快餐食得多，用新鮮食材即煮嘅韓式快餐你又啱唔啱呢？中環呢間新店由本地餐飲品牌同韓國品牌聯營，讓大家更有彈性享受地道韓式風味～

韓式套餐$49起

主食提供多款選擇

韓式套餐可以自選主食、配菜同飲品各一款，主食以飯同麵為基礎再作變化，當中最抵食嘅辣炒年糕味炒麵套餐同芝士炒年糕味炒麵套餐都係$49。另外韓式烤牛肉飯、泡菜豬肉湯麵係餐廳推介嘅經典口味，前者牛肉香甜唔肥膩；後者酸辣開胃，好啱轉涼嘅天氣食。

韓式烤牛肉飯套餐（$64）

辣炒年糕味炒麵套餐（$49）、泡菜豬肉湯麵套餐（$56）

小菜提供3款選擇，包括果醋醃蘿蔔、自家製泡菜，同埋韓國品牌自家出產嘅卜卜脆紫菜。果醋醃蘿蔔幾有驚喜，以為係微酸口味，其實甜甜哋，當中仲有青瓜同檸檬片，更加爽口同醒胃。

果醋醃蘿蔔、自家製泡菜

套餐嘅飲品可以揀汽水、石榴果汁梳打、菠蘿果醋梳打等款式，亦可以升級轉湯品。如果想開胃啲，推介飲石榴果汁梳打（韓國人經常飲石榴汁㗎）；鍾意香甜口味則推介菠蘿果醋梳打。而韓國之最嘅湯品，牛骨湯帶明顯嘅胡椒香氣，泡菜豬肉湯就辣辣哋，仲有蔬菜同肉粒，幾足料。

石榴果汁梳打、菠蘿果醋梳打（M：$18｜L：$22）

牛骨湯（套餐加配價$12）、泡菜豬肉湯（套餐加配價$18）

追加小食

想嚟個豐盛組合嘅話，仲可以追加小食！5款小食都係經典韓食，包括唔同口味嘅炒粉絲、炸雞同餃子。

雜菜炒粉絲（加$27）、炸泡菜豬肉餃子（加$18/2隻）

單點美食

餐廳亦設有單點食品，好似人氣韓式炸雞提供韓式甜辣同韓式蒜香醬油口味，單點或雙拼都得。雞件嘅炸醬有少少似糖醋肉，拌勻醬料後仍然有脆口質感。

韓式甜辣拼蒜香醬油炸雞（$72）

熱辣辣嘅飯糰有泡菜芝士、韓式烤豬肉泡菜口味，飯粒濕潤，而餸料肉眼可見，睇都睇到落足料。

飯糰（$28/個）

BIBIGO BAPSANG  
地址: 中環閣麟街32-34號美輪樓地下B號舖

文：Cathy
相、片：Yan Yan