嚟到年尾，你以為過咗聖誕就無問題？少年你太年輕了。就算唔計接住嘅元旦，都仲有農曆新年假期同避無可避嘅2月14情人節！不如今年考慮下去扒房，滿足女士鐘意浪漫嘅願望，又保證各位男士飽肚。就算月底糧尾，一樣有港式豉油西餐之選！
平民價（$50-$200）
灣仔貼地價扒餐 薔紅
圖：吉地魚
以為港島商業區例牌貴夾唔飽？咁就睇你點搵喇，老實講呢間餐廳完全就係茶餐廳裝修，浪漫欠奉，換嚟嘅係完全唔離地嘅價錢：一個美式雜扒餐都係$58無加一！呢個價錢有齊火腿、雞扒、豬扒同香腸，扒醃完再加自選嘅黑椒汁、蒜蓉汁或者牛肝菌燒汁後味道較濃，如果你味Honey唔鐘意重口味嘅話可以嗌隻燒春雞一齊Share食。
花園以外之選 大興餐廳
圖：月巴妹妹
小情侶出旺角拍拖，行完街想搵間舊式扒房，通常第一時間都會諗起花園餐廳，其實行過近太子呢邊仲有間一樣抵食嘅扒房。嚟到識嗌梗係嗌神戶牛扒，肉味最濃，口感軟腍得嚟唔係狂加鬆肉粉嗰種，而且分量大到同塊鐵板差唔多咁大。餐廳上菜速度媲美快餐店，不過侍應服務水平亦同大部分快餐店差唔多，想要體貼服務嘅話就要先三思啦。
懷舊靚Package扒餐 哥登堡餐廳
相比起上面兩間，位於土瓜灣嘅呢間豉油西餐廳位置的確係吊腳咗啲，勝在裝修最有花樣年華懷舊感，而且扒嘅質素亦唔錯，唔會薄到無哂肉汁，食落鬆化唔太韌亦唔係死鹹。最抵讃嘅係成個Package都唔錯，餐湯羅宋湯酸辣開胃，扒嘅熟度計得啱啱好。加上除咗常見嘅牛扒豬扒雞扒之外，仲有唔太騷嘅羊扒，一樣抵食。
中價（$201-$400）
專一法國扒房 La Vache!
開飯仔要解釋下先，呢度嘅專一係指中環呢間餐廳專一：只賣一款經典法國扒房套餐，閣下可以選擇嘅只係扒嘅熟度。食過麵包同沙律後主角牛扒就會上場，牛扒下面會有燭台保溫，好處就係可以令牛扒食到最後一啖都咁暖，但食得慢嘅朋友仔就可能會由五成熟食到變六成熟。牛扒多汁而富濃郁牛肉香味，裝修其實唔錯，但人多會較嘈，唔太適宜細聲談心。
樂意扒房V2.0 Mr Tomahawk Member of Louis Steak House
鐘意鋸扒嘅為食友應該細細個就有聽過樂意扒房呢個名，雖然已經光榮結業，但唔代表食唔返斧頭扒嘅，皆因家族第二代就喺中環另開扒房！呢度有迷你版斧頭扒嘅連骨肉眼扒，無論係扒嘅厚薄定係肥瘦度都啱啱好，炭燒過後灑上少許海鹽肉味就已經夠突出。想食平少少嘅話，佢地嘅西冷扒一樣唔會令你失望。
抵食Lunch Semi-buffet Alto
圖：hana花
銅鑼灣鬧市當中，呢間算係其中一間相當抵食嘅扒房，唔好睇佢裝修奢華加埋窗邊靚景，Lunch嚟食牛扒加沙律甜品任食都係大約$300一位。沙律有十幾款選擇，而且款款新鮮唔係行貨。西冷肉扒食得出質素對板，富油脂香同烤肉香。但廚師嘅火候掌握略為飄忽，偶然會有稍微過生或過熟嘅情況出現。
坐得舒服澳洲扒房 Wooloomooloo Steakhouse
尖沙咀呢間扒房其實已經有超過10年歷史，喺15年中重新裝修過後環境更舒適開揚，坐窗邊嘅話隔條馬路就見到海景，環境情調唔錯。招牌Wooloomooloo Steak柔軟細嫩，比肉眼或者西冷少一分油脂香，但就啱哂需要Keep Fit嘅女士們。威靈頓牛柳亦算抵食，呢度必食嘅仲有Crab Cake，煎至香脆而依然保留蟹肉鮮甜。
豪一餐價（$401-$1000）
經典簡約美式扒房 茹絲葵牛排餐廳
圖：鞭鞭
講起鋸靚扒，尖沙咀呢間美式傳統扒房相信係唔少人嘅心水。雖然定價唔平，但唔少細節位都做足，例如上牛扒用嘅碟會先預熱，如果兩個人胃口都唔大想嗌一份大嘅嚟Share，仲會額外畀多隻一樣有預熱，仲有埋牛油黑椒醬汁嘅碟畀你！無論係T骨定肉眼都相當厚身，鎖得住肉汁。Crab Cake同Banana Cream Pie都係推薦。
維港海景加分 BLT Steak
呢間美式扒房同樣位於尖沙咀，不過行現代路線，加上維港海景加分，另一種浪漫感覺。牛扒嘅選擇都唔少，由美國牛、澳洲牛到和牛，再有沙朗或者肉眼等唔同部位，燒過油香十足。不過可能因為牛扒普遍偏厚切，偶然會有扒入面過生嘅情況出現。餐廳醬汁選擇總共有7款，試多幾次都Keep住有新鮮感。
米芝蓮新晉推介 Beefbar Hong Kong
如果你自認係牛魔王，想嚟豪一次「牛 全部都係牛」嘅全牛宴，咁就要識得嚟中環呢間國際級扒房！國際級唔單止係講緊佢得到世界知名美食指南米芝蓮嘅一星肯定，而且亦係講緊佢地嘅牛扒嚟自世界各地。貪心嘅話可以點Tasting Menu，可以一次過試哂4款唔同靚扒加招牌牛肉他他。女士們就可以留肚食超大Size嘅Soufflé！
文：Cathy
開飯編輯推介：
2. 11月份好評餐廳十強
熱門文章推介：
2. 大埔墟街市一日五餐之選
隨時接收最新資訊
讚好OpenRice專頁！
