一到冬天，好多雪糕迷、朱古力迷都會去Häagen-Dazs歎番個朱古力火鍋，今年Häagen-Dazs有新嘢喎，首推日本味濃嘅和風紙火鍋，配料多多，除咗有雪糕，仲新增幾款和風小食添，快睇試味報告先啦！

新出嘅Häagen-Dazs和風紙火鍋，朱古力醬味道微苦而幼滑，至於紙火鍋所用嘅紙，當然唔係普通嘅紙張啦，紙質好厚身，不太易滲透，而且不會煮燶朱古力醬添！

火鍋配料有32球迷你雪糕球，有士多啤梨、曲奇呍呢嗱、焦糖脆餅、比利時朱古力、抹茶、芒果紅桑子、藍莓及呍呢嗱8款口味。

將雪糕沾上熱融咗嘅朱古力醬，大約2-3秒後，就會見到朱古力喺雪糕上面凝固，營造咗「脆皮」嘅口感。

除咗雪糕，另外仲有一盤和風小食，包括：白玉丸子、蝴蝶酥、綠茶紫薯蜂蜜蛋糕、士多啤梨、香蕉以及杏仁碎。

綠茶紫薯蜂蜜蛋糕好鬆軟，紫薯粒好有咬口，加上暖暖朱古力醬，好味！不過蛋糕太鬆軟，即使用叉都好易散開，要小心啲！

口感煙韌嘅白玉多數配抹茶醬，今次配上香滑嘅朱古力醬，味道都唔錯，而且不太甜，食落不太覺膩！至於蝴蝶酥本身已有種酥脆感，就咁食或者沾朱古力醬都一樣好食。

士多啤梨配朱古力醬，無得輸！

沾上朱古力醬嘅雪糕或小食，可趁朱古力醬未凝固之前將香脆果仁碎黏上，食落更有口感架！

另加$30可跟送兩杯熱檸檬茶或熱蜜桃茶。想追加嘅話，可加$90追加水果及和風小食，又或者加$110追加朱古力醬。

2017年12月19日至2018年1月1日期間仲可以揀森永抹茶白朱古力醬添，味道更滋味。

和風紙火鍋
供應期：即日起至2018年4月30日
價錢：$358/set
注：只限太古城、圓方、銅鑼灣皇室堡、旺角MOKO及屯門V-City 5間分店供應；只限堂食

Häagen-Dazs
地址：太古太古城道18號太古城中心一期5樓503號舖

文：Joy