荔園可以話係唔少香港人嘅童年回憶，而今年打破以往兩年期間限定嘅遊樂場形式，決定進軍飲食，將「簡單的快樂」精神用另一種方式重現咁話！

餐廳選址尖沙咀，今日正式開張喇！一去到門口，當年嘅感覺就返晒嚟。首先見到嘅就係純白色嘅吉祥物老虎仔，入到去，唔好做低頭族喇！抬高頭就會見到天花板上面，係一隻隻嘅旋轉木馬吊飾同拱形木吊燈。

至於嘢食，當然係延續舊日情懷啦。以前最鍾意食嘅雞脾，配搭埋薯角或者豉油皇銀芽炒麵一齊出場。隻雞脾係美國珍寶雞脾嚟，大大隻成300g重，連埋雜菜同香料一齊浸3個鐘，先蒸後炸，極脆皮，仲隱隱食到啲香草味。

恐龍屋嘅DINO嘅咖喱系列，可以揀慢煮牛肋條或者煎香草雞扒，前者仲用紅酒焗製4個鐘先，都食得出啲酒香㗎。而後者亦夠嫩滑，加埋大廚秘製嘅印度咖喱醬同香料，食第一啖唔覺辣嘅，愈食就食辣啦。

呢度連burger都有得食，不過中間夾住嘅就唔係漢堡扒，而係牛脷呀！但又畀想像中夾同埋腍身。

港人大愛嘅西多都有幾款，例如粒粒西多就用蛋漿煎香完再淋焦糖醬喺面；另一款焦糖溫泉蛋西多士，隻蛋盪下盪下咁，一切就流晒啲蛋黃漿出嚟係咩玩法？食落發現原來唔係平時嘅花生醬餡嚟，不過蛋香味同焦糖味都令到件西多生色不少嘅。

飲品方面，試下懷舊特飲菠蘿冰吖。係DIY㗎，半個菠蘿放喺扭扭盤上面，自己榨啲汁出嚟再倒落隻杯度。你最後杯菠蘿冰有幾重菠蘿味就睇你有幾努力喇，都唔易搾㗎，要啲力水。

荔園茶餐廳
地址：尖沙咀加連威老道12-16號加連威大廈地下12號舖

文、相、片：Kar