上年登陸香港銅鑼灣嘅台灣麻辣火鍋店，湯底加入大量藥材，連湯底都可以當湯飲嗰間呢，最近喺旺角開咗間新分店，仲新增咗得香港店先有嘅花膠雞湯，滋補清甜啊。

佢哋嘅麻辣湯底唔使多介紹啦，加入蔬果、辣椒、同埋藥材等落去煲，少咗份麻辣感但多咗份果甜。而今次新加嘅花膠雞湯，就係每日用雞殼、雞骨、雞肉等熬足十幾個鐘，加埋花膠落去，成個湯又係要喺打邊爐之前，飲返一兩碗先得，好足料，好清甜㗎。

另一款香港限定嘅湯鍋/菜式就係麻辣老饕鍋 喇。呢個鍋以各式牛內臟炆製而成，包括有牛筋、牛肚等，濃郁惹味。

牛肉當然係打邊爐唔少得嘅食材啦，推介手切特選牛頸脊同美國頂級牛小排。前者肉質較厚但軟腍，後者牛味突出。

除咗一般就咁放入個鍋度淥熟佢之外，仲有幾款特別食法建議：

1. 將牛肉放入碗內，直接用湯底淋至半熟，咁樣食嘅口感係最滑身嘅

2. 同樣用湯底喺碗內淋至半熟，但就加多粒蔥粒落去，令到帶有甜味嘅牛肉，多多重香味

3. 同樣用湯底喺碗內淋至半熟，今次就加餐廳秘製嘅辣椒油，但唔使怕會好辣喎，因為呢隻辣椒油只係取其香，幾種食法開飯仔最推介呢個

另外，仲有一啲由台灣直接引入嘅直送地道火鍋料，例如魚包蛋、旗魚脆、排骨酥同晶讚紫米糕等，都係坊間比較少見嘅。

特飲都係打邊爐好重要嘅一環，以「春夏秋冬」命名嘅四款特飲，各有特色。「春」係以蜜糖、桃茶、菠蘿汁調製而成，感覺清新微甜。「夏」就混入椰奶、橙汁、菠蘿汁、紅糖水，仲有生雞蛋，加埋把遮仔成個感覺簡直就係投奔初夏；至於「秋」嘅顏色亦好有標誌性，係楓葉紅呀，由橙汁同cranberry調配出嚟嘅，「冬」呢就係熱飲嚟，落咗蜜糖加半片檸檬仲有六粒丁香，放多條玉桂棒喺杯邊，飲完好順喉。

而家經OpenRice網上訂座，夜晚7:30前離座仲可以享有75折優惠添~

麻神麻辣火鍋
地址：旺角彌敦道558-560號譽發廣場4樓
立即網上訂座：https://s.openrice.com/Qrbx0Il4000

文、相、片：Kar