過嘅30cm特長薯條，同樣都係即叫即炸，炸出嚟脆內軟，「長乃乃」食極都仲有嘅感覺幾好。有蕃茄醬、明太子沙律醬等味，而栗子更加係獨家新出嘅口味。

鍾意食蕃薯，特別係冬天喺街邊車仔檔嘅煨蕃薯，呢度一樣有，仲要係嚟自沖繩嘅紫薯呀！可以叫完之後請店員協助叮熱，熱辣辣咁食，有風味得嚟，仲好香甜！（ps. 去到12號就冇得食喇）

地址：元朗YOHO MALL I 形點1期1樓
一田旬の秋祭：即日 至10月22日

文、相：Kar