提到台灣美食點少得牛肉麵，最近又有一間台灣過江龍到港，呢間就主打糅合四川風味嘅麻辣牛肉麵。其他選擇都唔少，包括香港限定嘅鹽水雞、夜市熱賣炸物小食、爆餡麻糬芋泥手抓餅等等，而且唔少材料都由台灣直送到港，廚師亦去過台灣受訓，保證大家食到寶島風味！
 

招牌麻辣·牛三寶湯麵（$82）

勝面最近進駐旺角，主打嘅麻辣牛肉麵靈感來自麻辣火鍋，創辦人仲搵嚟前台灣總統官邸御廚黃德義擔任總廚。嚟到必試招牌麻辣湯底，用美國牛肉、牛骨、蔬菜等花72個鐘頭文火熬製，煮出牛骨精髓同牛脂香氣，再加入用花椒、八角、辣椒等製作嘅麻辣醬，可揀小、中、大辣，辣勁頗強，而且麻痺感都幾持久下！
 

而牛三寶就係軟滑嘅牛腱心、彈牙嘅牛頰肉，同嫩滑嘅牛頸脊，一碗可以試齊三款牛肉口感！鴨血滑溜軟嫩，豆腐吸盡湯底精華。麵就有關廟麵、新竹米粉同刀削麵選擇，前兩款都嚟自台灣，特別推介試關廟麵，經過天然日曬風乾，麵身特別滑溜彈牙。
 

涼拌手撕無骨鹽水雞拌麵（$62）

鹽水雞係香港限定菜式，人手拆出無骨肉絲之後以秘製台式鹽水醬汁調味，鹹得嚟帶少少蒜香，而且涼拌雞肉比較清爽，當小食或者拌麵都得。拌麵當中加入秘製麻辣醬汁，亦會配返碗蛋花湯，碗蛋花湯就咁飲會覺得鹹咗少少，配麵一齊食會好啲。
 

台式酥炸三寶（$48）

一份有齊甜不辣、鹹酥雞同地瓜條，甜不辣外脆內彈，地瓜條外面裹上梅子粉，香甜之中帶少少梅子鹹香。鹹酥雞就略嫌雞肉比較乾身，不過調味得宜、都算係一份幾啱Share嚟試嘅惹味香口小食。
 

流心麻糬芋泥雞蛋手工手抓餅（$38）

手工手抓餅同樣嚟自台灣，有鹹甜唔同口味，甜嘅呢款裡面有用日本白玉粉製作嘅麻糬、用芋頭磨成蓉再加入牛奶嘅自家製芋泥，同增添少少鹹香嘅煎蛋。手抓餅比較厚身，煎至金黃香口。芋泥有保留部分芋頭肉，口感層次豐富。麻糬就偏軟身，相信如果再Q彈一啲同芋泥口感分別比較明顯會更討好。
 

招牌仙草凍（$35）

即係仙草凍配自家製芋泥、芋圓、地瓜圓、紫薯圓同珍珠，特別配一小杯台式奶茶代替花奶，可以增加甜度同時多一分紅茶茶香。仙草凍口感滑溜，珍珠Q彈，三色芋圓亦相當煙韌。
 

（左）脆脆布丁歐蕾奶茶（$33），（右）飲品外賣樽裝

自家製奶蓋上面加上黃糖再用火槍燒成脆面，而奶蓋下面就係加入滑溜布甸嘅台式奶茶。所有飲品加$3可以換成外賣樽裝，冷泡茶用高身樽，其他台式飲品就同矮身啲嘅樽仔，打卡更得意之餘，洗返乾淨就可以重用啦。
 

勝面
地址：旺角亞皆老街8號朗豪坊11樓25-29號舖

文、相、片：Cathy