一直受歡迎嘅台式茶飲，總會令人行街時想飲返杯，但長期飲用，好容易攝取過多糖分。根據世界衞生組織建議，以一個每日攝取 2,000 千卡能量嘅成年人為例，每日游離糖攝取量應少於 50 克（約 10 粒方糖），為免加重身體負擔，一於養成少糖嘅習慣！現時全港有 15 個品牌，逾 100 間遍佈各區嘅茶飲店參加咗「少糖星期五」計劃，大家只要逢星期五喺相關店舖購買指定「少糖」、「微糖」或「無糖」飲品，即可以減 HK$2！以下係其中 3 間參與計劃嘅茶飲店精選推介～

走杯

旺角分店

研發無添加糖茶飲嘅走杯，本身飲品甜度已比一般手搖飲品低，而且大部分飲品都可以使用「少糖星期五」優惠，部分連糖尿病人士都啱飲！

洛神花鮮奶

最近推出無咖啡因嘅洛神花鮮奶，下層為一款脂肪量較低嘅澳洲鮮奶；上層則以洛神花粉沖製，花粉 100% 用台灣有機洛神花曬乾磨粉而成，紅色漸層充滿少女感。攪拌後，鮮奶可沖淡洛神花本身嘅酸味，若選擇微糖或無糖，味道更清爽。

鐵觀音紅豆意仁奶茶

想有啲咬口嘅話，鐵觀音紅豆意仁奶茶係唔錯嘅選擇。紅豆由店家自行熬煮，比已製好嘅紅豆甜度較低。而且加入一層鮮奶再注入鐵觀音奶茶，味道層次豐富，減輕糖分亦不失風味。

香檸烤布蕾．香水茉莉綠茶

奶蓋係手搖飲品一大人氣款式，而茉莉綠茶茶香突出易入口，不妨選擇微糖或無糖，咁樣連奶蓋一齊飲用，都仍然品嚐到茶嘅香氣。

茶星人

尖沙咀（金馬倫中心）分店

茶星人嘅純茶系列可以享用「少糖星期五」優惠，但咪以為只有純茶，其實有款係奶茶嚟㗎！

碳燒奶茶

有時想醒一醒又有啲啲甜，碳燒奶茶就可以幫到你。紅茶茶底加入鮮奶後，口感順滑，而鮮奶本身甜甜地，沖泡比例亦恰到好處，叫微糖或半糖都好好飲。

石里香

如果你鍾意飲濃茶，可以試下近月新增嘅純茶飲品石里香。呢款茶葉係其中一種烏龍茶，味道較濃，代替有糖嘅提神飲品都唔錯。

炭焙烏龍

如果想再濃味啲，炭焙烏龍係不二之選～茶葉經炭火焙煎後帶有獨特嘅香氣，糖分愈低，茶香就愈突出，更加解渴！

花斑茶社 

將軍澳（海天晉滙）分店

走文青格調嘅花斑茶社，同樣以純茶系列參加「少糖星期五」計劃。

冬瓜茶

品牌棄用一般以糖磚沖泡冬瓜茶嘅方法，甜度比坊間嘅冬瓜茶略低。如完全走糖，即冇額外加糖，入口會更清新。

桂花烏龍

鍾意花香嘅朋友，推介你試桂花烏龍。皆因烏龍茶底以拌入桂花碎嘅糖漿沖製，本身已帶有少許甜度，選擇無糖都會有清甜滋味。

名間四季春

品牌四大茶底之一嘅名間四季春，茶色金黃清澈，香氣宜人，入口甘醇順喉。有時聚餐後食到飽飽滯滯，飲返杯減糖，甚至無糖版解膩都唔錯。

*資料由客戶提供