由食物及衞生局、食物環境衞生署食物安全中心、降低食物中鹽和糖委員會主辦嘅《少鹽、少糖、少．確幸》已經展開，希望向全港推廣減鹽、減糖新飲食文化，從而達至健康飲食、幸福人生。活動至今已經有超過500間唔同類型嘅食肆響應，另外約70間食肆更陸續推出特選減鹽減糖菜式，畀大家多一個健康選擇。率先帶領活動嘅幾間餐廳真係落盡心思去設計各款減鹽減糖菜式，一齊睇下佢地為大家準備咗咩健康又美味嘅菜式啦！

添好運點心專門店

人氣點心專門店添好運老闆兼點心師傅麥桂培師傅為今次活動設計咗3款菜式，主推以新鮮食材製作、唔使添加調味料都夠鮮香嘅菜式。

菜式一：蝦餃

蝦餃係大部份人去飲茶都一定會點嘅點心。呢款健康蝦餃比以往減少2至3成鹽，選用新鮮蝦肉製作，確保蝦肉味道夠鮮夠甜；另外選用新鮮豬肉，令餡料更甘香。加上蝦餃係熱門菜式，需求量大，每日都需要新鮮製作，確保蝦餃用料最新鮮入味。

菜式二：蘿蔔糕

選用山東蘿蔔，當地氣候令蘿蔔更加清甜、味道突出。而蝦米本身帶鹹味，師傅會先以水浸泡蝦米，沖走過量鹹味，再加少量臘味，已經可以令蘿蔔糕鮮味突出，就算比以往減少2至3成鹽，都夠晒鹹香可口。

菜式三：南瓜西米露

南瓜本身味道香甜，而且當中嘅果糖唔會引起血糖快速上升，比較健康。要煮出一碗減去一半糖分都夠香甜嘅南瓜西米露，首先要選擇甜度高嘅南瓜，並且將南瓜切得粒粒分明，提升口感。配上口感軟糯嘅西米，就成為一碗健康又色、香、味俱全嘅南瓜西米露。

富嘉閣

富嘉閣老闆兼大廚李文基師傅一直都非常支持健康飲食，今次參加活動設計咗3款菜式之餘，仲自發推出一整個少鹽少糖菜單，希望顧客有更多滋味健康選擇。

菜式一：合桃五秀炒雞球

「五秀」係指白果、雲耳、蓮藕、百合、鮮淮山，全部都係口感爽脆又健康嘅蔬菜。而呢道菜所採用嘅合桃不經油炸，配煎香過嘅走地雞一齊炒，唔需要落糖已經鮮味十足。

菜式二：紫菜鮮菌魚滑湯窩

呢道菜比以往減少2成鹽，秘訣在於鮮菌同製作魚滑嘅鯪魚肉夠新鮮，加入上佳紫菜更有助提鮮，令成道菜鮮甜入味。食呢道紫菜鮮菌魚滑湯窩絕對係健康之選。

菜時三：金銀蛋浸蘿蔔

第三道菜式係無落鹽同油都夠晒鹹香可口嘅金銀蛋浸蘿蔔。全靠鹹蛋本身鹹味同蛋黃中嘅少量黃油，再加入皮蛋同蛋白，放喺精選鮮甜靚蘿蔔上面，成道菜已經足夠鮮香，男女老幼都一定鍾意食。

百樂潮州

在食物裡添加鹽同糖可以抑制微生物生長， 達致防腐效果。 以往未有充足設備儲為食物嘅時候，都會加入大量鹽同糖分延長食物的保質期。百樂潮州行政總廚許美德師傅認為現今已經有良好嘅廚房設備去保存食物，加上越嚟越多人注重飲食健康，於是設計咗3款菜式響應活動。

菜式一：潮州芋泥

潮州芋泥嘅原配方每斤芋頭會配6至7兩糖，而現配方改為5兩糖，比以往落少2至3成糖份。另外，選用較粉同較輕身嘅芋頭，味道比較香甜，加埋煙韌福果，令綿密芋泥嘅口感更有層次。

菜式二：潮州滷水

潮州滷水係潮州菜嘅重要菜式，以多種香料同肉一齊熬製而成，製作滷水鵝、墨魚、蛋等。滷水本身有一定鹹度，過往每隻滷水大鵝會配搭2茶匙粗鹽，而家只落1匙羹粗鹽，減低滷水鵝鹹味之餘，更可以帶出鵝肉嘅鮮甜。

菜式三：香煎蠔烙

減鹽版香煎蠔烙只加入1茶匙魚露，比以往落少三份之二。選用鮮美蠔仔製作，配合煎香雞蛋，微脆中帶點煙韌，無需太多魚露，已經夠晒鮮香。

而家喺OpenRice網站或Apps嘅進階搜尋當中，可以喺「食品/餐廳類型」選擇「少鹽少糖食店」，一次過睇哂全港參與推動少鹽少糖嘅餐廳。

餐廳搜尋頁面當中亦有「少鹽少糖食店」標示，方便大家隨時隨地按自己需要搵到適合嘅少鹽少糖餐廳。

* 資料由客戶提供