又有間台式飲品進駐香港？係呀，不過今次唔係珍珠奶茶喇，係酵醋呀！香港比較少地方有酵醋嘅專門店，而好多人對醋嘅感覺都係有啲酸，甚至會嗆喉咁，不過試完呢間嘅醋飲，可能就會有所改觀，甚至愛上「呷醋」！btw，酵醋好健康㗎，可以有助瘦身、排毒同埋改善腸胃問題等等。

舖頭大部分嘅原材料，包括茶、醋、糖、珍珠等等都係直接由台灣進口，總共有5款口味嘅酵醋，包括蘋果、蔓越莓、蜜桃、青梅同葡萄，另外有啲以酵醋做基底再製作嘅飲品，例如yogurt、雪葩等等，仲可以加珍珠或者小紫蘇之類增加口感，都幾多變化。

天口開始熱，飲啲酸酸咪咪嘅嘢係幾清爽，青梅冒泡泡就啱晒嘞。呢個係sparkling飲品嚟，加上用刨冰機製作，樽內有層層碎冰，變咗每一啖酸酸地得嚟有汽又有冰咬下咁，成件事好夾、好解渴。

想要多啲冰感嘅話，蜜桃摇雪貝 （香蕉加蘋果）都唔錯，即係類似雪葩啲friend。而蜜桃味醋本身好清甜，似飲緊果汁多過似飲緊醋，如果好怕醋嗰陣酸澀味嘅朋友仔，可以試呢個入門級呀。

冇諗過，原來醋同奶都可以溝埋一齊，變咗做優酪（即係yogurt），蜜桃優酪甜甜der，開舖頭幾日已經好受客人歡迎。

加生果或者變茶飲都一樣得，好似呢兩杯葡萄吃酵醋 士多啤梨奇異果同蔓越莓酵醋鮮茶飲咁，前者微酸中帶有果甜，後者茶底可揀紅茶、烏龍茶等，有淡淡茶香，而且佢哋嘅茶幾清香，唔澀。

最後介紹，亦係最基本嘅組合，就咁用酵醋加水加糖就飲得，咁就可以飲得到佢最原始嘅味道喇。當然如果想同時有啲嘢咬下嘅話，可以加小紫蘇，仲有滑腸功效，幫助腸道消化添。

醋頭家
地址：元朗建業街51號

文、相：Kar