港島西呢邊有唔少特色咖啡店，包括呢間五月中新開，喺港大附近嘅Cafe。All Day Breakfast聽起嚟好似一般Cafe都有嘅嘢，但呢度就特別配上自家製Earl Grey蘋果果醬。其他輕食同飲品都有水準，仲歡迎帶埋毛孩一齊嚟Relax下！
 

Dreamer Cafe老闆之一細細個就想開一間屬於自己嘅Cafe，而且加上呢度環境舒適，又有張長木枱可以畀附近嘅港大學生、或者其他人開Workshop、市集等唔同活動一齊圓夢，所以就改名為Dreamer Cafe，門口嘅「Every great dream begins with a Dreamer」燈更加係打卡熱點！
 

All Day Breakfast（$108）

最豐富嘅當然就係All Day Breakfast，亮點係自家製Earl Grey蘋果果醬配多士！原來因為老闆其中一位朋友有整開，大家都覺得呢個配搭好夾，就加咗落Menu當中啦。果醬用英國Earl Grey茶葉，加蜜糖同蘋果粒煮成，茶香突出，蘋果粒咬落爽口清甜。甜度適中，所以就咁食都OK。
 

多士係農夫包，比較硬身同煙韌，烘至香脆配果醬最啱。另外仲有有燻三文魚、意大利芝士腸、煙肉、炒蛋、牛油果、沙律。意大利芝士腸外面係脆皮，裡面有半融芝士夠香口。炒蛋亦算嫩，加上黑椒調味簡單而滿足。
 

Avocado and Smoked Salmon Toast with Green Salad（$88）

唔想食太飽亦可以點返份多士，有牛油果、煙燻三文魚同炒蛋，食落味道就以煙燻三文魚嘅香味為主，加埋熟得啱啱好嘅Creamy牛油果同半熟炒蛋，味道平衡唔膩。另外有兩款沙律，同每日會有兩款Pasta畀大家選擇。
 

Selection of Cake

而蛋糕款式每日都有唔同，開飯仔採訪呢日係自家製Brownie，當日新鮮焗製所以Keep到外脆內濕潤嘅口感，有厚重朱古力味，味道香甜。加埋旁邊嘅新鮮打嘅朱古力忌廉同甜甜地嘅朱古力醬，係三重朱古力享受！
 

Hojicha Milk（$42/Hot，$47/Iced）

鍾意焙茶嘅朋友一定要點！選用日本靜岡焙茶粉，一上枱就聞到相當濃郁嘅焙茶香，睇顏色亦估到茶粉落得唔手軟，飲落茶香果然夠突出，口感柔滑，唔會得個甜字無茶味。不過平時比較少飲焙茶嘅話可能會覺得太濃或者有少少苦，呢個時候可以請Barista加牛奶，安排貼心。
 

Dirty（$35）

Dirty咖啡即係將Double Rristretto倒落凍牛奶，漸層賣相靚得嚟，亦係方便大家品嘗到熱嘅咖啡同凍嘅牛奶兩種唔同口感同味道。咖啡酸度適中，帶淡淡花香。
 

Dreamer Cafe
地址：西環保德街6-20號保基大廈地下5號舖

文、相、片：Cathy