平靚正滑溜腸粉 四眼仔腸粉
Photos by eddie_ilovefood777 & lam.yaan
今時今日通脹猛於虎，掃街再唔係最平民嘅選擇，好彩聯和墟附近呢間腸粉檔依然堅守平靚正嘅口碑。平，$3/2條呢個價錢喺旺區絕對搵唔到，而魚蛋、燒賣、牛肉等都係$3有交易。靚，因為特登入嚟試嘅食家唔少，加上街坊客多所以流量大，亦因此非常容易就買到新鮮蒸好嘅熱辣辣腸粉。正，腸粉入口柔軟滑溜，而且豉油同各種醬料亦落得爽手，畢竟混醬係腸粉嘅精髓，好似係。
老字號馳名豬手麵 群記牛肉圓豬手
Photos by ki918 & delicioussoul
溫馨提示，想食豬手麵嘅最好趁早，因為豬手每日供應數量有限，好彩嘅話就可以等到下晝三點半嘅第二輪，如果連第二輪都賣哂嘅話，只好請閣下擇日再會。點解佢地嘅豬手咁好賣？一個字：真材實料，豬皮彈牙無肥膩感，啱哂愛骨膠原嘅女士。豬肉新鮮軟腍，加少少辣椒醬已經夠好味。另外牛丸爽口彈牙，牛肉炸卷就夠脆卜卜，都係唔少街坊嘅心頭好。
雞脾打人牙胶軟？ 協香麵包西餅
Photos by natfoodiary_ & lam.yaan
雖然唔知雞脾係咪真係可以令人牙胶都軟哂，但協香嘅雞脾包的確可以令人心軟。新鮮出爐嘅雞脾包，單係嗰股牛油同麵包嘅香味，就足夠令人舉白旗投降。咬落滷雞脾有豉油香得嚟又多肉。而且雞油同豉油滲咗少少落微甜嘅麵包到，令口感更外脆內軟之餘，仲增加咗味道層次。小店嘅麵包、蛋糕、蛋撻等都係細個食嘅味道，同而家嗰啲「空氣麵包」無得比。
無敵鹹牛肉蛋餅 漢興茶檔
Photos by Che
又係開飯仔溫馨提示時間，呢間茶檔只開星期一至五，朝早五點到下午三點。咁點解仲要介紹？因為呢度嘅蛋牛餅真係無得輸！大大份成塊厚身漢堡扒咁，啱啱煎好嘅蛋牛餅外面微焦但食落超鬆化唔死實，鹹牛肉同蛋漿比例啱啱好，配埋烘得香脆嘅多士食一流。食多件香脆嘅雞翼或者豬扒，飲埋杯香滑奶茶，又係邪惡得嚟又滿足嘅一個茶餐。
要「趣」就「脆」小食店 雲津美食
Photos by avril_yee
炸嘅小食雖然好熱氣又無乜益，但偶一為之亦不為過啫。呢間小食店最出名嘅就係各式炸物，蜜糖炸燒賣雖然只係將普通燒賣拎去炸再加蜜糖，但燒賣炸得啱啱好金黃香脆又唔會乾身，同帶少少清甜嘅蜜糖非常夾。招牌炸壽司食落似炸飯糰，難得嘅係壽司炸粉唔厚而又無散到，食得出師傅功力深厚。最邪惡嘅一定係炸芝士通心粉同意大利芝士飯波，減肥？食埋呢次先啦。
花樣年華式豉油西餐 雅士餐廳
Photos by Winnie The Tail
或者每個舊區都總有一間有懷舊感嘅港式扒房，聯和墟嘅代表就係呢間連個名都優雅過人嘅雅士餐廳。無論係扒餐、焗飯定意粉都係細細個食嘅味道，特別係羅宋湯依然係用料十足，酸、辣、甜味道平衡有致。另一招牌香橙班戟仲要有師傅出嚟，喺客人面前即場烹調。雖然有老街坊覺得餐廳衛生同服務有少少退步，但老師傅嘅手藝依然值得推薦。
住家Feel All-day Breakfast 太陽花
Photos by 一姨姨 & jess 6630
唔一定要去樓上Cafe先嘆到All-day Breakfast，呢間喺地舖嘅餐廳一樣有唔錯嘅西式早餐，畀你嘆個悠閒brunch。Sunflower Breakfast有炒蛋、煎香草腸、煙肉、煎蕃茄、磨菇、茄汁焗豆同牛油多士，食物唔算非常出色，但調味得宜，唔過鹹唔油膩，而且溫度夠熱，同呢間小店一樣有平實溫馨嘅感覺。鮮茄濃湯牛肉通粉同定期換款嘅自家制甜品都值得大家一試。
隨時接收最新資訊
讚好OpenRice專頁！