平時gathering飯局諗食咩都已經好頭痕，遇著生日飯局就更加頭痕！通常你問主角想食問，佢都會答你冇所謂。但冇所謂之中，生日飯總不能夠求其，環境氣氛、食物質素、生日驚喜等，通通都係考慮因素。就等開飯仔畀啲建議你哋參考下，講過下西、日式，今次想講中式，特別同父母或家中長輩去就啱晒。
京式片皮鴨 玉桃軒
圖：觀塘唔係淨係得工廈café，呢間口碑唔錯嘅酒樓都係喺觀塘。片皮鴨皮脆肉嫩，加埋香蔥同點醬食，係會食唔停口，不過最好做多少少功夫，預早訂定啦。另外呢度嘅炸鯪魚球幾特別，係會加埋蜆肉落去嘅，外脆內鮮。而燒汁釀茄子就更加係原條咁上（不過有做過下手腳切開咗幾下㗎，方便些牙），中間釀晒魚肉再灑蔥粒，幾香。同埋，好多酒樓都有得食嘅焗龍蝦芝士伊麵，呢度無論賣相定味道，都係稍勝一籌。芝士舖漢晒成個碟面，芝士控實好開心，係有少少膩囉。
花雕蛋白蒸蟹鉗 大公館
圖：喺荔枝角嘅呢間中菜餐廳，無論係環境定係食物水準都有返咁上下。識食一定會叫醇香花雕蛋白蒸蟹鉗食，因為隻蟹鉗超大隻呀！拆咗殼，肉質彈牙亦夠鮮味，而蛋白就加入花雕去蒸，有酒香而唔會醉。甜品就有傳統嘅芝麻卷，媽媽見到應該會幾開心，舊陣時嘅味道嚟呀。芝麻味濃香又唔會太甜膩。
講多少少，如果你5月底前去食呢餐慶生飯嘅，佢仲做緊懷舊theme，咁就可以試到更多舊式嘅香港小食喇，好似懷舊鴨腳包呀、黃金炸鮮奶呀咁。
粉紅玫瑰饅頭 盈福28
圖：呢間係比較新式啲嘅中菜餐廳，啲點心全部都充滿玩味，例如啲包點會係豬仔貓仔狗仔樣咁，都幾得意，就連蝦餃都好似粒桔仔咁，但個名就叫柚子蝦餃，皮薄，有淡淡嘅柚子香，蝦肉亦鮮爽。另外蘑菇松露都係唔錯嘅包點，成粒菇咁嘅樣，幾逼真，餡就蘑菇切粒加松露，係濃香嘅。如果生日嗰個係母親大人，或者阿嫲、阿婆之類總之係女性啦，記得點粉紅玫瑰呀，一定冧死。係淋咗玫瑰煉奶嘅饅頭，仲整到成棵玫瑰咁，好鬼靚。
【生日飯局】： |
鮑魚花膠麵 欣圖軒
圖：喺酒店入面嘅中菜餐廳，望住維港景當然爽，而啲嘢食嘅樣亦同樣好望得。好似咸水角咁，就變咗做梨形，食落仲真係有淡淡嘅梨香，而且仲有海蔘做料添呀。三式海鮮餃嘅食材同樣高級，有龍蝦肉加金箔燕窩、有黑松露帶子餃同蟹肶菜苗餃。埋尾會嗌返碟粉麵飯嘅話，可以考慮叫鮑魚花膠薑蔥撈麵，簡直就係由頭豪到尾，嗯，不過對屋企人豪少少都值嘅。仲有，中餐唔食蛋糕，當然係食壽包啦，唔算好大個唔會太膩，蓮蓉香滑又唔太甜。
金龍吐珠 大官廳
圖：呢度幾大下，有成3層樓咁多，去到記住要食大官烤鴨，夾埋菠蘿、青瓜、京蔥、黃糖同子薑一齊食，食到肉嘅鮮嫩之餘亦令味道再豐富咗。甜品嚟講，紫薯熱下，呢度都有日本紫薯水晶珠，幾爽脆亦幾香甜，試得過呀。當然要留返啲quota畀嚟呢度嘅主菜啦，金龍吐珠呀，要預早訂㗎。用呢粒「珠」代替生日蛋糕都一定唔會有人埋怨。因為佢堅係靚呀，上枱嗰陣，成粒會發光嘅燈咁，影晒相之後店員就會幫你分開佢，剪成一片片上，嗚呀好唔捨得。BTW，呢粒係煎堆嚟呀其實，芝麻夠多所以味好香，不過如果你影相搞得太耐，佢就有機會凍咗同唔夠脆喇。
文：Kar