中環卅二公館以摩登中菜打響名堂，口碑唔錯，集團最近於銅鑼灣利園三期新開多一間中菜館，同樣都係走新派型格路線，不過感覺就年輕得多，菜式以粵菜及川菜為主。店名莊館源自當年首位推動東西方貿易往來的華人John Anthony，所以由裝修至食物突顯出中西合璧嘅特色。
門口好易錯過，行落樓梯見到面積相當大嘅酒吧，設計似酒店lounge，花布梳化、竹椅等，好chill。成間餐廳有成6,800呎，用餐區亦有多個唔同區域，卡座部份有少少似懷舊火車卡座。牆身畫上象徵中西貿易帆船，天花布係同南丫島的紮染工場合作製成，用全天然植物染色，有揚帆出海嘅意境。
另一邊隔住玻璃可以見到廚房入面，燒味爐用鐵鎖鍊將叉燒五花大綁，師傅話唔係display only，凌空吊喺爐上面，鐵鎖鍊亦可傳熱，似慢煮方法煮熟叉燒。廚房亦有炭爐專烤燒鵝，相當專業。
食物由年輕主廚周世韜師傅主理，好有諗頭咁將傳統菜式加少少創意改良，又或者用西式食材混合。招牌叉燒唔係豬肉，用上澳洲和牛，食落肉味更濃但有叉燒香，而且配上平時食雞嘅薑蓉，原來配叉燒都幾夾！
澳洲和牛叉燒 $280
口水雞同樣以和牛取代，而且用肉質軟滑嘅和牛面頰，再夾住一塊西瓜一齊食，清甜西瓜同麻辣口水汁有好特別嘅化學作用，食落仲冇咁辣同膩添。
慢煮口水和牛面頰 $135
水煮桂花魚用上四川直送新鮮辣椒同香料，開飯仔入廚房睇師傅示範，香料味真係好攻！上枱時仲會加少少冧酒點火，帶出陣陣香氣。起骨魚肉好鮮嫩，唔落薯粉而用粉皮，口感較脆同樣索湯，仲冇咁易彈到汁，好細心！
火燒桂花魚 $360
花雕魚籽滷水燻蛋賣相精緻，上海菜常見嘅燻蛋，面層有一片黃酒杞子啫喱，食落有微微酒香。滿缸紅係法式做法嘅紐西蘭羊架，用孜然同四川辣椒磨成粉，香料味重。
花雕魚籽滷水燻蛋 $95/3 隻
滿缸紅 $220、宮保蝦球 $235
點心亦都好花巧，黑色小籠包係墨汁做皮，餡料唔係豬肉而係墨魚滑，連湯汁都有海鮮味，好鮮甜。黑色燒賣就係素食，用菇菌同黑松露製成，軟殼蟹腸粉似炸兩但就更鮮，腸粉皮加入點點墨汁。
黑松露燒賣 $45
墨汁小籠包 $65、軟殼脆蟹腸粉 $115
西瓜糕 $45
菜式味道偏濃，好適合送酒！酒吧上方陳列近400款氈酒，仲有自家浸製氈酒，有番茄乾配迷迭香、日本煎茶、菊花杞子普洱同薰衣草，以12公升氈酒柱盛載，用來沖製多款特色雞尾酒，食飯前可以先來個happy hour。
Sundried Tomato $115、Broken Blossoms $125
地址：銅鑼灣新寧道1號利園三期B1樓B01-B10號舖
文、相、片：Perrins